യാത്രക്കാരുടെയും ജനപ്രതിനിധികളുടെയും എതിർപ്പുകൾ തള്ളി പാലക്കാട് റെയിൽവേ ഡിവിഷൻ വിഭജനം ഇന്ന് അർധരാത്രി മുതൽ നിലവിൽ വരും

കേരളത്തിലെ ജനപ്രതിനിധികളുടെയും യാത്രക്കാരുടെയും ശക്തമായ എതിർപ്പുകൾ പൂർണ്ണമായും അവഗണിച്ചുകൊണ്ടാണ് പാലക്കാട് ഡിവിഷൻ വെട്ടിമുറിച്ചുകൊണ്ടുള്ള നടപടികളുമായി റെയിൽവേ മുന്നോട്ട് പോകുന്നത്. പാലക്കാട് ഡിവിഷന്റെ ഭാഗമായിരുന്ന മംഗളൂരു കേന്ദ്രീകരിച്ചുള്ള മേഖലകൾ ഇന്ന് അർധരാത്രി മുതൽ സൗത്ത് വെസ്റ്റേൺ റെയിൽവേയുടെ മൈസൂരു ഡിവിഷന്റെ ഭാഗമായി മാറും.

ഈadministrative കൈമാറ്റത്തിന്റെ ഭാഗമായ ഔദ്യോഗിക ധാരണാപത്രത്തിൽ ഇരു ഡിവിഷനുകളിലെയും ഉന്നത ഉദ്യോഗസ്ഥർ ഒപ്പുവെക്കും. കൊങ്കൺ, സൗത്ത് വെസ്റ്റേൺ, സതേൺ റെയിൽവേകളുടെ പരിധിയിലുള്ള മംഗളൂരു മേഖലയെ ഒറ്റ റെയിൽവേയുടെ പരിധിയിലേക്ക് കൊണ്ടുവരുന്നതിനാണു പാലക്കാട് ഡിവിഷൻ വിഭജനം നടപ്പിലാക്കുന്നത് എന്നാണ് റെയിൽവേയുടെ ഔദ്യോഗിക അവകാശവാദം.

പുതിയ മാറ്റപ്രകാരം ട്രെയിൻ സമയങ്ങളിലോ മറ്റ് യാത്രാസൗകര്യങ്ങളിലോ യാതൊരുവിധ മാറ്റങ്ങളും ഉണ്ടാകില്ലെന്നും, യാത്രക്കാരെ ഇത് നേരിട്ടു ബാധിക്കില്ലെന്നും അധികൃതർ വ്യക്തമാക്കുന്നുണ്ട്. എന്നാൽ മംഗളൂരു മേഖലയിലെ ചരക്കു വരുമാനം പൂർണ്ണമായി നഷ്ടമാകുന്നതോടെ പാലക്കാട് ഡിവിഷൻ അതീവ അപ്രസക്തമാകുമെന്നും ഭാവിയിൽ പുതിയ ട്രെയിനുകൾ ഓപ്പറേറ്റ് ചെയ്യാൻ കഴിയാത്ത സാഹചര്യം സംജാതമാകുമെന്നുമാണ് ജനപ്രതിനിധികൾ ചൂണ്ടിക്കാണിക്കുന്നത്.

വിഭജനത്തിന്റെ ഭാഗമായി ലോക്കോ പൈലറ്റ് ഡിപ്പോ, ഗാർഡ് ക്രൂ ഡിപ്പോ എന്നിവ മംഗളൂരുവിൽ നിന്നു കണ്ണൂരിലേക്കു മാറ്റാൻ തീരുമാനിച്ചിട്ടുണ്ട്. പാലക്കാട് ഡിവിഷനിൽനിന്നു വേർപെടുത്തുന്ന മേഖല ഇനി മൈസൂരുവിൽ നിന്നു നിയന്ത്രിക്കാനുള്ള നടപടികൾ ഇതിനോടകം തന്നെ ആരംഭിച്ചു കഴിഞ്ഞു.

എന്നാൽ ഡിവിഷൻ വിഭജനം ഏറ്റവും വലിയ തിരിച്ചടിയാകുന്നത് റെയിൽവേ ജീവനക്കാർക്കാണ്. ഏതു ഡിവിഷനിൽ തുടർന്നു പ്രവർത്തിക്കണമെന്ന് കാണിച്ച് ജീവനക്കാരിൽ നിന്ന് ഓപ്ഷൻ ക്ഷണിച്ചിരുന്നെങ്കിലും, മെക്കാനിക്കൽ വിഭാഗത്തിൽ ഉൾപ്പെടെ ആവശ്യാനുസരണം തസ്തികകൾ പാലക്കാട് ഡിവിഷനിൽ ലഭ്യമല്ല.

ഇതേതുടർന്ന് നിരവധി ജീവനക്കാർക്ക് സൗത്ത് വെസ്റ്റേൺ റെയിൽവേയുടെ ഭാഗമായ മൈസൂരു ഡിവിഷനിലെ വിദൂരമേഖലകളിൽ ഉൾപ്പെടെ ജോലി ചെയ്യേണ്ടി വരുന്ന സാഹചര്യം രൂപപ്പെട്ടിട്ടുണ്ട്. ഓപ്പറേഷൻ, കമേഴ്സ്യൽ, എൻജിനീയറിങ്, മെക്കാനിക്കൽ, ഇലക്ട്രിക്കൽ തുടങ്ങി വിവിധ വിഭാഗങ്ങളിലായി മംഗളൂരു മേഖലയിൽ സേവനമനുഷ്ഠിക്കുന്ന ഒട്ടേറെ ജീവനക്കാർ കേരളത്തിലേക്ക് സ്ഥലംമാറ്റം തേടി അപേക്ഷ സമർപ്പിച്ചിരുന്നെങ്കിലും, പുതിയ സാഹചര്യത്തിൽ അവർക്ക് അവിടെത്തന്നെ തുടരേണ്ടി വരുന്ന അവസ്ഥയാണ് ഉള്ളത്.