ഭൂട്ടാൻ ആഡംബര വാഹന കേസ്: നടൻ ദുൽഖർ സൽമാനെ ഏഴ് മണിക്കൂർ ചോദ്യം ചെയ്തു

ഭൂട്ടാൻ ആഡംബര വാഹന കള്ളക്കടത്ത് കേസുമായി ബന്ധപ്പെട്ട അന്വേഷണത്തിന്റെ ഭാഗമായി, കൊച്ചിയിലെ കസ്റ്റംസ് ഓഫീസിൽ നടൻ ദുൽഖർ സൽമാനെ ഏഴ് മണിക്കൂർ ചോദ്യം ചെയ്തു.

ഓപ്പറേഷൻ നുമ്‌ഖോർ എന്ന അന്വേഷണത്തിന്റെ ഭാഗമായി നേരത്തെ കസ്റ്റംസ് പിടിച്ചെടുത്ത നാല് വാഹനങ്ങൾ നടന്റെ ഉടമസ്ഥതയിലുള്ളതാണ്. ബുധനാഴ്ച രാവിലെ 11 മണിക്ക് തുടങ്ങിയ ചോദ്യം ചെയ്യൽ വൈകിട്ട് ആറ് മണി വരെ നീണ്ടുനിന്നു.

കസ്റ്റംസ് പ്രിവന്റീവ് വിഭാഗമാണ് അദ്ദേഹത്തെ നേരിട്ട് വിളിച്ചുവരുത്തി മൊഴിയെടുത്തത്. പിടിച്ചെടുത്ത വാഹനങ്ങളുടെ വിവരങ്ങൾ, അവ വാങ്ങിയ രീതി, പണമിടപാടുകൾ എന്നിവയായിരുന്നു അന്വേഷണ സംഘം പ്രധാനമായും ആരാഞ്ഞത്.

താൻ നിയമപരമായ മാർഗ്ഗങ്ങളിലൂടെയാണ് വാഹനങ്ങൾ സ്വന്തമാക്കിയതെന്നും, അവ ഭൂട്ടാനിൽനിന്ന് കൊണ്ടുവന്നതാണെന്ന വിവരം തനിക്ക് അറിവില്ലെന്നും ദുൽഖർ സൽമാൻ വ്യക്തമാക്കിയിട്ടുണ്ട്. വാഹനങ്ങളുമായി ബന്ധപ്പെട്ട

രേഖകൾ നേരത്തെ തന്നെ അദ്ദേഹം കസ്റ്റംസിന് കൈമാറിയിരുന്നു. ഈ കേസിൽ ഇതുവരെ ഏഴ് പേരെ അന്വേഷണ സംഘം അറസ്റ്റ് ചെയ്തിട്ടുണ്ട്.

വാഹനങ്ങൾ അതിർത്തി കടത്തിയവരും വ്യാജരേഖകൾ ചമച്ചവരും ഇടനിലക്കാരുമാണ് പിടിയിലായത്. പ്രധാന സൂത്രധാരനായ ബംഗാൾ സ്വദേശി **ബിശ്വദീപ് ദാസ്**, കോഴിക്കോട് എം.എസ്.

റോഡ്‌വേ കാർസ് പങ്കാളി **സെയ്ൻ മാർവ**, ഇടനിലക്കാരൻ **യഷ്**, അസം ബോങ്യാഗാവോൺ ജില്ലാ ട്രാൻസ്പോർട്ട് ഓഫിസർ **ദീപക് പഠോവരി** എന്നിവർ ഇതിൽ ഉൾപ്പെടുന്നു. അസമിലെ മോട്ടോർ വാഹന വകുപ്പ് ഉദ്യോഗസ്ഥരുടെ ഒത്താശയോടെ വ്യാജരേഖകൾ ഉപയോഗിച്ച് 464 വാഹനങ്ങൾ റജിസ്റ്റർ ചെയ്തതായി അസം പൊലീസ് കണ്ടെത്തിയിരുന്നു.

ഇതിൽ ഭൂരിഭാഗവും ലക്ഷദ്വീപിലാണ് ആദ്യ റജിസ്ട്രേഷൻ കാണിച്ചിരിക്കുന്നത്. അസം ഉൾപ്പെടെയുള്ള വടക്കുകിഴക്കൻ സംസ്ഥാനങ്ങളിൽ ഒരേ ചേസിസ്-എൻജിൻ നമ്പറുകളിൽ 15,849 വാഹനങ്ങൾ ഓടുന്നതായി കംപ്ട്രോളർ ആൻഡ് ഓഡിറ്റർ ജനറലും (സിഎജി) മുൻപ് കണ്ടെത്തിയിരുന്നു.

നികുതി വെട്ടിച്ച് അതിർത്തി കടത്തിയതിൽ കേരളത്തിൽ നിന്ന് മാത്രം 50-ൽ അധികം വാഹനങ്ങൾ കസ്റ്റംസ് പിടിച്ചെടുത്തിട്ടുണ്ട്.