തൊടുപുഴയിൽ നിയന്ത്രണം വിട്ടെത്തിയ സ്വകാര്യ ബസ് ഇടിച്ച് റിട്ടയേർഡ് അധ്യാപിക ദാരുണമായി അന്ത്യം സംഭവിച്ചു. നാഗപ്പുഴ സെന്റ് മേരീസ് പബ്ലിക് സ്‌കൂൾ റിട്ട.
അധ്യാപികയും കാപ്പ് ഇടയ്ക്കാട്ടുകയറ്റം പടിഞ്ഞാറേക്കര വീട്ടിൽ എം.എൻ.വിജിമോൾ (57) ആണ് മരണപ്പെട്ടത്. കേരള കൗമുദി മുൻ ഫൊട്ടോഗ്രഫർ ആർ.വിനയചന്ദ്രന്റെ (ബാബു സൂര്യ) ഭാര്യയാണ്.
ഞായറാഴ്ച വൈകിട്ട് 6.45നു തൊടുപുഴ – മൂവാറ്റുപുഴ റൂട്ടിൽ മടക്കത്താനം കൊച്ചങ്ങാടിക്കു സമീപമായിരുന്നു അപകടം സംഭവിച്ചത്. ഏക മകൻ അനുരൂപിനൊപ്പം പിറവത്തെ ബന്ധുവീട്ടിൽനിന്നു കാപ്പിലെ വീട്ടിലേക്കു മടങ്ങവേയാണ് ഈ ദുരന്തമുണ്ടായത്.
മറ്റൊരു വാഹനത്തെ മറികടക്കാൻ ശ്രമിക്കുന്നതിനിടെ ‘ഗുരുദേവ്’ എന്ന ബസാണു ഇവർ സഞ്ചരിച്ചിരുന്ന ബൈക്കിൽ ഇടിച്ചത്. പതിനഞ്ച് മിനിറ്റോളം റോഡിൽ രക്തം വാർന്നു കിടന്ന ഇരുവരെയും മഞ്ഞള്ളൂർ പഞ്ചായത്തംഗം റോബി തടത്തിലിന്റെ നേതൃത്വത്തിലാണ് തൊടുപുഴയിലെ ആശുപത്രിയിലെത്തിച്ചത്.
എന്നാൽ ചികിത്സയിലിരിക്കെ ഇന്നലെ രാവിലെ 6.45നു വിജിമോൾ മരണത്തിന് കീഴടങ്ങുകയായിരുന്നു. അപകടത്തിൽ പരിക്കേറ്റ മകൻ അനുരൂപ് ചികിത്സയിലാണ്.
കല്ലൂർക്കാട് സരസ്വതി സ്‌കൂൾ മുൻ പ്രധാനാധ്യാപികയാണ് ഇവർ. തൊടുപുഴ സരസ്വതി വിദ്യാഭവൻ സെൻട്രൽ സ്‌കൂൾ, അൽ അസ്ഹർ പബ്ലിക് സ്‌കൂൾ, പുറപ്പുഴ എസ്എച്ച് പബ്ലിക് സ്‌കൂൾ എന്നിവിടങ്ങളിലും സേവനം അനുഷ്ഠിച്ചിട്ടുണ്ട്.
പാലാ അളനാട് മാളിയേക്കൽ കുടുംബാംഗമാണ്. സംസ്കാരം ഇന്നു വൈകിട്ട് 4ന് നടക്കും.
മരണശേഷവും മറ്റുള്ളവർക്ക് വെളിച്ചമായി മാറാൻ വിജിമോളുടെ കണ്ണുകൾ ഇനി രണ്ടുപേർക്കു കാഴ്ചയേകും. ഇന്നലെ പുലർച്ചെ മസ്തിഷ്‌ക മരണം സംഭവിച്ചതോടെ വിജിമോളുടെ എല്ലാ അവയവങ്ങളും ദാനം ചെയ്യാൻ കുടുംബം സമ്മതമറിയിച്ചിരുന്നു.
എന്നാൽ മറ്റ് അവയവങ്ങൾ ദാനം ചെയ്യുന്നതിൽ സാങ്കേതിക തടസ്സങ്ങൾ നേരിട്ടു. തുടർന്ന് നേത്രപടലം അങ്കമാലി ലിറ്റിൽ ഫ്ലവർ ആശുപത്രിയിലെ ഐ ബാങ്ക് അസോസിയേഷൻ കേരളയ്ക്കു കൈമാറുകയായിരുന്നു.
