ഹോർമുസ് നിയന്ത്രണത്തിൽ ഇറാൻ-ഒമാൻ ധാരണ; എണ്ണവില ഇടിഞ്ഞു, നിർണായക നീക്കവുമായി ഖത്തറും

അമേരിക്കയെ നോക്കുകുത്തിയാക്കി ഹോർമുസ് കടലിടുക്കിന്റെ നിയന്ത്രണവും വരുമാനവും പരസ്പരം പങ്കുവെക്കുന്നതുമായി ബന്ധപ്പെട്ട് ഇറാനും ഒമാനും തമ്മിൽ സുപ്രധാന ധാരണയായി. ഇറാന്റെ ഇസ്ലാമിക് റവല്യൂഷനറി ഗാർഡ് കോർ (ഐആർജിസി) ആണ് ഈ വിവരം പുറത്തുവിട്ടത്.

ഏകദേശം ഒരു മാസത്തോളം നീണ്ടുനിന്ന ചർച്ചകൾക്കൊടുവിലാണ് ഇരു രാജ്യങ്ങളും തമ്മിൽ ഈ കരാറിലെത്തിയത്. ഈ കടലിടുക്ക് വഴി ഗൾഫ് മേഖലയിൽ നിന്നുള്ള എണ്ണയുമായി സഞ്ചരിക്കുന്ന കപ്പലുകളുടെ ഗതാഗതം വർധിച്ചതോടെ ആഗോള വിപണിയിൽ ക്രൂഡോയിൽ വില ഗണ്യമായി കുറയുന്നതിനും ഇത് കാരണമായിട്ടുണ്ട്.

ഹോർമുസ് കടലിടുക്കിലെ പ്രതിസന്ധികൾക്ക് അയവു വരുന്നത് ആഗോള സമ്പദ്‍വ്യവസ്ഥയ്ക്ക് വലിയ ആശ്വാസമാണ് പകരുന്നത്. സ്വന്തം ആവശ്യത്തിനുള്ള എണ്ണയുടെ 90 ശതമാനവും ഇറക്കുമതി ചെയ്യുന്ന രാജ്യമായ ഇന്ത്യയെ സംബന്ധിച്ചിടത്തോളം ഇത് വളരെ അനുകൂലമായ സാഹചര്യമാണ്.

എന്നാൽ, ഈ ധാരണ യാഥാർത്ഥ്യമാകണമെങ്കിൽ അമേരിക്കയുടെ കൂടി അനുമതിയും അംഗീകാരവും ആവശ്യമാണ്. ഒരുപക്ഷേ ഈ കരാർ യുഎസ് തള്ളിക്കളഞ്ഞാൽ സ്ഥിതിഗതികൾ കൂടുതൽ സങ്കീർണ്ണമാകും.

മേഖലയിലെ സമാധാനശ്രമങ്ങൾക്ക് അമേരിക്കയാണ് തുരങ്കം വെക്കുന്നതെന്ന ഗുരുതര ആരോപണവുമായി ഇറാൻ ഇതിനോടകം തന്നെ രംഗത്തു വന്നിട്ടുണ്ട്. ഇറാനുമായി കൂടുതൽ മെച്ചപ്പെട്ട

ധാരണകളിലേക്ക് ഒമാൻ നീങ്ങുകയാണെങ്കിൽ ആ രാജ്യത്തിന് നേരെയും ആക്രമണം ഉണ്ടായേക്കാമെന്ന് മുൻപ് ഡൊണാൾഡ് ട്രംപ് മുന്നറിയിപ്പ് നൽകിയിരുന്നു. സമാധാനപരമായ നീക്കങ്ങൾക്ക് തടസ്സം നിൽക്കുന്ന സമീപനം അമേരിക്ക തിരുത്താൻ തയാറാണെങ്കിൽ, ഒമാനുമായുള്ള കരാറിന്റെ അടിസ്ഥാനത്തിൽ ഹോർമുസ് പാത തുറന്നു കൊടുക്കാൻ ഇറാൻ സന്നദ്ധമാണെന്ന് ഐആർജിസി വക്താവ് ഹൊസൈൻ മൊഹബ്ബി വ്യക്തമാക്കി.

കഴിഞ്ഞ ആഴ്ച ബാരലിന് 94 ഡോളറിന് മുകളിലുണ്ടായിരുന്ന ബ്രെന്റ് ക്രൂഡ് വില ഇതോടെ 87.27 ഡോളറിലേക്ക് കൂപ്പുകുത്തി. ഡബ്ല്യുടിഐ ക്രൂഡ് വിലയാകട്ടെ 81.62 ഡോളറിലേക്കും താഴ്ന്നു.

ഇറാനും അമേരിക്കയും തമ്മിലുള്ള 60 ദിവസത്തെ വെടിനിർത്തൽ കാലാവധി അവസാനിച്ചെങ്കിലും ഇരുപക്ഷവും തമ്മിൽ പുതിയ സംഘർഷങ്ങളിലേക്ക് കടന്നിട്ടില്ല. ഇനി അങ്ങോട്ട് ആദ്യ ആക്രമണം തന്റെ ഭാഗത്തുനിന്ന് ഉണ്ടാകില്ലെന്ന് അമേരിക്കയും വ്യക്തമാക്കിയിട്ടുണ്ട്.

എങ്കിലും, ഹോർമുസ് പാതയിലൂടെയുള്ള ചില വാണിജ്യ കപ്പലുകൾക്ക് നേരെ ഇനിയും ആക്രമണങ്ങൾ നടക്കുന്നുണ്ടെന്ന റിപ്പോർട്ടുകൾ പുറത്തുവരുന്നുണ്ട്. മാത്രമല്ല, ഹോർമുസ് പാത ഒഴിവാക്കി ‘ഷിപ്പ്-ടു-ഷിപ്പ്’ രീതിയിൽ ചരക്കുനീക്കം നടത്തിയ 45 കപ്പലുകളെ ഇറാൻ കഴിഞ്ഞ ദിവസം കരിമ്പട്ടികയിൽ ഉൾപ്പെടുത്തിയത് ആശങ്ക വർധിപ്പിക്കുന്നുണ്ട്.

ഈ കപ്പലുകളെ പല പ്രമുഖ ഷിപ്പിങ് കമ്പനികളും നിലവിൽ ചരക്കുനീക്കത്തിൽ നിന്ന് ഒഴിവാക്കിയിട്ടുണ്ട്. ഇറാനുമായി ഇപ്പോൾ യാതൊരുവിധത്തിലുള്ള ധൃതിപിടിച്ച ചർച്ചകൾക്കും താൻ തയ്യാറല്ലെന്ന നിലപാടിലാണ് യുഎസ് പ്രസിഡന്റ് ഡൊണാൾഡ് ട്രംപ്.

ഇറാൻ ഇപ്പോഴും ഒരു കരാറിന് പാകപ്പെട്ടിട്ടില്ലെന്നാണ് അദ്ദേഹത്തിന്റെ വിലയിരുത്തൽ. എന്നാൽ, ഈ പ്രശ്നത്തിന് ശാശ്വതമായ ഒരു പരിഹാരം ലക്ഷ്യമിട്ട് ഖത്തർ സജീവമായി രംഗത്തുണ്ട്.

ഇതുമായി ബന്ധപ്പെട്ട ചർച്ചകൾക്കായി ഖത്തർ പ്രധാനമന്ത്രി ഷെയ്ഖ് മൊഹമ്മദ് ബിൻ അബ്ദുൽറഹ്മാൻ അൽ താനി ടെഹ്റാനിൽ എത്തുന്ന വിവരം ഖത്തർ വിദേശകാര്യ മന്ത്രാലയമാണ് എക്സ് പ്ലാറ്റ്‌ഫോമിലൂടെ അറിയിച്ചത്.

മറുവശത്ത്, സാമ്പത്തിക മാന്ദ്യത്തിൽ പെട്ട് ഉഴലുന്ന ചൈനയ്ക്ക് കനത്ത തിരിച്ചടിയാണ് പുതിയ കണക്കുകൾ നൽകുന്നത്. ജൂലൈ മാസത്തിൽ രാജ്യത്തെ വ്യാവസായിക ഉൽപാദന വളർച്ച 11.2% മാത്രമാണെന്ന് നാഷണൽ ബ്യൂറോ ഓഫ് സ്റ്റാറ്റിസ്റ്റിക്സ് വ്യക്തമാക്കി.

കഴിഞ്ഞ ഏഴ് മാസത്തിനിടയിലെ ഏറ്റവും മോശം പ്രകടനമാണിത്. ഉപഭോക്തൃ വിപണി നേരിടുന്ന തളർച്ചയും പശ്ചിമേഷ്യൻ പ്രതിസന്ധിയെത്തുടർന്ന് ഊർജ ഉൽപ്പന്നങ്ങളുടെ വിലയിലുണ്ടായ വർദ്ധനവുമാണ് ചൈനയെ പ്രതിസന്ധിയിലാക്കുന്നത്.

സാമ്പത്തിക പ്രയാസങ്ങൾ കാരണം ജനങ്ങൾ പണം ചെലവഴിക്കാൻ മടിക്കുന്നത് കമ്പനികളുടെ ഉൽപാദന വളർച്ചയെയും സാരമായി ബാധിക്കുന്നുണ്ട്. ലോകത്തിലെ രണ്ടാമത്തെ വലിയ സമ്പദ്‍വ്യവസ്ഥയായ ചൈനയുടെ ജിഡിപി വളർച്ച കഴിഞ്ഞ പാദത്തിൽ മൂന്ന് വർഷത്തെ ഏറ്റവും താഴ്ന്ന നിലയിലേക്കാണ് എത്തിയിരുന്നത്.

അമേരിക്കയിലെ കഴിഞ്ഞ മാസത്തെ (ജൂലൈ) പണപ്പെരുപ്പം ജൂണിനെ അപേക്ഷിച്ച് നേരിയ തോതിൽ ഉയർന്ന് 3.7 ശതമാനമായി മാറിയിട്ടുണ്ട്. ഇതേത്തുടർന്ന് രാജ്യത്തെ കേന്ദ്രബാങ്കായ ഫെഡറൽ റിസർവ് അടിസ്ഥാന പലിശനിരക്കുകൾ ഇനിയും വർദ്ധിപ്പിച്ചേക്കുമെന്ന നിരീക്ഷണം ശക്തമാണ്.

യുഎസ് ഓഹരി വിപണികൾ ചെറിയ തോതിൽ നഷ്ടം നേരിട്ടെങ്കിലും ഫ്യൂച്ചേഴ്സ് വിപണികൾ മികച്ച നേട്ടത്തിലാണ്. പ്രമുഖ ചിപ് നിർമ്മാതാക്കളായ എൻവിഡിയ തങ്ങളുടെ ജൂൺ പാദത്തിലെ പ്രവർത്തനഫലം പ്രതീക്ഷകളെയും കടത്തിവെട്ടുന്ന രീതിയിൽ പുറത്തുവിട്ടതാണ് വിപണിക്ക് കരുത്തായത്.

ഡൗ ജോൺസ് 0.5%, നാസ്ഡാക് 1.07%, എസ് ആൻഡ് പി 500 ഫ്യൂച്ചേഴ്സ് സൂചിക 0.6% എന്നിങ്ങനെയാണ് ഉയർന്നത്. ഏഷ്യൻ വിപണിയിൽ ജാപ്പനീസ് നിക്കേയ് 0.14% ഉയർച്ച രേഖപ്പെടുത്തിയപ്പോൾ ഷാങ്ഹായ് വിപണി 0.21 ശതമാനവും നേട്ടമുണ്ടാക്കി.

മറ്റ് പ്രധാന ഓഹരി സൂചികകൾ നഷ്ടത്തിലാണ് വ്യാപാരം അവസാനിപ്പിച്ചത്. ഫെഡറൽ റിസർവ് ചെയർമാൻ കെവിൻ വാർഷ് ഈയാഴ്ച നടത്താനിരിക്കുന്ന ജാക്സൺ ഹോൾ സിംപോസിയത്തിലെ പ്രഭാഷണത്തിലാണ് ഇപ്പോൾ ആഗോള വിപണിയുടെ മുഴുവൻ കണ്ണുകളും.

പണപ്പെരുപ്പം, പലിശനിരക്കുകൾ എന്നിവയുടെ ഭാവി ഗതിയെക്കുറിച്ചുള്ള നിർണായക സൂചനകൾ അദ്ദേഹം തന്റെ പ്രസംഗത്തിൽ നൽകുമെന്നാണ് പ്രതീക്ഷിക്കുന്നത്. ഹോർമുസ് കടലിടുക്കിൽ സമാധാനാന്തരീക്ഷം രൂപപ്പെടുന്നുണ്ടെങ്കിലും അതീവ ജാഗ്രതയോടെയാണ് ഇന്ത്യൻ വിപണികൾ ഇന്ന് നീങ്ങാൻ സാധ്യതയുള്ളത്.

ഗിഫ്റ്റ് നിഫ്റ്റി രാവിലെ ഏകദേശം 30 പോയിന്റോളം (-0.16%) താഴ്ന്ന നിലയിലാണ് കാണപ്പെടുന്നത്. സെൻസെക്സും നിഫ്റ്റിയും ഇന്ന് ചെറിയ നഷ്ടത്തോടെയാകും വ്യാപാരം ആരംഭിക്കുക.

അതിനിടയിൽ, രാജ്യാന്തര വിപണിയിൽ സ്വർണവില ഔൺസിന് 4586 ഡോളറിൽ നിന്ന് 4642 ഡോളർ വരെ ഉയർന്ന ശേഷം നിലവിൽ 4623 ഡോളറിലാണ് വ്യാപാരം നടക്കുന്നത്. യുഎസ് ഫെഡറൽ റിസർവ് ചെയർമാൻ കെവിൻ വാർഷ് ഈയാഴ്ച നടത്തുന്ന പ്രഭാഷണം തന്നെയാണ് സ്വർണവിപണിയുടെയും ഭാവി പ്രധാനമായും നിർണ്ണയിക്കുക.

അമേരിക്കയിൽ പണപ്പെരുപ്പം വർദ്ധിച്ചത് സ്വർണത്തിന് താൽക്കാലികമായി തിരിച്ചടിയാകാൻ സാധ്യതയുണ്ട്. പലിശനിരക്കുകൾ ഉയർന്നാൽ അത് ഡോളറിനെ കൂടുതൽ ശക്തമാക്കുകയും, ഇത് സ്വർണത്തിലുള്ള നിക്ഷേപ താൽപ്പര്യത്തെ ബാധിക്കുകയും വില താഴുന്നതിന് കാരണമാവുകയും ചെയ്യും.