നിക്ഷേപങ്ങളിൽ വൈവിധ്യവൽക്കരണം ഉറപ്പാക്കാൻ മൾട്ടി ക്യാപ് ഫണ്ടുകൾ എങ്ങനെ സഹായിക്കുന്നു?

ഇന്ത്യയിലെ ഓഹരി വിപണിയിൽ ലിസ്റ്റ് ചെയ്യപ്പെട്ടിട്ടുള്ള കമ്പനികളെ വിപണി മൂലധനത്തിന്റെ അടിസ്ഥാനത്തിൽ പ്രധാനമായും മൂന്ന് വിഭാഗങ്ങളായാണ് തരംതിരിച്ചിരിക്കുന്നത്. ഇതിൽ ആദ്യ 100 കമ്പനികൾ ലാർജ് ക്യാപ് വിഭാഗത്തിലും, തുടർന്ന് വരുന്ന 150 കമ്പനികൾ മിഡ് ക്യാപ് വിഭാഗത്തിലും, അതിനു ശേഷമുള്ളവ സ്മോൾ ക്യാപ് വിഭാഗത്തിലുമാണ് ഉൾപ്പെടുന്നത്.

നിയമപ്രകാരം ഒരു മൾട്ടി ക്യാപ് ഫണ്ട് ഈ മൂന്ന് വിഭാഗങ്ങളിലും കുറഞ്ഞത് 25% വീതം നിക്ഷേപം നടത്തേണ്ടതുണ്ട്. അതിനാൽ നിക്ഷേപം ഏതെങ്കിലും ഒരു പ്രത്യേക വിഭാഗത്തിലേക്ക് മാത്രം അമിതമായി കേന്ദ്രീകരിക്കപ്പെടാനുള്ള സാധ്യത ഇവിടെ ഒഴിവാക്കപ്പെടുന്നു.

ഈ സവിശേഷതയാണ് ഇത്തരം ഫണ്ടുകളെ നിക്ഷേപകർക്കിടയിൽ കൂടുതൽ ആകർഷകമാക്കുന്നത്. ഉയർന്ന സ്ഥിരതയും ലിക്വിഡിറ്റിയുമുള്ള ലാർജ് ക്യാപ് ഓഹരികൾക്ക് വിപണിയിലെ ചാഞ്ചാട്ടങ്ങളെ മികച്ച രീതിയിൽ പ്രതിരോധിക്കാൻ ശേഷിയുണ്ട്.

അതേസമയം, ഉയർന്ന വളർച്ചാ സാധ്യതയുള്ളവയാണ് മിഡ്, സ്മോൾ ക്യാപ് കമ്പനികൾ. ഭാവിയിൽ വൻകിട

കമ്പനികളായി വളരാൻ സാധ്യതയുള്ളവ ഇവയിൽ ഉൾപ്പെടുമെങ്കിലും ഇവയിൽ റിസ്കും വിപണിയിലെ ചാഞ്ചാട്ടവും താരതമ്യേന കൂടുതലായിരിക്കും. ഈ മൂന്ന് വിഭാഗങ്ങളിലും ഒരേസമയം നിക്ഷേപം വിതരണം ചെയ്യുന്നതിലൂടെ നിക്ഷേപകർക്ക് മികച്ച വിപണി വൈവിധ്യവൽക്കരണം സാധ്യമാകുന്നു.

ഈ നിക്ഷേപ ശൈലിക്ക് പ്രധാനമായും രണ്ടു വശങ്ങളാണുള്ളത്. സ്മോൾ, മിഡ് ക്യാപ് ഓഹരികൾ മികച്ച പ്രകടനം കാഴ്ചവെക്കുന്ന ഘട്ടങ്ങളിൽ, ലാർജ് ക്യാപ് ഫണ്ടുകളെ അപേക്ഷിച്ച് ഉയർന്ന നേട്ടം സമ്മാനിക്കാൻ മൾട്ടി ക്യാപ് ഫണ്ടുകൾക്ക് സാധിക്കും.

മറിച്ച്, വിപണിയിൽ തിരിച്ചടികൾ നേരിടുമ്പോൾ നിർബന്ധിത ലാർജ് ക്യാപ് നിക്ഷേപം നിക്ഷേപകർക്ക് ആവശ്യമായ സുരക്ഷയും ഉറപ്പുനൽകുന്നു. സ്മോൾ ക്യാപ് ഫണ്ടുകളിലെ അമിതമായ ചാഞ്ചാട്ടം ഒഴിവാക്കിക്കൊണ്ട് തന്നെ ദീർഘകാല വളർച്ചാ സാധ്യത നിലനിർത്താൻ ഈ രീതി സഹായിക്കുന്നു.

വിപണിയിലെ സാഹചര്യങ്ങൾ അനുകൂലമാണെന്ന് തോന്നിയാൽപോലും ഫണ്ട് മാനേജർക്ക് മുഴുവൻ തുകയും ഒരു വിഭാഗത്തിലേക്ക് മാത്രം മാറ്റാൻ സെബി ചട്ടങ്ങൾ അനുവദിക്കുന്നില്ല. ഈ രീതിയിൽ സുരക്ഷിതമായി നിക്ഷേപം മുന്നോട്ട് കൊണ്ടുപോകാൻ താൽപ്പര്യപ്പെടുന്നവർക്ക് പരിഗണിക്കാവുന്ന ഒന്നാണ് ഐസിഐസിഐ പ്രൂഡൻഷ്യൽ മൾട്ടി ക്യാപ് ഫണ്ട്.

1994 ഒക്ടോബറിൽ ആരംഭിച്ച ഈ ഫണ്ട്, തുടക്കം മുതൽ ശരാശരി 15% വാർഷിക വളർച്ചാ നിരക്കാണ് (CAGR) നൽകിയിട്ടുള്ളത്. 2026 മേയ് 30 വരെയുള്ള കണക്കുകൾ പ്രകാരം, ഈ ഫണ്ട് മൂന്ന് വർഷക്കാലയളവിൽ 17.80% ഉം, അഞ്ച് വർഷത്തിൽ 16.17% ഉം നേട്ടമാണ് നിക്ഷേപകർക്ക് സമ്മാനിച്ചിട്ടുള്ളത്.

(ലേഖകൻ: നേവിയോൺ വെൽത്ത് സ്ഥാപകൻ)