കേരളത്തിന്റെ റബർ വിപണിയിൽ ചരിത്രപരമായ മുന്നേറ്റം. റബർ വില 300 രൂപയെന്ന മാജിക് നമ്പറിലേക്ക് കുതിക്കുകയാണെന്ന് റിപ്പോർട്ടുകൾ വ്യക്തമാക്കുന്നു.
ഇതിന്റെ ഭാഗമായി ലാറ്റക്സിന് എക്കാലത്തെയും ഉയർന്ന വിലയാണ് വിപണിയിൽ രേഖപ്പെടുത്തിയിരിക്കുന്നത്. കഴിഞ്ഞ ദിവസം ഓപ്പൺ മാർക്കറ്റിൽ ലാറ്റക്സ് സ്പോട്ട് വില കിലോഗ്രാമിന് 298 രൂപയെന്ന എക്കാലത്തെയും വലിയ റെക്കോർഡിലെത്തി.
ഗ്ലൗസ്, പ്രൊഫിലാറ്റിക്സ് മേഖലകളിൽ നിന്നുള്ള ശക്തമായ ഡിമാൻഡും വിപണിയിൽ ചരക്കിന്റെ ലഭ്യത കുറഞ്ഞതുമാണ് വില ഇത്രയധികം വർദ്ധിക്കാൻ പ്രധാന കാരണം. ഇതിനുപുറമേ, പശ്ചിമേഷ്യൻ രാജ്യങ്ങളിലെ രാഷ്ട്രീയ സംഘർഷങ്ങളെ തുടർന്ന് കടൽ മാർഗമുള്ള ചരക്കുനീക്കം തടസ്സപ്പെട്ടത് വിദേശത്തുനിന്നുള്ള ലാറ്റക്സ് ഇറക്കുമതി പൂർണ്ണമായും അസാധ്യമാക്കിയിട്ടുണ്ട്.
ഈ സാഹചര്യം ആഭ്യന്തര വിപണിയിൽ ലാറ്റക്സിന്റെ ആവശ്യകതയും വിലയും കുത്തനെ ഉയരുന്നതിന് കാരണമായി മാറി. അതേസമയം, രാജ്യാന്തര മാർക്കറ്റിൽ ഷീറ്റ് റബറിന്റെ വില ഇടിയുമ്പോഴും ആഭ്യന്തര വിപണി അതിന്റെ മുന്നേറ്റം തുടരുകയാണ് എന്നത് ശ്രദ്ധേയമാണ്.
ബാങ്കോക്ക് മാർക്കറ്റിൽ ആർ.എസ്.എസ്- 4 ഗ്രേഡ് റബർ വില ഇടിഞ്ഞ് കിലോയ്ക്ക് 266.78 രൂപയായി മാറിയെങ്കിലും, കോട്ടയം, കൊച്ചി വിപണികളിൽ വില 284 രൂപയായി തുടരുകയാണ്. പ്രധാന ഉൽപാദന രാജ്യങ്ങളിൽ നിന്ന് മാർക്കറ്റിലേക്കുള്ള റബറിന്റെ വരവ് വർദ്ധിച്ചതും, ജപ്പാനിലെ ഒസാക്ക എക്സ്ചേഞ്ച്, സിംഗപ്പൂർ എക്സ്ചേഞ്ച് തുടങ്ങിയ ആഗോള ചരക്ക് മാർക്കറ്റുകളിൽ റബർ അവധി വ്യാപാരം താഴേക്ക് പോയതുമാണ് രാജ്യാന്തര തലത്തിൽ വില ഇടിയാൻ ഇടയാക്കിയത്.
എങ്കിലും, ആഭ്യന്തര വിപണിയിൽ ശക്തമായ ഡിമാൻഡ് തുടരുന്നതും, വില ഇനിയും ഉയരുമെന്ന പ്രതീക്ഷയിൽ കർഷകരും വ്യാപാരികളും ചരക്ക് വിപണിയിൽ എത്തിക്കാതെ സൂക്ഷിക്കുന്നതുമാണ് ആഭ്യന്തര വില 284 രൂപയിൽ പിടിച്ചുനിർത്താൻ കാരണമായത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
