സ്കൂൾ കാലഘട്ടത്തിൽ സമ്മാനമായി ലഭിച്ച ഒരു ചെറിയ കളിപ്പാട്ടത്തിൽ നിന്നുണ്ടായ പ്രചോദനത്തിൽ നിന്നാണ് കോടികൾ വിലമതിക്കുന്ന ലംബോർഗിനി കാറിന്റെ മാതൃക യാഥാർത്ഥ്യമാക്കിയത്. താമരക്കുളം ചത്തിയറ ആതിരയിൽ ആരോമൽ ഉണ്ണി (24) ആണ് തന്റെ ഏറെക്കാലത്തെ സ്വപ്ന പദ്ധതിക്ക് രൂപം നൽകിയിരിക്കുന്നത്.
ഫോഡ് ഐക്കൺ 1.3 ലീറ്റർ പെട്രോൾ എൻജിൻ ഘടിപ്പിച്ചിട്ടുള്ള ഈ വാഹനത്തിന്റെ നിർമാണത്തിനായി ത്രീ ഡി പ്രിന്റിങ് ഉൾപ്പെടെയുള്ള അത്യാധുനിക സാങ്കേതിക വിദ്യകളാണ് ഉപയോഗപ്പെടുത്തിയിട്ടുള്ളതെന്ന് അദ്ദേഹം വ്യക്തമാക്കുന്നു. പത്താം ക്ലാസ് പരീക്ഷ എഴുതാൻ പോകുന്ന വഴിയ്ക്ക് അടുത്തുള്ള ഒരു കടയിൽ വെച്ചാണ് റിമോട്ട് കൺട്രോളിൽ പ്രവർത്തിക്കുന്ന ലംബോർഗിനി കാറിന്റെ മാതൃക ആദ്യമായി കാണുന്നത്.
തുടർന്ന് അമ്മയോടൊപ്പം എത്തി ആ കളിപ്പാട്ടം വാങ്ങി നൽകിയ നിമിഷം മുതൽ മനസ്സിൽ ഉടലെടുത്ത ആഗ്രഹമാണ് വർഷങ്ങൾക്ക് ശേഷം ഇപ്പോൾ പൂർത്തീകരിക്കപ്പെട്ടിരിക്കുന്നത്. ആദ്യഘട്ടത്തിൽ ഒരു ജീപ്പാണ് നിർമിച്ചത്.
റിമോട്ട് കൺട്രോൾ ഉപയോഗിച്ച് ഡ്രൈവറുടെ സഹായമില്ലാതെ സഞ്ചരിക്കുന്നതായിരുന്നു അത്. പിന്നീട് സാങ്കേതികവിദ്യ വികസിപ്പിച്ച് മൊബൈൽ ഫോൺ വഴി നിയന്ത്രിക്കാൻ കഴിയുന്ന രീതിയിലേക്ക് മാറ്റുകയായിരുന്നു.
ഈ മുൻകാല അനുഭവങ്ങളുടെയും ആത്മവിശ്വാസത്തിന്റെയും പുറത്താണ് 2021ൽ ലംബോർഗിനി കാറിന്റെ മാതൃക നിർമിക്കാനുള്ള പ്രവർത്തനങ്ങൾക്ക് തുടക്കമിട്ടത്. എൻജിനീയറിങ് കോഴ്സിന് പ്രവേശനം നേടുന്നതിന് മുൻപ് തന്നെ നിർമാണ ജോലികൾ ആരംഭിച്ചിരുന്നു.
കുടുംബാംഗങ്ങളുടെ പൂർണ്ണ പിന്തുണയും ഈ ഉദ്യമത്തിന് ഒപ്പമുണ്ടായിരുന്നു. പുതിയ മോൾഡ് തയാറാക്കിയാണ് ലംബോർഗിനിയുടെ കൃത്യമായ രൂപം രൂപപ്പെടുത്തിയത്.
ഫൈബർ ഗ്ലാസ് ബോഡിയും ലാമിനേറ്റഡ് ഗ്ലാസ് വിൻഡ് സ്ക്രീനും ഉൾപ്പെടെയുള്ള ഘടകങ്ങൾ ചേർത്ത് ഏകദേശം 13 ലക്ഷം രൂപ ചെലവിലാണ് നാല് വർഷം കൊണ്ട് കാറിന്റെ നിർമാണം പൂർത്തിയാക്കിയത്. എന്നാൽ, പൊതുനിരത്തുകളിൽ ഓടിക്കാൻ മോട്ടർ വാഹന വകുപ്പിന്റെ നിയമങ്ങൾ അനുവദിക്കാത്തതിനാൽ ഈ സ്വപ്നതുല്യമായ വാഹനം നിലവിൽ വീടിന്റെ മുറ്റത്ത് തന്നെയാണ് പാർക്ക് ചെയ്തിരിക്കുന്നത്.
എങ്കിലും വീട്ടിലെത്തുന്ന സന്ദർശകർക്കായി മുറ്റത്ത് വാഹനം ഓടിച്ച് കാണിക്കാറുണ്ട് ആരോമൽ.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
