തമിഴ്നാട് സർക്കാരിന്റെ പേരിൽ വ്യാജ വാഗ്ദാനം; പകർച്ചവ്യാധി തടയാൻ മൊട്ടയടിച്ച 3 സ്ത്രീകൾ കബളിപ്പിക്കപ്പെട്ടു

മുടിയിലൂടെ പകരുന്ന പകർച്ചവ്യാധി പ്രതിരോധിക്കുന്നതിന്റെ ഭാഗമായി തല മൊട്ടയടിക്കുന്ന സ്ത്രീകൾക്ക് 15,000 രൂപ വീതം സാമ്പത്തിക സഹായം നൽകുമെന്ന വ്യാജേന വലിയ തട്ടിപ്പ് അരങ്ങേറി. ചെന്നൈയിലാണ് സംഭവം റിപ്പോർട്ട് ചെയ്തിരിക്കുന്നത്.

സർക്കാർ ഉദ്യോഗസ്ഥൻ ചമഞ്ഞാണ് തട്ടിപ്പുകാർ സ്ത്രീകളെ ഫോണിൽ ബന്ധപ്പെട്ട് കബളിപ്പിച്ചത്. ഈ വ്യാജ വാഗ്ദാനം പൂർണ്ണമായും വിശ്വസിച്ച് തമിഴ്നാട്ടിലെ സേലം ജില്ലയിൽ നിന്നുള്ള 3 സ്ത്രീകൾ തങ്ങളുടെ തല മൊട്ടയടിക്കുകയായിരുന്നു.

ഫോണിൽ വിളിച്ച വ്യക്തി ഇരകളുടെ കുടുംബാംഗങ്ങളുടെ പേരുവിവരങ്ങൾ കൃത്യമായി പറഞ്ഞു മനസ്സിലാക്കി വിശ്വാസ്യത നേടിയെടുത്ത ശേഷമാണ് സർക്കാരിന്റെ ഈ പുതിയ പദ്ധതിയെക്കുറിച്ച് വിശദീകരിച്ചത്. കോവിഡിന് സമാനമായ ഒരു പകർച്ചവ്യാധി മുടിയിലൂടെ വേഗത്തിൽ പടരുന്നുണ്ടെന്നും, ഈ രോഗബാധ തടയാൻ എത്രയും പെട്ടെന്ന് മൊട്ടയടിക്കേണ്ടതാണെന്നും ഇയാൾ വിശ്വസിപ്പിച്ചു.

മൊട്ടയടിക്കുന്ന സ്ത്രീകൾക്ക് തമിഴ്‌നാട് സർക്കാർ 15,000 രൂപയും, വിദ്യാർത്ഥികൾക്ക് 45,000 രൂപയും ഒരു ലാപ്ടോപ്പും നൽകുമെന്നുമായിരുന്നു വാഗ്ദാനം. കൂടാതെ, വീടുകളിലെ പുരുഷന്മാർ തല മൊട്ടയടിക്കുകയാണെങ്കിൽ അവർക്ക് തലയൊന്നിന് 60,000 രൂപ വീതം നൽകുമെന്നും തട്ടിപ്പുകാരൻ വാഗ്ദാനം ചെയ്തു.

അടുത്ത ദിവസം തന്നെ സർക്കാർ ഉദ്യോഗസ്ഥൻ ഗ്രാമത്തിൽ നേരിട്ടെത്തുമെന്നും മൊട്ടയടിച്ചവർക്ക് മാത്രമായി പണം വിതരണം ചെയ്യുമെന്നുമാണ് ഫോണിൽ വിളിച്ചയാൾ സ്ത്രീകളെ അറിയിച്ചിരുന്നത്. എന്നാൽ, പറഞ്ഞതുപോലെ 3 സ്ത്രീകൾ തല മൊട്ടയടിച്ചതിന് ശേഷം ഇയാളെ തിരിച്ച് ബന്ധപ്പെടാൻ ശ്രമിച്ചെങ്കിലും ഫോൺ സ്വിച്ച് ഓഫ് ചെയ്ത നിലയിലായിരുന്നുവെന്ന് റിപ്പോർട്ടുകൾ വ്യക്തമാക്കുന്നു.