ആറന്മുള ഗവ. എച്ച്എസ്എസ് ഡൈനിങ് ഹാൾ പ്രതിസന്ധിയിൽ: അങ്കണവാടി മാറ്റാൻ ജില്ലാ പഞ്ചായത്തിന്റെ നിർദ്ദേശം

പുതിയ അധ്യയന വർഷം ആരംഭിച്ചതോടെ ആറന്മുള ഗവ. എച്ച്എസ്എസിലെ വിദ്യാർഥികളും സ്കൂൾ ഡൈനിങ് ഹാളിൽ പ്രവർത്തിക്കുന്ന അങ്കണവാടിയിലെ കുട്ടികളും കടുത്ത പ്രതിസന്ധിയിലാണ്.

സ്കൂൾ വിദ്യാർഥികളുടെ ഉച്ചഭക്ഷണത്തിനായി നിർമിച്ച ഹാളിൽ അങ്കണവാടി പ്രവർത്തിക്കുന്നത് വലിയ ബുദ്ധിമുട്ടുകൾ സൃഷ്ടിക്കുന്നുവെന്ന പരാതി ശക്തമായിട്ടുണ്ട്. കുട്ടികൾക്ക് ഭക്ഷണം കഴിക്കാൻ മതിയായ സൗകര്യം ഉറപ്പാക്കുന്നതിനായി അങ്കണവാടി ഇവിടെനിന്നും മാറ്റിസ്ഥാപിക്കണമെന്ന് ജില്ലാ പഞ്ചായത്ത് മല്ലപ്പുഴശ്ശേരി പഞ്ചായത്ത് അധികൃതരോട് നിർദ്ദേശിച്ചു.

ഹൈസ്കൂൾ വിഭാഗത്തിൽ ഇരുനൂറ്റൻപതോളം കുട്ടികൾ പഠിക്കുന്ന ഈ വിദ്യാലയത്തിൽ 187 വിദ്യാർഥികളാണ് ഉച്ചഭക്ഷണം കഴിക്കുന്നത്. 2018-ൽ 9.5 ലക്ഷം രൂപ ചിലവഴിച്ച് ജില്ലാ പഞ്ചായത്ത് നിർമിച്ച കെട്ടിടമാണ് ഡൈനിങ് ഹാളിനായി ഉപയോഗിക്കുന്നത്.

എന്നാൽ, നിലവിൽ 50 കുട്ടികൾക്ക് പോലും ഇവിടെ ഒരേസമയം ഇരുന്ന് ഭക്ഷണം കഴിക്കാൻ സ്ഥലസൗകര്യമില്ല. കെട്ടിടം പൂർത്തിയായ സമയം മുതൽ അങ്കണവാടി ഇവിടെയാണ് പ്രവർത്തിക്കുന്നത്.

നേരത്തെ സ്കൂളിലെ ഓടിട്ട പഴയ കെട്ടിടത്തിന്റെ കിഴക്കേയറ്റത്തെ ക്ലാസ് മുറിയിലായിരുന്നു അങ്കണവാടി പ്രവർത്തിച്ചിരുന്നത്.

അന്ന് ക്ലാസ് മുറിയിൽ ടൈൽ ഇടുന്ന ജോലികൾ നടന്നതിനാലാണ് താൽക്കാലികമായി അങ്കണവാടി ഡൈനിങ് ഹാളിലേക്ക് മാറ്റിയത്. ഉടൻ തന്നെ അങ്കണവാടി മാറ്റിസ്ഥാപിക്കുമെന്ന ഉറപ്പ് അന്ന് ലഭിച്ചിരുന്നുവെങ്കിലും, എട്ട് വർഷങ്ങൾ പിന്നിട്ടിട്ടും നടപടികളൊന്നും ഉണ്ടായില്ല.

നിലവിൽ ഏഴ് കുട്ടികൾ മാത്രമുള്ള അങ്കണവാടിയുടെ പഠനവും, അടുക്കളയുടെ പ്രവർത്തനവും, കളിയുപകരണങ്ങളുടെ സൂക്ഷിപ്പും എല്ലാം ഈ ഡൈനിങ് ഹാളിൽ തന്നെയാണ് നടക്കുന്നത്. ഉച്ചസമയത്ത് 187 വിദ്യാർഥികൾ ഭക്ഷണം കഴിക്കാൻ എത്തുമ്പോൾ സ്ഥലപരിമിതി രൂക്ഷമാകുന്നു.

സ്കൂളിലെ നിലവിലെ കെട്ടിടത്തിൽ ക്ലാസ് മുറികൾക്ക് മാത്രമാണ് സൗകര്യമുള്ളത്. പുതിയ കെട്ടിടം നിർമിക്കാൻ വിദ്യാഭ്യാസ വകുപ്പ് ഒരു കോടി രൂപ അനുവദിച്ചുവെങ്കിലും നടപടികൾ ഇതുവരെ ആരംഭിച്ചിട്ടില്ല.

സൗകര്യപ്രദമായ മറ്റൊരു സ്ഥലം കണ്ടെത്തി അങ്കണവാടി അവിടേക്ക് മാറ്റിയാൽ രണ്ട് വിഭാഗത്തിന്റെയും ബുദ്ധിമുട്ടുകൾ പരിഹരിക്കാൻ സാധിക്കുമെന്നാണ് അധികൃതരുടെ വിലയിരുത്തൽ. ഇക്കാര്യത്തിൽ അടിയന്തര ഇടപെടൽ വേണ്ടത് പഞ്ചായത്ത് ഭരണസമിതിയാണ്.