തമിഴ്‌നാട്ടിൽ രാഷ്ട്രീയ ചൂടേറ്റി വിജയുടെ മാസ്റ്റർസ്ട്രോക്ക്; പ്രഭാതഭക്ഷണ പദ്ധതിക്ക് കെ. കാമരാജിന്‍റെ പേര് നൽകിയതിന് പിന്നിൽ വലിയ തന്ത്രം

സ്കൂൾ വിദ്യാർത്ഥികൾക്കായി തമിഴ്‌നാട്ടിൽ നടപ്പിലാക്കി വരുന്ന പ്രഭാതഭക്ഷണ പദ്ധതിക്ക് സംസ്ഥാന മുഖ്യമന്ത്രി സി. ജോസഫ് വിജയ് മുൻ മുഖ്യമന്ത്രി കെ.

കാമരാജിന്‍റെ പേര് നൽകിയ തീരുമാനം വലിയ രാഷ്ട്രീയ ചർച്ചകൾക്കാണ് വഴിതുറന്നിരിക്കുന്നത്. ഒരു സാധാരണ ക്ഷേമപദ്ധതിയുടെ പുനർനാമകരണം എന്നതിലുപരി, ഇത് ദ്രാവിഡ രാഷ്ട്രീയ മണ്ഡലത്തിൽ നിർണായക ചലനങ്ങൾ സൃഷ്ടിക്കുന്ന നീക്കമായാണ് രാഷ്ട്രീയ നിരീക്ഷകർ വിലയിരുത്തുന്നത്.

ഡിഎംകെ സർക്കാർ മുൻപ് ആരംഭിച്ച ഈ പദ്ധതിയിലാണ് കോൺഗ്രസ് ഇതിഹാസവും നാടാർ സമുദായത്തിന്‍റെ പ്രധാന പ്രതീകവുമായ കാമരാജിന്‍റെ പേര് ഇപ്പോൾ പുനഃസ്ഥാപിച്ചിരിക്കുന്നത്. ദക്ഷിണ തമിഴ്‌നാട്ടിൽ ശക്തമായ വേരുകളുള്ള നാടാർ സമുദായത്തിനിടയിലേക്ക് തമിഴക വെട്രി കഴകത്തിന്‍റെ (ടിവികെ) സ്വാധീനം വ്യാപിപ്പിക്കുക എന്നതാണ് ഈ തീരുമാനത്തിലൂടെ ലക്ഷ്യമിടുന്നത്.

സെപ്റ്റംബർ 22-നാണ് തമിഴ്‌നാട് സർക്കാർ പ്രഭാതഭക്ഷണ പദ്ധതി ഔദ്യോഗികമായി ‘പെരുന്തലൈവർ കാമരാജർ ബ്രേക്ക്ഫാസ്റ്റ് സ്കീം’ എന്ന് പുനർനാമകരണം ചെയ്തുകൊണ്ട് ഉത്തരവിറക്കിയത്. 2022 സെപ്റ്റംബറിൽ എം കെ സ്റ്റാലിന്‍റെ നേതൃത്വത്തിലുള്ള ഡിഎംകെ സർക്കാർ ഒന്നു മുതൽ അഞ്ചു വരെയുള്ള ക്ലാസുകളിലെ കുട്ടികൾക്കായി കൊണ്ടുവന്ന ഈ പദ്ധതി, ടിവികെ സർക്കാർ അധികാരത്തിലെത്തിയ ശേഷം കാമരാജിന്‍റെ ജന്മദിനമായ ജൂലൈ 15ന് ആറുമുതൽ എട്ടാം ക്ലാസ് വരെയുള്ള കുട്ടികളിലേക്ക് വ്യാപിപ്പിച്ചിരുന്നു.

1956-ൽ അന്നത്തെ മദ്രാസ് സംസ്ഥാനത്ത് സ്കൂൾ കുട്ടികൾക്കായി ഉച്ചഭക്ഷണ പദ്ധതി ആദ്യമായി വിപുലീകരിച്ച കാമരാജിന്‍റെ ചരിത്രപരമായ പാരമ്പര്യം മുൻനിർത്തിയാണ് സർക്കാർ ഈ പേരുമാറ്റം നടപ്പാക്കിയിട്ടുള്ളത്. തമിഴ്‌നാട് രാഷ്ട്രീയത്തിൽ ഒബിസി വിഭാഗത്തിൽ ജനസംഖ്യാപരമായി രണ്ടാം സ്ഥാനത്താണ് നാടാർ സമുദായത്തിന്‍റെ സ്ഥാനം.

ഇതിൽ ഏകദേശം 40 ശതമാനത്തോളം പേരും ക്രിസ്ത്യൻ വിശ്വാസികളാണ്. ക്രൈസ്തവ വിശ്വാസിയായ മുഖ്യമന്ത്രി വിജയ്‍യോട് സ്വാഭാവികമായ അടുപ്പമുള്ള ഈ വിഭാഗത്തിന് പുറമെ, കാമരാജിന്‍റെ പേര് സജീവമാക്കുന്നതിലൂടെ ഹിന്ദു നാടാർ വിഭാഗങ്ങളെക്കൂടി ഒപ്പം നിർത്താനും അതുവഴി ഡിഎംകെയ്ക്ക് കനത്ത വെല്ലുവിളി ഉയർത്താനുമാണ് ടിവികെ ശ്രമിക്കുന്നത്.

കന്യാകുമാരി, തിരുനെൽവേലി, തൂത്തുക്കുടി, തെങ്കാശി, വിരുദുനഗർ തുടങ്ങിയ തെക്കൻ ജില്ലകളിൽ വലിയ സ്വാധീനമുള്ള ഈ സമുദായം സംസ്ഥാനത്തെ മൊത്തം വോട്ടുവിഹിതത്തിൽ ആറ് മുതൽ എട്ട് ശതമാനം വരെ നിർണായക പങ്കുവഹിക്കുന്നുണ്ട്. ദ്രാവിഡ പാർട്ടികളുടെ പരമ്പരാഗത രീതികൾക്ക് ബദലായി അഴിമതിരഹിത ഭരണവും പുതിയ രാഷ്ട്രീയ പാരമ്പര്യവും ഉയർത്തിക്കാട്ടി ഡിഎംകെ-എഐഎഡിഎംകെ സമവാക്യങ്ങൾക്ക് പുറത്ത് സ്വന്തം അടിത്തറ ശക്തമാക്കാനാണ് വിജയ് ഇതിലൂടെ ലക്ഷ്യമിടുന്നത്.

അതേസമയം, വിജയ്‍യുടെ ഈ രാഷ്ട്രീയ നീക്കത്തെ 2029ലെ ലോക്‌സഭാ തെരഞ്ഞെടുപ്പ് മുന്നിൽക്കണ്ട് തങ്ങൾക്ക് അനുകൂലമാക്കി മാറ്റാനുള്ള തയ്യാറെടുപ്പിലാണ് ബിജെപി അനുകൂല ഗ്രൂപ്പുകൾ. കാമരാജിനെ കേവലം ഒരു തമിഴ് രാഷ്ട്രീയ നേതാവ് എന്നതിലുപരി ദേശീയതലത്തിൽ മറ്റ് പിന്നാക്ക വിഭാഗങ്ങളെ (ഒബിസി) ഒരേ കുടക്കീഴിൽ ഏകോപിപ്പിക്കാനുള്ള പ്രതീകമായി ഉയർത്തിക്കാട്ടാനാണ് ഇവർ ശ്രമിക്കുന്നത്.

കാമരാജിന്‍റെ പേരിൽ കേന്ദ്ര സർക്കാർ തലത്തിൽ പ്രത്യേക ദേശീയ പദ്ധതി പ്രഖ്യാപിക്കണമെന്ന് ‘ടീം ആർഡി മോദിജി ഫോർ 2029’ പ്രധാനമന്ത്രി നരേന്ദ്ര മോദിയോട് ഔദ്യോഗികമായി ആവശ്യപ്പെടുകയും ചെയ്തിട്ടുണ്ട്. നാടാർ വിഭാഗങ്ങൾക്ക് പുറമെ കേരളത്തിലെ ഈഴവർ, മറ്റ് സംസ്ഥാനങ്ങളിലെ ഭണ്ഡാരി, ജയ്‌സ്വാൾ, ഗൗഡ് തുടങ്ങിയ വിവിധ ഒബിസി സമുദായങ്ങളെ ഒന്നിപ്പിക്കാൻ കാമരാജിന്‍റെ പ്രതിച്ഛായ ഫലപ്രദമായി ഉപയോഗിക്കാമെന്നാണ് ഇവരുടെ വിലയിരുത്തൽ.

ഡിഎംകെയുടെ ആശയപരമായ ആധിപത്യത്തെ നേരിടാൻ വിജയ് കാമരാജിനെ ആയുധമാക്കുമ്പോൾ, വിശാലമായ ഒബിസി സഖ്യം രൂപീകരിക്കാനുള്ള രാഷ്ട്രീയ പാലമായി കാമരാജിന്‍റെ പാരമ്പര്യത്തെ ഉപയോഗപ്പെടുത്താനാണ് കേന്ദ്ര ഭരണപക്ഷത്തോട് അടുത്ത വൃത്തങ്ങളുടെ നീക്കം.