അതിഥിത്തൊഴിലാളികളുടെ കുറവ്: നിർമാണ മേഖല സ്തംഭനാവസ്ഥയിൽ, പ്രതിസന്ധി രൂക്ഷം

മൂവാറ്റുപുഴ കേന്ദ്രീകരിച്ച് പ്രവർത്തിക്കുന്ന നിർമാണ മേഖല കടുത്ത പ്രതിസന്ധിയിലേക്ക്. അസം, ബംഗാൾ തുടങ്ങിയ സംസ്ഥാനങ്ങളിൽ നിന്ന് തിരികെ എത്തേണ്ട

അതിഥിത്തൊഴിലാളികളുടെ കുറവും, പ്രാദേശിക തലത്തിൽ തൊഴിലാളികളെ ലഭിക്കാത്തതും വികസന, ഭവന നിർമാണ പദ്ധതികളെ സാരമായി ബാധിച്ചിരിക്കുകയാണ്. ഈ സാഹചര്യത്തിൽ സർക്കാർ അടിയന്തരമായി ഇടപെടണമെന്ന ആവശ്യവുമായി കരാറുകാരുടെ സംഘടനകൾ രംഗത്തെത്തി.

തിരഞ്ഞെടുപ്പ് കാലയളവിൽ നാട്ടിലേക്ക് മടങ്ങിയവരിൽ 40 ശതമാനം തൊഴിലാളികൾ മാത്രമാണ് കേരളത്തിലേക്ക് തിരികെ എത്തിയത്. ഉത്തരേന്ത്യൻ സംസ്ഥാനങ്ങളിൽ വിളവെടുപ്പ് സീസൺ ആരംഭിച്ചതും, അവിടെ തൊഴിലവസരങ്ങൾ വർധിച്ചതുമാണ് തൊഴിലാളികളുടെ മടങ്ങിവരവ് കുറയാൻ കാരണമായത്.

നിലവിൽ ജോലിയിലുള്ളവർ അമിതമായ കൂലി ആവശ്യപ്പെടുന്നത് ചെറുകിട കരാറുകാരെയും സാധാരണക്കാരായ നിർമാതാക്കളെയും വലിയ സാമ്പത്തിക പ്രതിസന്ധിയിലാക്കുന്നു.

വർഷങ്ങളായി തുടരുന്ന മലയാളി തൊഴിലാളികളുടെ ദൗർലഭ്യം നിർമാണ മേഖലയിലെ കഠിനമായ ജോലികളെ പൂർണമായും അതിഥിത്തൊഴിലാളികളെ ആശ്രയിക്കുന്ന അവസ്ഥയിലാണ് എത്തിച്ചിരിക്കുന്നത്. ഈ പ്രതിസന്ധി മൂലം സർക്കാർ വികസന പദ്ധതികൾ കൃത്യസമയത്ത് പൂർത്തിയാക്കാൻ കഴിയാത്ത സാഹചര്യമാണ് നിലവിലുള്ളത്.

പണി പൂർത്തിയാക്കാൻ കാലതാമസം നേരിടുന്നത് കരാറുകാർക്ക് വലിയ തുക പിഴയായി ഒടുക്കേണ്ടി വരുന്ന അവസ്ഥ സൃഷ്ടിക്കുന്നു. ഇതിനു പുറമെ, നിർമാണ സാമഗ്രികളുടെ വിലക്കയറ്റവും ഇന്ധനവില വർധനയും മേഖലയ്ക്ക് ഇരട്ടപ്രഹരമായി മാറി.

പൊതുമരാമത്ത് പ്രവൃത്തികൾ, തദ്ദേശ സ്വയംഭരണ സ്ഥാപനങ്ങളുടെ റോഡ് നിർമാണങ്ങൾ, സ്വകാര്യ കെട്ടിട നിർമാണങ്ങൾ എന്നിവയെല്ലാം ഇപ്പോൾ അനിശ്ചിതത്വത്തിലാണ്.

സർക്കാർ തലത്തിൽ ലേബർ ബാങ്കുകൾ സ്ഥാപിച്ച് തൊഴിലാളികളുടെ ലഭ്യത ഉറപ്പാക്കണമെന്നും, കൃത്യമായ തിരിച്ചറിയൽ രേഖകളുള്ള തൊഴിലാളികൾക്ക് സുരക്ഷിതമായ തൊഴിൽ അന്തരീക്ഷം ഒരുക്കണമെന്നുമാണ് കരാറുകാരുടെ പ്രധാന ആവശ്യം.