കൊച്ചി മെട്രോയുടെ പേര് മാറ്റത്തിൽ വിശദീകരണവുമായി കെഎംആർഎൽ; സർക്കാരിന്റെ പൂർണ്ണ സമ്മതത്തോടെ മാത്രം തീരുമാനമെന്ന് വ്യക്തമാക്കുന്നു

കൊച്ചി മെട്രോയുടെ പേര് മാറ്റവുമായി ബന്ധപ്പെട്ട് ഉയർന്നുവന്ന വിവാദങ്ങളിൽ ഔദ്യോഗിക വിശദീകരണവുമായി കൊച്ചി മെട്രോ റെയിൽ ലിമിറ്റഡ് (കെഎംആർഎൽ) രംഗത്ത്. പേര് മാറ്റവുമായി ബന്ധപ്പെട്ട് സംസ്ഥാന സർക്കാരിന് നൽകിയ ശുപാർശ കേന്ദ്ര നിർദേശപ്രകാരമാണെന്ന തരത്തിൽ പ്രചരിക്കുന്ന വാർത്തകൾ വസ്തുതാവിരുദ്ധമാണെന്ന് കെഎംആർഎൽ വ്യക്തമാക്കി.

പേര് മാറ്റുന്നത് സംബന്ധിച്ച് ഇതുവരെ ഒരു സംസ്ഥാനത്തിനും കേന്ദ്രസർക്കാർ നിർദേശം നൽകിയിട്ടില്ല. എന്നാൽ, ഒരു സംസ്ഥാനത്തെ വിവിധ നഗരങ്ങളിൽ ഒന്നിലധികം മെട്രോ സംവിധാനങ്ങൾ പ്രവർത്തിക്കുമ്പോൾ അവിടെ ഒരു മെട്രോ റെയിൽ കമ്പനി മാത്രമേ പാടുള്ളൂ എന്നത് കേന്ദ്രത്തിന്റെ പൊതുവായ മാർഗനിർദേശമാണെന്ന് അധികൃതർ ചൂണ്ടിക്കാട്ടി.

സംസ്ഥാനം ഈ നിർദേശം തള്ളിയാൽ വിഷയം അവിടെ അവസാനിക്കുമെന്നും നിലവിലുള്ള തെറ്റിദ്ധാരണകളുടെ പുറത്താണ് ഇപ്പോൾ വിവാദങ്ങൾ ഉടലെടുത്തിട്ടുള്ളതെന്നും കെഎംആർഎൽ വാർത്താക്കുറിപ്പിൽ അറിയിച്ചു. കൊച്ചി മെട്രോ എന്ന പേര് ഇനിയും തുടരുമെന്നും സംസ്ഥാന സർക്കാരിന്റെ പൂർണ്ണ സമ്മതത്തോടെ മാത്രമെ ഇത്തരം കാര്യങ്ങളിൽ തീരുമാനമെടുക്കൂ എന്നും അവർ വ്യക്തമാക്കി.

അതേസമയം, കൊച്ചി മെട്രോയുടെ പേര് മാറ്റുന്ന വിഷയം സർക്കാരിന്റെ പരിഗണനയിൽ പോലുമില്ലെന്ന് മുഖ്യമന്ത്രി വി.ഡി. സതീശൻ ഇന്നലെ വ്യക്തമാക്കിയിരുന്നു.

മാധ്യമങ്ങളിൽ വന്ന വാർത്തകളിലൂടെയാണ് ഈ വിഷയം തന്റെ ശ്രദ്ധയിൽപ്പെട്ടതെന്നും, പേര് മാറ്റവുമായി ബന്ധപ്പെട്ട് സർക്കാരിന്റെ ഭാഗത്തുനിന്ന് യാതൊരുവിധ ആലോചനകളും നടന്നിട്ടില്ലെന്നും അദ്ദേഹം പറഞ്ഞു. പറവൂരിൽ പുനർജനി പദ്ധതിയുടെ ഭാഗമായി പുതിയ വീടിന് തറക്കല്ലിടൽ ചടങ്ങിൽ പങ്കെടുത്ത് സംസാരിക്കുകയായിരുന്നു മുഖ്യമന്ത്രി.

കെഎംആർഎൽ പുറത്തിറക്കിയത് ഏകപക്ഷീയമായ പത്രക്കുറിപ്പായിരുന്നുവെന്നും മുഖ്യമന്ത്രി ചൂണ്ടിക്കാട്ടി. സർക്കാർ എപ്പോഴും ജനങ്ങൾക്കൊപ്പമാണെന്നും ക്ഷേമ പെൻഷനുകൾ മുൻകൂട്ടി വിതരണം ചെയ്യുമെന്നും അദ്ദേഹം ഉറപ്പുനൽകി.

കൂടാതെ, ലയണൽ മെസിയുടെ കേരള സന്ദർശനവുമായി ബന്ധപ്പെട്ട വിവാദങ്ങളിലും മുഖ്യമന്ത്രി പ്രതികരിക്കുകയുണ്ടായി.

ഇതുസംബന്ധിച്ച റിപ്പോർ‌ട്ടിന്റെ കാര്യത്തിൽ ഉടൻ തന്നെ അന്തിമ തീരുമാനമുണ്ടാകുമെന്ന് അദ്ദേഹം കൂട്ടിച്ചേർത്തു.