പെട്രോൾ വില 5 രൂപയും ഡീസൽ വില 3 രൂപയും വർധിപ്പിച്ച് നയാര എനർജി

ഇന്ധന വിലയിൽ വർധനവുമായി രാജ്യത്തെ പ്രമുഖ സ്വകാര്യ എണ്ണവിതരണ കമ്പനിയായ നയാര എനർജി രംഗത്ത്. പെട്രോളിന് ലീറ്ററിന് 5 രൂപയും ഡീസലിന് ലീറ്ററിന് 3 രൂപയുമാണ് കമ്പനി ഉയർത്തിയത്.

അന്താരാഷ്ട്ര വിപണിയിലെ ക്രൂഡോയിൽ വിലക്കയറ്റത്തെ തുടർന്നുണ്ടായ പ്രവർത്തനനഷ്ടം ലഘൂകരിക്കുന്നതിന്റെ ഭാഗമായാണ് ഈ നിർണായക തീരുമാനം. പുതുക്കിയ നിരക്കുകൾ ഇതിനോടകം തന്നെ പ്രാബല്യത്തിൽ വന്നിട്ടുണ്ട്.

രാജ്യവ്യാപകമായി 7,108 പെട്രോൾ പമ്പുകളാണ് നയാര എനർജിക്കുള്ളത്. കഴിഞ്ഞ മാർച്ചിലും കമ്പനി സമാന രീതിയിൽ പെട്രോളിന് 5 രൂപയും ഡീസലിന് 3 രൂപയും വർധിപ്പിച്ചിരുന്നു.

പശ്ചിമേഷ്യൻ മേഖലയിലെ സംഘർഷങ്ങളെ തുടർന്നുണ്ടായ അസംസ്കൃത എണ്ണ വിലക്കയറ്റത്തിന്റെ സാമ്പത്തിക ഭാരം ഉപഭോക്താക്കളിലേക്ക് ആദ്യം കൈമാറിയത് നയാരയായിരുന്നു. ഇതിന് പിന്നാലെ പൊതുമേഖലാ എണ്ണക്കമ്പനികളും വില വർധനവ് നടപ്പിലാക്കുകയുണ്ടായി.

കഴിഞ്ഞ മേയ് മാസത്തിൽ പൊതുമേഖലാ കമ്പനികൾ പെട്രോൾ, ഡീസൽ വിലകളിൽ ശരാശരി ഏഴര രൂപയുടെ വർധനവാണ് വരുത്തിയത്. എങ്കിലും, പിന്നീട് ജൂലൈ ഒന്നിന് നയാര എനർജി പെട്രോൾ വില ലീറ്ററിന് 5 രൂപയും ഡീസൽ വില ലീറ്ററിന് 3 രൂപയും കുറച്ചിരുന്നു.

നിലവിൽ ഇന്ത്യയിലെ മൊത്തം ഇന്ധനവ്യാപാരത്തിന്റെ വലിയൊരു ഭാഗവും പൊതുമേഖലാ സ്ഥാപനങ്ങളുടെ നിയന്ത്രണത്തിലാണ്. രാജ്യത്തെ ആകെ 1.04 ലക്ഷം പെട്രോൾ പമ്പുകളിൽ 90 ശതമാനവും ഇന്ത്യൻ ഓയിൽ കോർപ്പറേഷൻ (ഐഒസി), ഭാരത് പെട്രോളിയം കോർപ്പറേഷൻ (ബിപിസിഎൽ), ഹിന്ദുസ്ഥാൻ പെട്രോളിയം കോർപ്പറേഷൻ (എച്ച്പിസിഎൽ) എന്നീ പൊതുമേഖലാ എണ്ണക്കമ്പനികളുടെ കീഴിലാണ് പ്രവർത്തിക്കുന്നത്.

അതിനിടെ, പൊതുമേഖലാ കമ്പനികൾ പെട്രോളിന് ലീറ്ററിന് 8 രൂപയുടെയും ഡീസലിന് ലീറ്ററിന് 9 രൂപയുടെയും കനത്ത നഷ്ടമാണ് നേരിടുന്നതെന്ന് പ്രമുഖ റേറ്റിങ് ഏജൻസിയായ ഇക്ര കഴിഞ്ഞദിവസം പുറത്തുവിട്ട റിപ്പോർട്ടിൽ വ്യക്തമാക്കിയിരുന്നു.

പെട്രോൾ, ഡീസൽ, എൽപിജി എന്നിവയുടെ വിപണനത്തിലൂടെമാത്രം കമ്പനികൾക്ക് പ്രതിദിനം 530 കോടി രൂപയുടെ നഷ്ടം സംഭവിച്ചതായും ഇക്ര ചൂണ്ടിക്കാണിക്കുന്നു. നിലവിലെ തിരുവനന്തപുരത്തെ ഇന്ത്യൻ ഓയിൽ ഇന്ധനവില:
∙ പെട്രോൾ : 115.49 രൂപ
∙ ഡീസൽ : 104.40 രൂപ