ഇസ്രയേൽ പാർലമെന്റ് തെരഞ്ഞെടുപ്പ്: ആവേശകരമായ പോരാട്ടത്തിനൊടുവിൽ ആർക്കും കേവലൂരിപക്ഷമില്ലാതെ വോട്ടെണ്ണൽ പുരോഗമിക്കുന്നു

ജെറുസലേം: ഇസ്രയേൽ പാർലമെന്റ് തെരഞ്ഞെടുപ്പിൽ അത്യന്തം വാശിയേറിയ മത്സരമാണ് നടക്കുന്നത്. ആകെ വോട്ടുകളുടെ 88 ശതമാനം എണ്ണിക്കഴിഞ്ഞപ്പോൾ പ്രധാനമന്ത്രി ബെഞ്ചമിൻ നെതന്യാഹുവിന്റെ നേതൃത്വത്തിലുള്ള ലികുഡ് പാർട്ടി ഉൾപ്പെടുന്ന ഭരണപക്ഷ സഖ്യം 53 സീറ്റുകളിൽ മുന്നിലുണ്ട്.

അതേസമയം, മുൻ സൈനിക മേധാവിയായ ഗാഡി ഐസൻകോട്ടിന്റെ യാഷർ പാർട്ടി നയിക്കുന്ന പ്രതിപക്ഷ സഖ്യം 48 സീറ്റുകളിൽ ലീഡ് നേടിക്കഴിഞ്ഞു. നിലവിൽ അഞ്ച് സീറ്റുകളുടെ ഭൂരിപക്ഷമാണ് ഭരണപക്ഷ സഖ്യത്തിനുള്ളത്.

ഇതോടൊപ്പം അറബ് പാർട്ടികൾ 19 സീറ്റുകളിലും മുന്നേറിക്കൊണ്ടിരിക്കുകയാണ്. എന്നാൽ, വോട്ടെണ്ണൽ ഇത്രയും പിന്നിട്ടിട്ടും ആർക്കും തന്നെ കേവലഭൂരിപക്ഷമായ 61 സീറ്റുകൾ സ്വന്തമാക്കാൻ സാധിച്ചിട്ടില്ല.

പ്രധാനമന്ത്രി ബെഞ്ചമിൻ നെതന്യാഹുവിന്റെ ലികുഡ് പാർട്ടി തന്നെയാണ് ഇത്തവണയും ഏറ്റവും വലിയ ഒറ്റക്കക്ഷിയായി മാറിയിരിക്കുന്നത്. ലികുഡ് പാർട്ടി മാത്രം 26 സീറ്റുകളിൽ മുന്നേറ്റം തുടരുമ്പോൾ, പ്രതിപക്ഷ നിരയിലെ യാഷർ പാർട്ടി 21 സീറ്റുകളിലാണ് മുന്നേറുന്നത്.

ജോയിന്റ് ലിസ്റ്റ്, റാ ആം തുടങ്ങിയ അറബ് പാർട്ടികളുടെ നിലപാടുകൾ ഇസ്രയേലിന്റെ രാഷ്ട്രീയ ഭാവിയിൽ അതിനിർണായകമായി മാറുകയാണ്. വോട്ടെടുപ്പിൽ വ്യാപകമായ ക്രമക്കേടുകൾ നടന്നുവെന്നും അറബ് പാർട്ടികൾ തെരഞ്ഞെടുപ്പ് അട്ടിമറിച്ചുവെന്നും ആരോപിച്ച് ലികുഡ് പാർട്ടി രംഗത്തുവന്നിട്ടുണ്ട്.

കൈക്കൂലി, ഭീഷണിപ്പെടുത്തൽ, അക്രമം, വ്യാജരേഖ ചമയ്ക്കൽ, കള്ളവോട്ട് എന്നിവയിലൂടെയാണ് അറബ് പാർട്ടികൾ അട്ടിമറി നടത്തിയതെന്നാണ് പ്രധാന ആരോപണം. വിഷയത്തിൽ രാജ്യത്തെ ആഭ്യന്തര അന്വേഷണ ഏജൻസിയായ ഷിൻ ബെറ്റും പൊലീസും അടിയന്തര അന്വേഷണം നടത്തണമെന്ന് ലികുഡ് പാർട്ടി ആവശ്യപ്പെട്ടു.

നൂറുകണക്കിന് തെളിവുകൾ പൊലീസിനും ഷിൻ ബെറ്റിനും സെൻട്രൽ ഇലക്ഷൻ കമ്മിറ്റിക്കും കൈമാറിയിട്ടുണ്ടെന്നും പാർട്ടി അറിയിച്ചു. സ്വാഭാവിക നടപടിക്രമങ്ങളുടെ ഭാഗമായി പരാതികൾ പരിശോധിച്ചുവരികയാണെന്ന് സെൻട്രൽ ഇലക്ഷൻ കമ്മിറ്റിയും വ്യക്തമാക്കിയിട്ടുണ്ട്.

അതേസമയം, ബെഞ്ചമിൻ നെതന്യാഹുവിനെ വീണ്ടും അധികാരത്തിലെത്തുന്നത് തടയാനായി അറബ് പാർട്ടികളുടെ പിന്തുണയോടെ സർക്കാരുണ്ടാക്കാനുള്ള ആലോചനകൾ പ്രതിപക്ഷ പാർട്ടികൾ സജീവമാക്കിയിട്ടുണ്ട്. പ്രതിപക്ഷ സഖ്യം അറബ് പാർട്ടികളുടെ പിന്തുണ തേടണമെന്ന് ഡെമോക്രാറ്റ്സ് പാർട്ടി നേതാവ് യായിർ ഗോളാൻ ആവശ്യപ്പെട്ടു.

പാർട്ടി നേതാക്കളായ ഗാഡി ഐസൻകോട്ട്, യായിർ ലാപിഡ് എന്നിവരുമായി ഉടൻ കൂടിക്കാഴ്ച നടത്തുമെന്നും അദ്ദേഹം വ്യക്തമാക്കി. പ്രതിപക്ഷ സഖ്യത്തോടൊപ്പം സഹകരിക്കാൻ തങ്ങൾ തയ്യാറാണെന്ന് ജോയിന്റ് ലിസ്റ്റ് ചെയർമാൻ യൂസഫ് ജബരീനും സ്ഥിരീകരിച്ചിട്ടുണ്ട്.

നെതന്യാഹുവിന്റെ ഭരണത്തിന് അന്ത്യം കുറിക്കാൻ തന്റെ പാർട്ടി പൂർണ്ണ പിന്തുണ നൽകുമെന്നും അദ്ദേഹം കൂട്ടിച്ചേർത്തു. സാധാരണ വോട്ടുകൾ എണ്ണിക്കഴിഞ്ഞതിനു ശേഷമാണ് സൈനികരുടെയും വിവിധ സേനാവിഭാഗങ്ങളിലെ ഉദ്യോഗസ്ഥരുടെയും നയതന്ത്ര പ്രതിനിധികളുടെയും ബാലറ്റുകൾ എണ്ണുന്നത്.

പ്രാദേശിക സമയം വ്യാഴാഴ്ച പുലർച്ചെ ഒരു മണിയോടെ ഈ ബാലറ്റുകളുടെ വോട്ടെണ്ണലും ആരംഭിക്കും. അടുത്ത ദിവസത്തെ വൈകുന്നേരത്തോടെ മുഴുവൻ വോട്ടെണ്ണലും പൂർത്തിയാകുമെന്നാണ് പ്രതീക്ഷിക്കുന്നത്.

ആകെ 120 സീറ്റുകളുള്ള ഇസ്രയേൽ പാർലമെന്റായ നെസെറ്റിൽ സർക്കാർ രൂപീകരിക്കാൻ 61 സീറ്റുകളാണ് ആവശ്യം. 2023 ഒക്ടോബർ ഏഴിന് രാജ്യത്തിന് നേരെ നടന്ന ഹമാസ് ആക്രമണത്തിന് ശേഷമുള്ള ആദ്യ തെരഞ്ഞെടുപ്പാണിത് എന്ന പ്രത്യേകതയുമുണ്ട്.

പ്രധാനമന്ത്രി ബെഞ്ചമിൻ നെതന്യാഹുവിന്റെ ഭരണസഖ്യവും മുൻ സൈനിക മേധാവി ഗാഡി ഐസൻകോട്ടിന്റെ പ്രതിപക്ഷ സഖ്യവും തമ്മിലായിരുന്നു പ്രധാന മത്സരം. ഹമാസ് ആക്രമണവും ഇസ്രയേലിന്റെ സൈനിക നടപടികളുമായിരുന്നു തെരഞ്ഞെടുപ്പിലെ പ്രധാന പ്രചാരണ വിഷയങ്ങൾ.

ശത്രുക്കൾക്കെതിരെ രാജ്യം കൈക്കൊണ്ട സൈനിക വിജയങ്ങൾ ഉയർത്തിക്കാട്ടിയാണ് ലികുഡ് പാർട്ടി വോട്ട് തേടിയത്.

എന്നാൽ ഒക്ടോബർ ഏഴിലെ സുരക്ഷാ വീഴ്ചകളാണ് യാഷാർ പാർട്ടി പ്രധാനമായും പ്രചാരണത്തിൽ ഉന്നയിച്ചത്. 1200 പേർ കൊല്ലപ്പെടുകയും 251 പേരെ ബന്ദിയാക്കുകയും ചെയ്ത ആ ആക്രമണത്തിൽ പ്രത്യേക അന്വേഷണ കമ്മീഷനെ നിയോഗിക്കുമെന്ന് ഗാഡി ഐസൻകോട്ട് പ്രധാന വാഗ്ദാനവും നൽകിയിരുന്നു.

ഇതിനുപുറമെ ഗാസയുടെ ഭാവി, യുവാക്കൾക്കായുള്ള നിർബന്ധിത സൈനിക സേവനം തുടങ്ങിയ സുപ്രധാന വിഷയങ്ങളും ഇസ്രയേൽ ജനത തെരഞ്ഞെടുപ്പിൽ ചർച്ച ചെയ്തു.