കോടികൾ മുടക്കിയ പാത്തൻപാറ ടൂറിസം പദ്ധതി അനാഥാവസ്ഥയിൽ; വിജിലൻസ് അന്വേഷണവും വിവാദങ്ങളും നിഴലിൽ

നടുവിൽ പഞ്ചായത്തിലെ പാത്തൻപാറ വാർഡിൽ കോടികൾ ചെലവഴിച്ച് നടപ്പാക്കിയ ടൂറിസം പദ്ധതി കാടുമൂടി നശിക്കുന്നു. കുട്ടിപ്പുല്ല് കേന്ദ്രീകരിച്ച് നടപ്പിലാക്കിയ ചിൽഡ്രൻസ് പാർക്ക് പദ്ധതിയാണ് ഇപ്പോൾ യാതൊരു ഉപയോഗവുമില്ലാതെ കിടക്കുന്നത്.

കഴിഞ്ഞ വർഷമാണ് പദ്ധതിയുടെ നിർമ്മാണ പ്രവർത്തനങ്ങൾ ഏതാണ്ട് പൂർത്തിയായത്. എന്നാൽ, നിലവിൽ വിജിലൻസ് അന്വേഷണം പുരോഗമിക്കുന്നതിനാൽ കെട്ടിടത്തിന്റെ ഉദ്ഘാടനം ഇതുവരെയും സാധ്യമായിട്ടില്ല.

പദ്ധതിയുടെ ഭാഗമായി 2024-ൽ ഗ്രാമപഞ്ചായത്ത് ഫണ്ടിൽ നിന്നും 33 ലക്ഷം രൂപയും, സർക്കാരിന്റെ ടൂറിസം ഫണ്ടിൽ നിന്ന് 50 ലക്ഷം രൂപയും ഉൾപ്പെടെ ആകെ 83 ലക്ഷം രൂപയാണ് ഇരുമ്പ് തൂണുകളിൽ കെട്ടിടം നിർമിക്കാനായി വകയിരുത്തിയത്. ഇതിനുപുറമേ, ഇവിടേക്കുള്ള ഗതാഗതം സുഗമമാക്കുന്നതിനായി കരാമരംതട്ട് – കുട്ടിപ്പുല്ല് രണ്ടര കിലോമീറ്റർ റോഡ് നിർമ്മാണത്തിനായി വിവിധ ഫണ്ടുകളിൽ നിന്നായി 27 ലക്ഷം രൂപയും കൂടി ചെലവഴിച്ചിട്ടുണ്ട്.

ഇത്തരത്തിൽ ആകെ 1.13 കോടി രൂപയുടെ സാമ്പത്തിക വിനിയോഗമാണ് ഇവിടെ നടന്നിട്ടുള്ളത്. സാങ്കേതിക തടസ്സങ്ങളും വിവാദങ്ങളും
പ്രദേശത്തിന്റെ ഭൂപ്രകൃതിയെക്കുറിച്ചുള്ള ആശങ്കകൾ ആദ്യമേ തന്നെ ഉയർന്നിരുന്നു.

45 ഡിഗ്രി ചരിവുള്ളതും ഉരുൾപൊട്ടൽ സാധ്യത അതികഠിനവുമായ പ്രദേശത്താണ് ചിൽഡ്രൻസ് പാർക്ക് യാഥാർത്ഥ്യമാക്കിയത്. പ്രാദേശിക എതിർപ്പുകളെയും പരാതികളെയും പൂർണ്ണമായും അവഗണിച്ചുകൊണ്ടായിരുന്നു നിർമ്മാണ പ്രവർത്തനങ്ങൾ മുന്നോട്ട് കൊണ്ടുപോയത്.

കുട്ടിപ്പുല്ലിലേക്കുള്ള റോഡ് വനഭൂമിയിലൂടെയാണ് കടന്നുപോകുന്നത്. ഈ സാഹചര്യങ്ങൾ ചൂണ്ടിക്കാട്ടി ഒരു സ്വകാര്യവ്യക്തി വിജിലൻസിന് പരാതി നൽകുകയായിരുന്നു.

പ്രാഥമിക അന്വേഷണത്തിൽ പരാതിയിൽ കഴമ്പുണ്ടെന്ന് കണ്ടെത്തിയെങ്കിലും തുടർനടപടികൾ ഒന്നിനും ഇതുവരെയും വേഗത കൈവന്നിട്ടില്ല. ഭൂമാഫിയകളുടെ സ്വാർത്ഥ താല്പര്യങ്ങളാണ് പദ്ധതിക്ക് പിന്നിലെന്ന് പരിസ്ഥിതി പ്രവർത്തകനും പ്രദേശവാസിയുമായ ബെന്നി മുട്ടത്തിൽ വ്യക്തമാക്കി.

“പൈതൽമലയെയും പാലക്കയംതട്ടിനെയും അപേക്ഷിച്ച് ഒട്ടും വിജയസാധ്യതയില്ലാത്ത പദ്ധതിയാണിത്. ഭൂമാഫിയകളുടെ ഗൂഢലക്ഷ്യമാണ് ഒട്ടും സൗകര്യപ്രദമല്ലാത്ത 70 സെന്റ് സ്ഥലം പഞ്ചായത്തിന് സൗജന്യമായി നൽകി അതിൽ നിന്ന് വൻ ലാഭമുണ്ടാക്കാമെന്നത്.

പദ്ധതി പുനഃപരിശോധിക്കണം. പഠനം നടത്താതെ പദ്ധതി നടപ്പാക്കിയ ഉദ്യോഗസ്ഥർ ഉൾപ്പെടെയുള്ളവരിൽ നിന്നു ചെലവായ തുക തിരിച്ചുപിടിക്കണം” എന്ന് അദ്ദേഹം ആവശ്യപ്പെട്ടു.

ഭൂമാഫിയകളുടെ നീക്കങ്ങളും ടൂറിസം സാധ്യതകളും
പഞ്ചായത്തിന് സൗജന്യമായി ലഭിച്ച 70 സെന്റ് സ്ഥലത്താണ് പ്രധാന കെട്ടിടങ്ങൾ പണിതുയർത്തിയത്. പാർക്ക് പ്രവർത്തനക്ഷമമാകുന്നതോടെ റോഡുൾപ്പെടെയുള്ള അടിസ്ഥാന സൗകര്യങ്ങൾ വികസിക്കുമെന്ന കണക്കുകൂട്ടലിലായിരുന്നു ഭൂമിദാനം.

ഇതിന്റെ മറവിൽ സമീപ പ്രദേശങ്ങളിൽ റിസോർട്ടുകൾ ഉൾപ്പെടെയുള്ള വൻകിട പദ്ധതികൾ നടപ്പിലാക്കാനായിരുന്നു യഥാർത്ഥ ലക്ഷ്യമെന്ന് നാട്ടുകാർ ആരോപിക്കുന്നു.

വൈദ്യുതിയും ഇന്റർനെറ്റും ഉൾപ്പെടെയുള്ള സൗകര്യങ്ങൾ സർക്കാർ ചെലവിൽ ലഭ്യമാക്കാനും നീക്കം നടന്നു. പാർക്ക് പണിതുയർത്തിയ സമയത്ത് റിസോർട്ട് നിർമ്മാണങ്ങളുടെ ലക്ഷണങ്ങൾ കണ്ടുതുടങ്ങിയെങ്കിലും, പദ്ധതി അനന്തമായി നീണ്ടതോടെ ആ നീക്കങ്ങളും തടസ്സപ്പെട്ടു.

പൈതൽമലയുടെ വിദൂര ദൃശ്യം മാത്രമാണ് ഇവിടെയുള്ള ആകർഷണം. എന്നാൽ അത് കാണണമെങ്കിൽ പോലും സ്വകാര്യ വ്യക്തികളുടെ സ്ഥലങ്ങളെ ആശ്രയിക്കേണ്ട

സ്ഥിതിയാണ്. യാതൊരുവിധ ടൂറിസം സാധ്യതകളും ഇല്ലാത്ത വിജനവും ദുർഘടവുമായ പ്രദേശത്ത് കോടികൾ ധൂർത്തടിച്ചതിനെതിരെ വ്യാപകമായ പ്രതിഷേധമാണ് ഉയരുന്നത്.