പണപ്പെരുപ്പം: റിപ്പോ നിരക്ക് ഉയർത്താൻ ആർബിഐ നീക്കം; തിരിച്ചടവ് ഭാരം വർധിച്ചേക്കും

രാജ്യത്ത് തുടരുന്ന ഇന്ധന വിലവർധനവും അനുബന്ധ സാമ്പത്തിക പ്രതിസന്ധികളും പരിഹരിക്കുന്നതിനായി റിപ്പോ നിരക്ക് ഉയർത്താൻ റിസർവ് ബാങ്ക് ഓഫ് ഇന്ത്യ (ആർബിഐ) ആലോചിക്കുന്നു. പണപ്പെരുപ്പം നിയന്ത്രിക്കുന്നതിന്റെ ഭാഗമായി ജൂൺ 3 മുതൽ 5 വരെ നടക്കുന്ന പണനയ യോഗത്തിൽ ഇതുസംബന്ധിച്ച നിർണ്ണായക തീരുമാനമുണ്ടാകും.

യുഎസ്-ഇറാൻ സംഘർഷത്തെത്തുടർന്ന് വർധിച്ച ഇറക്കുമതി ചെലവും വിദേശനാണ്യ ശേഖരത്തിലുണ്ടായ ഇടിവും രാജ്യത്തിന്റെ സാമ്പത്തിക ഭദ്രതയ്ക്ക് വെല്ലുവിളിയായിരിക്കുകയാണ്. അമേരിക്കൻ ഡോളറിനെ അപേക്ഷിച്ച് ഇന്ത്യൻ രൂപയുടെ മൂല്യം 97 എന്ന നിലയിലേക്ക് താഴ്ന്നത് ആർബിഐയ്ക്ക് കടുത്ത പ്രതിസന്ധിയാണ് സൃഷ്ടിച്ചിരിക്കുന്നത്.

നിലവിൽ 5.25 ശതമാനമായ റിപ്പോ നിരക്കിൽ 50 മുതൽ 75 ബിപിഎസ് (ബേസിസ് പോയിന്റ്) വരെ വർധന വരുത്താൻ സാധ്യതയുണ്ടെന്നാണ് സാമ്പത്തിക വിദഗ്ധരുടെ വിലയിരുത്തൽ. സർക്കാർ ബോണ്ടുകളുടെ ആദായ നിരക്കിലെ വർധനയും ആഗോളതലത്തിൽ നിലനിൽക്കുന്ന കർശനമായ പണനയങ്ങളും രാജ്യത്തിന്റെ നിലവിലെ സാമ്പത്തിക സാഹചര്യം കൂടുതൽ സങ്കീർണ്ണമാക്കുന്നു.

ഈ വിഷയത്തിൽ സ്റ്റാൻഡേർഡ് ചാർട്ടേർഡ് ബാങ്കിലെ സാമ്പത്തിക വിദഗ്ധരായ അനുഭൂതി സഹായ്, സൗരവ് ആനന്ദ് എന്നിവരുടെ നിരീക്ഷണം ഇങ്ങനെ: “ജൂണിലും ഓഗസ്റ്റിലും 25 ബിപിഎസ് വീതം വർധനയുണ്ടാകുമെന്നാണ് കരുതുന്നത്. ഇനി ജൂണിൽ നിരക്ക് കൂട്ടിയില്ലെങ്കിൽ ഓഗസ്റ്റിൽ 50 ബിപിഎസ് വർധിക്കും.” റിപ്പോ നിരക്കിലെ വർധന ബാങ്ക് വായ്പകളുടെ പലിശ നിരക്കുകളെ നേരിട്ട് സ്വാധീനിക്കും.

ഇത് ഭവന, വാഹന, വ്യക്തിഗത വായ്പകളുടെ പലിശ ഉയർത്തുന്നതിലൂടെ സാധാരണക്കാരുടെ പ്രതിമാസ തിരിച്ചടവ് (ഇഎംഐ) ബാധ്യത വർധിപ്പിക്കുകയോ വായ്പ കാലാവധി ദീർഘിപ്പിക്കേണ്ടി വരികയോ ചെയ്തേക്കാം. അതേസമയം, ബാങ്ക് സ്ഥിര നിക്ഷേപങ്ങൾക്ക് ഉയർന്ന പലിശ ലഭിക്കാൻ ഇത് വഴിയൊരുക്കും.

ഓഹരി വിപണിയിലും ആർബിഐയുടെ ഈ നീക്കങ്ങൾ കാര്യമായ സ്വാധീനം ചെലുത്തുമെന്ന് കരുതപ്പെടുന്നു. വിപണിയിലെ പണലഭ്യത ഉറപ്പാക്കുന്നതിനായി 500 കോടി ഡോളർ (ഏകദേശം 48,454 കോടി രൂപ) ബാങ്കിങ് സംവിധാനത്തിലേക്ക് എത്തിക്കാൻ ആർബിഐ നടപടി ആരംഭിച്ചു.

‘ഡോളർ-റുപ്പി സ്വാപ്’ ലേലത്തിലൂടെയാണ് ഈ നീക്കം. മൂന്ന് വർഷത്തെ കാലാവധിയിൽ ബാങ്കുകളിൽ നിന്ന് ഡോളർ സ്വീകരിച്ച് പകരം രൂപ ലഭ്യമാക്കുന്ന ഈ പ്രക്രിയയിലൂടെ രൂപയുടെ മൂല്യത്തകർച്ച തടയാനാകുമെന്നാണ് ആർബിഐയുടെ പ്രതീക്ഷ.