ടാറ്റാ ട്രസ്റ്റ് – ടാറ്റാ സൺസ് തർക്കം മുറുകുന്നു; എൻ ചന്ദ്രശേഖരന്റെ പുനർനിയമനം നിയമവിരുദ്ധമെന്ന് ആവർത്തിച്ച് ട്രസ്റ്റ്

ടാറ്റാ ഗ്രൂപ്പിൽ പ്രമുഖ സ്ഥാപനങ്ങളായ ടാറ്റാ ട്രസ്റ്റും ടാറ്റാ സൺസും തമ്മിലുള്ള അധികാര വടംവലി കൂടുതൽ സങ്കീർണ്ണമാകുന്നു. എൻ ചന്ദ്രശേഖരൻ ടാറ്റാ സൺസ് ചെയർമാനായി വീണ്ടും അധികാരത്തിൽ തുടരുന്നതുമായി ബന്ധപ്പെട്ട

തീരുമാനത്തിനെതിരെ ടാറ്റാ ട്രസ്റ്റ് വീണ്ടും രംഗത്തെത്തി. ഈ നിയമന നീക്കം നിയമപരമായി നിലനിൽക്കില്ലെന്നാണ് ട്രസ്റ്റിന്റെ നിലപാട്.

കഴിഞ്ഞ സെപ്റ്റംബർ 17ന് ചേർന്ന ബോർഡ് യോഗത്തിലാണ് എൻ ചന്ദ്രശേഖരനെ ഈ പദവിയിലേക്ക് പുനർനിയമിക്കാൻ തീരുമാനിച്ചത്. എന്നാൽ, ഈ തീരുമാനത്തിന് ടാറ്റാ ട്രസ്റ്റിന്റെ നോമിനി ഡയറക്ടർമാരുടെ ഔദ്യോഗിക പിന്തുണ ലഭിച്ചിട്ടില്ലെന്ന് ഞായറാഴ്ച പുറത്തുവിട്ട

വിശദമായ വാർത്താക്കുറിപ്പിൽ വ്യക്തമാക്കുന്നു. കമ്പനിയുടെ ആകെ ഓഹരികളുടെ 66 ശതമാനവും നിയന്ത്രിക്കുന്നത് ടാറ്റാ ട്രസ്റ്റാണ്.

ടാറ്റാ സൺസിന്റെ ആർട്ടിക്കിൾസ് ഓഫ് അസോസിയേഷൻ (AoA) പ്രകാരമുള്ള വ്യവസ്ഥകൾ അനുസരിച്ച്, ഇത്തരം നിർണായക തീരുമാനങ്ങൾ എടുക്കുമ്പോൾ ട്രസ്റ്റ് നിർദ്ദേശിക്കുന്ന ഡയറക്ടർമാരുടെ ഭൂരിപക്ഷ പിന്തുണ അനിവാര്യമാണ്. നിലവിൽ രണ്ട് നോമിനി ഡയറക്ടർമാരാണ് ബോർഡിൽ ട്രസ്റ്റിനുള്ളത്.

അതിനാൽ തന്നെ നിയമനം അന്തിമമാകാൻ ഇരുവരുടെയും പിന്തുണ ആവശ്യമായിരുന്നു. എന്നാൽ സെപ്റ്റംബർ 17ന് നടന്ന വോട്ടെടുപ്പ് വേളയിൽ ഇതിൽ ഒരു നോമിനി പ്രമേയത്തിന് എതിരായി വോട്ട് രേഖപ്പെടുത്തി.

ഇതേതുടർന്ന് നിയമനത്തിന് വേണ്ട വ്യക്തമായ ഭൂരിപക്ഷം ലഭിച്ചില്ലെന്ന് ട്രസ്റ്റ് ചൂണ്ടിക്കാണിക്കുന്നു.

ഈ പ്രതിസന്ധി ഘട്ടത്തിൽ ചെയർമാന്റെ കാസ്റ്റിംഗ് വോട്ട് പ്രയോഗിച്ച് പ്രശ്നം പരിഹരിക്കാൻ സാധിക്കില്ലെന്നും ട്രസ്റ്റ് അറിയിച്ചു. ബോർഡിലെ വോട്ടെടുപ്പിൽ ഇരുവിഭാഗത്തിനും തുല്യ വോട്ട് ലഭിക്കുന്ന സന്ദർഭങ്ങളിൽ മാത്രമെ കാസ്റ്റിംഗ് വോട്ട് ഉപയോഗിക്കാൻ ചട്ടമുള്ളൂ.

ട്രസ്റ്റിന്റെ നോമിനി ഡയറക്ടർമാരുടെ പിന്തുണ ഉറപ്പാക്കേണ്ട കാര്യത്തിൽ ഈ നിയമം ബാധകമല്ലെന്ന് ട്രസ്റ്റ് വ്യക്തമാക്കി.

മുൻ ചെയർമാൻ സൈറസ് മിസ്ത്രിയെ പുറത്താക്കിയതുമായി ബന്ധപ്പെട്ട് സുപ്രീം കോടതിയിൽ നിലനിന്ന നിയമപോരാട്ടങ്ങളും ട്രസ്റ്റ് ഈ അവസരത്തിൽ ഓർമ്മിപ്പിച്ചു. അന്ന് ആർട്ടിക്കിൾ 104B, 121 എന്നിവയുടെ അടിസ്ഥാനത്തിൽ ട്രസ്റ്റ് നോമിനികൾക്കുള്ള വോട്ടിംഗ് അവകാശത്തെ ടാറ്റാ സൺസ് കോടതിയിൽ ശക്തമായി പിന്താങ്ങിയിരുന്നു.

എന്നാൽ ഈ അവകാശങ്ങൾ അടിച്ചമർത്തലാണെന്നായിരുന്നു നാഷണൽ കമ്പനി ലോ അപ്പലേറ്റ് ട്രിബ്യൂണലിന്റെ അന്നത്തെ വിധി. പിന്നീട് സുപ്രീം കോടതി ടാറ്റാ സൺസിന്റെ വാദങ്ങൾ അംഗീകരിക്കുകയും ട്രിബ്യൂണലിന്റെ ഉത്തരവ് റദ്ദാക്കുകയും ചെയ്യുകയുണ്ടായി.

അതിനാൽ അന്നത്തെ കേസിൽ കോടതിയിൽ പ്രതിരോധിച്ച അതേ അവകാശങ്ങളെയും സുരക്ഷകളെയും ഇപ്പോൾ ടാറ്റാ സൺസിന് അവഗണിക്കാനാകില്ലെന്ന് ട്രസ്റ്റ് ഓർമ്മിപ്പിച്ചു. അതേസമയം, കോർപറേറ്റ് ഭരണം മെച്ചപ്പെടുത്തുന്നതിന്റെ ഭാഗമായി ടാറ്റാ സൺസിനെ ഓഹരി വിപണിയിൽ ലിസ്റ്റ് ചെയ്യണമെന്ന വാദവും ട്രസ്റ്റ് പൂർണ്ണമായും തള്ളിക്കളഞ്ഞു.

സ്വതന്ത്ര ഡയറക്ടർമാർ, ഓഡിറ്റ്-നോമിനേഷൻ കമ്മിറ്റികൾ, ഇൻസൈഡർ ട്രേഡിംഗ് പ്രതിരോധിക്കാനുള്ള സംവിധാനങ്ങൾ തുടങ്ങി ഉന്നത നിലവാരത്തിലുള്ള ഭരണത്തിനാവശ്യമായ എല്ലാ ഘടകങ്ങളും കമ്പനിയിൽ ഇതിനകം തന്നെ ലഭ്യമാണെന്ന് അവർ ചൂണ്ടിക്കാട്ടി. നിലവിലുള്ള ഈ പ്രശ്നങ്ങൾ രൂപപ്പെടുന്നതിന് മുൻപ് തന്നെ ടാറ്റാ സൺസ് ഈ മാനദണ്ഡങ്ങളെല്ലാം സ്വമേധയാ നടപ്പിലാക്കിയിട്ടുള്ളതാണെന്നും ട്രസ്റ്റ് കൂട്ടിച്ചേർത്തു.