കോഴിക്കോട് ജില്ലയിൽ അഞ്ചാംപനി (മീസിൽസ്) രോഗബാധ റിപ്പോർട്ട് ചെയ്യപ്പെട്ട പശ്ചാത്തലത്തിൽ പൊതുജനങ്ങൾ കർശന ജാഗ്രത പാലിക്കണമെന്ന് ജില്ലാ മെഡിക്കൽ ഓഫിസർ അറിയിച്ചു.
വായുവിലൂടെയും രോഗബാധിതരുമായുള്ള നേരിട്ടുള്ള സമ്പർക്കത്തിലൂടെയും അതിവേഗം പടരുന്ന വൈറസ് രോഗമാണിത്. പ്രധാനമായും കുട്ടികളെയാണ് ഈ രോഗം ബാധിക്കുന്നത്.
ന്യൂമോണിയ, കടുത്ത വയറിളക്കം, മസ്തിഷ്ക അണുബാധ തുടങ്ങിയ ഗുരുതരമായ ആരോഗ്യപ്രശ്നങ്ങളിലേക്ക് നയിക്കാൻ സാധ്യതയുള്ള ഈ രോഗം ചില സന്ദർഭങ്ങളിൽ മരണകാരണമായേക്കാം. വാക്സിനേഷൻ എടുക്കാത്തവരിലാണ് പ്രധാനമായും മരണം റിപ്പോർട്ട് ചെയ്യപ്പെട്ടിട്ടുള്ളത്.
പ്രധാന ലക്ഷണങ്ങൾ:
ശക്തമായ പനി, ചുമ, മൂക്കൊലിപ്പ്, ചുവന്ന കണ്ണുകൾ, ശരീരത്തിൽ കാണപ്പെടുന്ന ചുവന്ന പാടുകൾ, വായിൽ ഉണ്ടാകുന്ന ചുവപ്പ് നിറം എന്നിവയാണ് പ്രധാന ലക്ഷണങ്ങൾ. രോഗബാധയേറ്റ് 10 മുതൽ 14 ദിവസത്തിനുള്ളിൽ ലക്ഷണങ്ങൾ പ്രകടമായി തുടങ്ങും.
ലക്ഷണങ്ങൾ കണ്ടാലുടൻ തന്നെ വൈദ്യസഹായം തേടേണ്ടതാണ്. രോഗബാധ സ്ഥിരീകരിക്കുന്ന കുട്ടികളെ യാതൊരു കാരണവശാലും സ്കൂളുകളിലേക്കോ അങ്കണവാടികളിലേക്കോ വിടാൻ പാടില്ല.
പ്രതിരോധ കുത്തിവെപ്പിന്റെ പ്രാധാന്യം:
വൈറൽ രോഗമായതിനാൽ മീസിൽസിന് പ്രത്യേക ഔഷധ ചികിത്സകളില്ല. രോഗലക്ഷണങ്ങൾക്ക് അനുസൃതമായ ചികിത്സയാണ് നൽകുന്നത്.
എങ്കിലും, കൃത്യമായ വാക്സിനേഷനിലൂടെ പൂർണ്ണമായി പ്രതിരോധിക്കാൻ സാധിക്കുന്ന ഒന്നാണ് ഈ രോഗം. കുഞ്ഞ് ജനിച്ച് 9 മുതൽ 12 മാസത്തിനുള്ളിൽ ആദ്യ ഡോസ് വാക്സിനും, 16 മുതൽ 24 മാസത്തിനുള്ളിൽ രണ്ടാം ഡോസും നൽകേണ്ടതാണ്.
രണ്ട് ഡോസ് മീസിൽസ് റൂബെല്ല വാക്സിനുകൾ സ്വീകരിക്കുന്നതിലൂടെ കുട്ടികളുടെ ആരോഗ്യം സുരക്ഷിതമാക്കാനും ജീവൻ സംരക്ഷിക്കാനും സാധിക്കും. ഏതെങ്കിലും കാരണത്താൽ നിശ്ചിത സമയത്ത് വാക്സിൻ എടുക്കാൻ വിട്ടുപോയ കുട്ടികൾക്ക് അഞ്ച് വയസ്സ് വരെ വാക്സിനേഷൻ സ്വീകരിക്കാവുന്നതാണ്.
ജില്ലയിലെ എല്ലാ സർക്കാർ ആരോഗ്യ കേന്ദ്രങ്ങളിലും ഈ വാക്സിൻ തികച്ചും സൗജന്യമായി ലഭ്യമാക്കിയിട്ടുണ്ട്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
