പി.പി. ദിവ്യക്കെതിരെ വിജിലൻസ് അന്വേഷണത്തിന് ഉത്തരവിട്ട് സർക്കാർ

സിപിഎം നേതാവും കണ്ണൂർ ജില്ലാ പഞ്ചായത്ത് മുൻ പ്രസിഡന്റുമായ പി.പി. ദിവ്യക്കെതിരെ വിജിലൻസ് അന്വേഷണത്തിന് സർക്കാർ ഉത്തരവായി.

പി.പി. ദിവ്യ ജില്ലാ പഞ്ചായത്ത് അധ്യക്ഷയായിരുന്ന കാലയളവിൽ ടെൻഡർ നടപടികൾ പാലിക്കാതെ കാർട്ടൺ ഇന്ത്യ ലിമിറ്റഡ് എന്ന കമ്പനിക്ക് കരാറുകൾ അനുവദിച്ചു നൽകിയെന്ന ആക്ഷേപത്തിലാണ് ഇപ്പോൾ വിജിലൻസ് അന്വേഷണം പ്രഖ്യാപിച്ചിരിക്കുന്നത്.

ഈ സ്ഥാപനം ദിവ്യയുടെ ബെനാമി സ്വത്താണെന്ന തരത്തിലും ആക്ഷേപങ്ങൾ ഉയർന്നിരുന്നു. കണ്ണൂർ എഡിഎം ആയിരുന്ന നവീൻ ബാബുവിന്റെ ദാരുണമായ മരണവുമായി ബന്ധപ്പെട്ട് ഉയർന്നുവന്ന വിവിധ വിവാദങ്ങളുടെ പശ്ചാത്തലത്തിലാണ് ഈ പുതിയ അഴിമതി ആരോപണവും അന്വേഷണ പരിധിയിൽ വരുന്നത്.

ഇതിനുപുറമെ, പി.പി. ദിവ്യയുടെയും ഭർത്താവിന്റെയും പേരിലുള്ള സ്വത്തുവിവരങ്ങളെക്കുറിച്ചും വിജിലൻസ് സംഘം സമഗ്രമായ പരിശോധന നടത്തുന്നതാണ്.

കണ്ണൂർ എഡിഎമ്മിന്റെ മരണത്തെത്തുടർന്നുണ്ടായ രാഷ്‌ട്രീയ വിവാദങ്ങളെ തുടർന്ന് പി.പി. ദിവ്യ ജില്ലാ പഞ്ചായത്ത് പ്രസിഡന്റ് പദവിയിൽ നിന്നും സ്വമേധയാ പടിയിറങ്ങിയിരുന്നു.

തൊട്ടുപിന്നാലെ നടന്ന തിരഞ്ഞെടുപ്പുകളിൽ പാർട്ടി നേതൃത്വം ദിവ്യയെ ഒന്നിനും പരിഗണിച്ചിരുന്നില്ല. നിലവിൽ അവർ പാർട്ടിയുമായി ഇടഞ്ഞുനിൽക്കുകയാണെന്ന സൂചനകളും പുറത്തുവരുന്നുണ്ട്.

കഴിഞ്ഞദിവസം സിപിഎമ്മുമായുള്ള അകൽച്ച പരസ്യമാക്കുന്ന രീതിയിൽ ഒരു സമൂഹമാധ്യമ കുറിപ്പും ദിവ്യ പങ്കുവെച്ചിരുന്നു. ‘‘നമ്മെ ഒരു കരയിൽനിന്ന് മറ്റൊരു കരയിലേക്ക് എത്തിക്കാൻ സഹായിച്ച ചങ്ങാടത്തെ ജീവിതകാലം മുഴുവൻ ചുമന്നുനടക്കേണ്ടതില്ല.

അതിനെ ഉപേക്ഷിക്കുന്നത് നന്ദികേടല്ല; മറിച്ച്, ജീവിതം നമ്മെ പഠിപ്പിച്ച പാഠത്തെ തിരിച്ചറിയലാണ്’’ – എന്നായിരുന്നു അന്ന് അവർ കുറിച്ചത്. ഈ സംഭവവികാസങ്ങൾക്ക് പിന്നാലെ ദിവ്യ പാർട്ടി വിട്ടുപോകുമെന്ന തരത്തിലുള്ള അഭ്യൂഹങ്ങളും ശക്തമായി നിലനിൽക്കുന്നുണ്ട്.