മുല്ലപ്പെരിയാറിൽ പുതിയ അണക്കെട്ട് അനുവദിക്കില്ലെന്ന് ടിവികെ; കേരളത്തിന്റെ നീക്കങ്ങളെ തടയുമെന്ന് നയപ്രഖ്യാപനം

മുല്ലപ്പെരിയാർ വിഷയത്തിൽ കർശന നിലപാടുമായി തമിഴ്‌നാട്ടിലെ ടിവികെ രംഗത്ത്. മുല്ലപ്പെരിയാറിൽ പുതിയ അണക്കെട്ട് നിർമ്മിക്കാനുള്ള കേരളത്തിന്റെ നീക്കങ്ങളെ ശക്തമായി എതിർക്കുമെന്ന് സർക്കാരിന്റെ ആദ്യ നയപ്രഖ്യാപന പ്രസംഗത്തിൽ വ്യക്തമാക്കി.

തെക്കൻ ജില്ലകളിലെ ജനങ്ങളുടെ ജീവനാഡിയാണ് മുല്ലപ്പെരിയാർ അണക്കെട്ടെന്നും നയപ്രഖ്യാപനത്തിൽ പരാമർശിക്കുന്നു. സുപ്രീം കോടതിയുടെ 2014-ലെ ഉത്തരവ് പ്രകാരം അണക്കെട്ടിലെ ജലനിരപ്പ് 142 അടിയായി ഉയർത്താൻ അനുമതിയുണ്ട്.

അണക്കെട്ട് ബലപ്പെടുത്തിയ ശേഷം ജലനിരപ്പ് 152 അടിയായി ഉയർത്താമെന്നും കോടതി നിർദ്ദേശിച്ചിരുന്നു. എന്നാൽ, ബലപ്പെടുത്തൽ ജോലികൾക്കുള്ള അനുമതി നിഷേധിക്കുകയും പുതിയ അണക്കെട്ട് നിർമ്മിക്കണമെന്ന ആവശ്യത്തിൽ കേരള സർക്കാർ ഉറച്ചുനിൽക്കുകയും ചെയ്യുന്ന സാഹചര്യത്തിലാണ് ടിവிகെയുടെ ഈ നിലപാട്.

കേരളത്തിന്റെ ഈ നീക്കങ്ങളെ തടയാൻ സർക്കാർ ശക്തമായ നടപടികൾ സ്വീകരിക്കുമെന്നും, അണക്കെട്ടിലെ അറ്റകുറ്റപ്പണികൾ നടത്തി ജലനിരപ്പ് ഉയർത്തുന്നതിന് മുൻഗണന നൽകുമെന്നും നയപ്രഖ്യാപനത്തിൽ പറയുന്നു. നിയമസഭയിലെ നയപ്രഖ്യാപന പ്രസംഗത്തിന്റെ മറ്റ് പ്രധാന വശങ്ങൾ: * പ്രസംഗക്രമം: തമിഴ് തായ് വാഴ്ത്ത് ആലപിച്ചാണ് നടപടികൾ ആരംഭിച്ചത്.

തുടർന്ന് ദേശീയഗാനം ആലപിച്ചെങ്കിലും വന്ദേമാതരം ഒഴിവാക്കി.
* രാഷ്ട്രീയ നിലപാട്: ജാതിക്കും മതത്തിനും പണത്തിനും അതീതമായ പാർട്ടിയാണ് ടിവികെ എന്ന് പ്രഖ്യാപിച്ച സർക്കാർ, പെരിയാർ, അണ്ണാദുരൈ, അംബേദ്കർ എന്നിവരുടെ സംഭാവനകളെ പ്രസംഗത്തിൽ അനുസ്മരിച്ചു.
* മുൻ സർക്കാരിനെതിരെയുള്ള വിമർശനം: സംസ്ഥാനത്ത് ലഹരിമരുന്ന് ഒഴുക്ക് തടയുന്നതിൽ മുൻ സർക്കാർ പരാജയപ്പെട്ടുവെന്നും, വർദ്ധിച്ചുവരുന്ന കുറ്റകൃത്യങ്ങൾക്ക് ഇതാണ് കാരണമെന്നും നയപ്രഖ്യാപനത്തിൽ കുറ്റപ്പെടുത്തുന്നു.
* വിദ്യാഭ്യാസ നയം: ദ്വിഭാഷാ നയം തുടരുമെന്നും, ദേശീയ വിദ്യാഭ്യാസ നയത്തെ ശക്തമായി എതിർക്കുമെന്നും സർക്കാർ വ്യക്തമാക്കി. സംസ്ഥാനത്തെ ബാധിക്കുന്ന വിഷയങ്ങളിൽ ദ്രാവിഡ പാർട്ടികളുടെ പരമ്പരാഗത നിലപാടുകളോട് ചേർന്നുനിൽക്കുന്ന സമീപനമാണ് ടിവികെ സ്വീകരിക്കുന്നതെന്ന് നയപ്രഖ്യാപനം വ്യക്തമാക്കുന്നു.