തിരുവനന്തപുരം വിമാനത്താവളത്തിന്റെ വികസനം: 2,500 കോടി രൂപയുടെ പുതിയ രാജ്യാന്തര ടെർമിനലിന് ഒക്ടോബർ 15ന് തറക്കല്ലിടും

അദാനി എയർപോർട്ട്‌സിന്റെ നിയന്ത്രണത്തിൽ അഞ്ച് വർഷത്തെ വിജയകരമായ പ്രവർത്തനവും അടിസ്ഥാനസൗകര്യ വികസനവും പൂർത്തിയാക്കിയ തിരുവനന്തപുരം രാജ്യാന്തര വിമാനത്താവളം പുതിയ ചരിത്രത്തിലേക്ക്. പ്രോജക്ട് അനന്തയുടെ ഭാഗമായി ആസൂത്രണം ചെയ്തിരിക്കുന്ന 2,500 കോടി രൂപ ചെലവിലുള്ള പുതിയ രാജ്യാന്തര ടെർമിനൽ വികസന പദ്ധതിക്ക് ഒക്ടോബർ 15ന് തറക്കല്ലിടും.

ഏകദേശം 92,552 ചതുരശ്ര മീറ്റർ വിസ്തൃതിയിൽ യാഥാർത്ഥ്യമാകുന്ന ഈ പദ്ധതി പൂർത്തിയാകുന്നതോടെ, വിമാനത്താവളത്തിന്റെ വാർഷിക യാത്രാശേഷി നിലവിലെ 35 ലക്ഷത്തിൽ നിന്ന് 1.15 കോടിയായി ഉയരും. അത്യാധുനിക ചെക്ക്-ഇൻ സംവിധാനങ്ങൾ, വിപുലീകരിച്ച ഇമിഗ്രേഷൻ കൗണ്ടറുകൾ, പുതിയ ബാഗേജ് കൈകാര്യ സംവിധാനങ്ങൾ, കൂടുതൽ റീട്ടെയിൽ ഔട്ട്‌ലെറ്റുകൾ, ഡ്യൂട്ടി ഫ്രീ ഷോപ്പുകൾ എന്നിവ പദ്ധതിയുടെ പ്രധാന പ്രത്യേകതകളാണ്.

അഞ്ച് വർഷത്തെ ശ്രദ്ധേയമായ വളർച്ച
കഴിഞ്ഞ അഞ്ച് വർഷത്തിനിടെ വിമാനത്താവളത്തിന്റെ പ്രവർത്തനങ്ങളിൽ വൻ കുതിച്ചുചാട്ടമാണുണ്ടായത്. പ്രതിദിന വിമാന സർവീസുകളുടെ എണ്ണം 45ൽ നിന്ന് 90 ആയി ഇരട്ടിയായി വർധിച്ചു.

പ്രതിദിന യാത്രക്കാരുടെ എണ്ണം 5,500ൽ നിന്ന് ഏകദേശം 15,000 ആയും ഉയർന്നിട്ടുണ്ട്. സർവീസ് നടത്തുന്ന വിമാനക്കമ്പനികളുടെ എണ്ണം 11ൽ നിന്ന് 17 ആയി ഉയർന്നു.

2025–26 സാമ്പത്തിക വർഷത്തിൽ മാത്രം 47 ലക്ഷം യാത്രക്കാരെയും 31,366 വിമാന സർവീസുകളെയുമാണ് വിമാനത്താവളം വിജയകരമായി കൈകാര്യം ചെയ്തത്. നിലവിൽ 14 രാജ്യാന്തര, 8 ആഭ്യന്തര ലക്ഷ്യസ്ഥാനങ്ങളിലേക്ക് ഇവിടെനിന്നും നേരിട്ടുള്ള കണക്റ്റിവിറ്റി ലഭ്യമാണ്.

യാത്രക്കാർക്കായി മെച്ചപ്പെട്ട സൗകര്യങ്ങൾ
ഡിജി യാത്ര സംവിധാനം, ഇ-ഗേറ്റുകൾ, ഫാസ്റ്റ്-ട്രാക്ക് ഇമിഗ്രേഷൻ, ആധുനിക ചെക്ക്-ഇൻ കൗണ്ടറുകൾ, ഉഡാൻ കഫെ തുടങ്ങിയ സൗകര്യങ്ങൾ ഏർപ്പെടുത്തിയത് വഴി യാത്രാനുഭവം കൂടുതൽ സുഗമമാക്കി മാറ്റാൻ സാധിച്ചിട്ടുണ്ട്.

സേവന മികവിന്റെ അടിസ്ഥാനത്തിൽ നിരവധി രാജ്യാന്തര അംഗീകാരങ്ങളും ഇതിനോടകം വിമാനത്താവളത്തെ തേടിയെത്തിയിട്ടുണ്ട്. സുരക്ഷയിലും സുസ്ഥിര വികസനത്തിലും പുതിയ മുന്നേറ്റം
നൂതന ക്രാഷ് ഫയർ ടെൻഡറുകൾ ഉൾപ്പെടെയുള്ള അത്യാധുനിക സംവിധാനങ്ങൾ ഏർപ്പെടുത്തി അടിയന്തര പ്രതികരണ ശേഷി ഗണ്യമായി വർധിപ്പിച്ചു.

മാലിന്യ സംസ്‌കരണത്തിലും പരിസ്ഥിതി സൗഹൃദ പ്രവർത്തനങ്ങളിലും മാതൃകാപരമായ നേട്ടങ്ങൾ കൈവരിച്ച ഈ വിമാനത്താവളം, സീറോ വേസ്റ്റ് ടു ലാൻഡ്‌ഫിൽ സർട്ടിഫിക്കേഷൻ കരസ്ഥമാക്കുന്ന ഇന്ത്യയിലെ ആദ്യത്തെ വിമാനത്താവളമെന്ന പദവിയും നേടിയിട്ടുണ്ട്. ഏകദേശം 8,700 കോടി രൂപയുടെ മൊത്തത്തിലുള്ള നിക്ഷേപം ലക്ഷ്യമിടുന്ന പ്രോജക്ട് അനന്തയുടെ ഭാഗമായുള്ള പുതിയ ടെർമിനൽ നിർമ്മാണം, തിരുവനന്തപുരത്തെ ഭാവികാല വളർച്ചയ്ക്ക് അനുയോജ്യമായ ആധുനിക വ്യോമയാന ഹബ്ബായി മാറ്റുന്നതിനുള്ള സുപ്രധാന ചുവടുവയ്പ്പാണ്.