ഭർതൃവീട്ടിൽ യുവതിയുടെ മരണം: അന്വേഷണം ആവശ്യപ്പെട്ട് മാതാപിതാക്കൾ

ആലപ്പുഴ ∙ ഭർതൃവീട്ടിൽ ജീവനൊടുക്കിയ നിലയിൽ കണ്ടെത്തിയ യുവതിയുടെ മരണത്തിൽ ദുരൂഹതയുണ്ടെന്ന് കാഴ്ചപരിമിതിയുള്ള മാതാപിതാക്കളുടെ പരാതി. മണ്ണഞ്ചേരി തകിടിവെളി വി.ബി.ജയരാജിന്റെ മകൾ രേഷ്മ​യാണ്​ (27) കഴിഞ്ഞമാസം 27ന്​ ഭർതൃവീട്ടിൽ മരിച്ചത്​.

സംഭവത്തിൽ പുനരന്വേഷണം നടത്തണമെന്നാവശ്യപ്പെട്ട്​ മുഖ്യമന്ത്രി, ജില്ലാ പൊലീസ് മേധാവി, ഡിജിപി എന്നിവർക്ക് കുടുംബം​ പരാതി നൽകി. 27ന്​ രാവിലെ എട്ടിനാണ്​ ഭർതൃവീട്ടിലെ​ കിടപ്പുമുറിയിൽ തൂങ്ങി​മരിച്ച നിലയിൽ കണ്ടെത്തിയത്​.
പോസ്റ്റ്മോർട്ടത്തിനായി മൃതദേഹം ആശുപത്രിയിലേക്ക്​ മാറ്റുമ്പോൾ കവിളിന്റെ ഭാഗത്ത്​ മർദനമേറ്റ പാടുകളുണ്ടായിരുന്നു. 2021 ഓഗസ്റ്റ് 20നാണ്​ ആലപ്പുഴ തത്തംപള്ളി കറുകയിൽ സ്വദേശിയായ യുവാവുമായി വിവാഹം നടത്തിയത്.

തൂങ്ങിമരിച്ചെന്ന വിവരമറിഞ്ഞ് യുവതിയുടെ കുടുംബം​ ​ഭർതൃവീട്ടിലെത്തിയപ്പോൾ കിടപ്പുമുറിയിലാണ്​​ മൃതദേഹം കിടന്നിരുന്നത്​. ഫാനിൽ ഷാളിന്റെ ഒരറ്റം കുരുക്കിട്ട​ നിലയിൽ കട്ടിലിൽ കിടക്കുന്നതാണ്​ കണ്ടത്​. അച്ഛനും അമ്മയും വഴക്കിട്ടതായും ഫോൺ എറിഞ്ഞ്​ പൊട്ടിച്ചതായും മൂന്നുവയസ്സുള്ള രേഷ്മയുടെ മകൾ പിന്നീട് പറഞ്ഞിട്ടുണ്ട്​.
വിവാഹശേഷം സ്വർണത്തിന്റെ പേരിലും വൈകല്യമുള്ള മാതാപിതാക്കളുടെ മകളാണെന്നു പറഞ്ഞും​ ഭർതൃവീട്ടുകാർ മാനസികമായി പീഡിപ്പിച്ചിരുന്നതായി രേഷ്മ കൂട്ടുകാരിയോട്​ പറഞ്ഞിട്ടുണ്ട്​.

ഇത്​ സംബന്ധിച്ച്​ ആലപ്പുഴ നോർത്ത്​ പൊലീസിലും ഡിവൈഎസ്പിക്കും പരാതി നൽകിയിട്ടും പ്രതികളെ രക്ഷിക്കുന്ന സമീപനമാണ്​ സ്വീകരിച്ചത്​. വിഷയത്തിൽ നീതി ലഭ്യമാക്കണമെന്നാവശ്യപ്പെട്ടു​ കേരള ഫെഡറേഷൻ ഓഫ്​ ദി​ ​ബ്ലൈൻഡും പരാതി നൽകിയിട്ടുണ്ടെന്നും രേഷ്മയുടെ പിതാവ്​ വി.ബി.ജയരാജ്​, മാതാവ്​ ഷീല,ഫെഡറേഷൻ ഓഫ്​ ദി​ ​ബ്ലൈൻഡ്​ ജില്ലാ സെക്രട്ടറി പി.ജി.മനു എന്നിവർ അറിയിച്ചു.

…