പുന്നമടക്കായലിൽ ആവേശക്കടലൊരുങ്ങുന്നു; നെഹ്റു ട്രോഫി വള്ളംകളി നാളെ

ആലപ്പുഴയുടെ ജലോത്സവ ആവേശത്തിന് ഇനി മണിക്കൂറുകൾ മാത്രം ബാക്കി. പുന്നമടക്കായലിൽ മാമാങ്കത്തിന് കളമൊരുങ്ങിക്കഴിഞ്ഞു.

നാളെ നടക്കുന്ന നെഹ്റു ട്രോഫി വള്ളംകളിക്കായി കായൽക്കര പൂർണ്ണമായും സജ്ജമായതായി ജില്ലാ കളക്ടർ ഷാജി വി.നായർ, ജില്ലാ പൊലീസ് മേധാവി ടി.കെ.വിഷ്ണുപ്രദീപ് എന്നിവർ വ്യക്തമാക്കി. മത്സരത്തിനായുള്ള നെഹ്‌റു പവിലിയന്റെയും താൽക്കാലിക ഗാലറികളുടെയും നിർമ്മാണ പ്രവർത്തനങ്ങൾ അന്തിമഘട്ടത്തിലാണ്.

സുഗമമായ നടത്തിപ്പിനായി യന്ത്രവത്കൃത സ്റ്റാർട്ടിങ് സംവിധാനവും ഫോട്ടോ ഫിനിഷിങ് സംവിധാനവും പൂർണ്ണമായും സജ്ജീകരിച്ചിട്ടുണ്ട്. കൽക്കരിയും വെള്ളവും പോലെ കാണികളുടെ ഒഴുക്ക് മുൻകൂട്ടി കണ്ട് യാത്രാസൗകര്യങ്ങളും വിപുലമാക്കിയിട്ടുണ്ട്.

ആരാധകർക്കായി കൂടുതൽ ബോട്ടുകളും കെഎസ്ആർടിസി ബസുകളും ഏർപ്പെടുത്തിയിട്ടുണ്ട്. അയൽ ജില്ലകളിലെ ഡിപ്പോകളിൽ നിന്ന് രാവിലെ ആലപ്പുഴയിലേക്കും തിരിച്ച് വൈകിട്ട് പ്രത്യേക സർവീസുകൾ ഉണ്ടായിരിക്കുന്നതാണ്.

ഇതിനു പുറമെ, കെഎസ്ആർടിസി ബജറ്റ് സെല്ലിന്റെ നേതൃത്വത്തിൽ പ്രത്യേക പാക്കേജ് ടൂറിസം സംവിധാനവും സന്ദർശകർക്കായി ഒരുക്കിയിട്ടുണ്ട്. സമ്മാനത്തുകയിലെ വർദ്ധനവ് പോരാട്ടത്തിന്റെ വീറും വാശിയും കൂട്ടും സമ്മാനത്തുകയിൽ വലിയ വർദ്ധനവ് വരുത്തിയ ശേഷമുള്ള ആദ്യ ജലോത്സവമെന്ന പ്രത്യേകതയും ഇത്തവണയുണ്ട്.

ആകെ 5 ലക്ഷം രൂപയുണ്ടായിരുന്ന സമ്മാനത്തുക ആദ്യ നാല് സ്ഥാനക്കാർക്ക് യഥാക്രമം 25, 20, 15, 10 ലക്ഷം രൂപയായാണ് ഉയർത്തിയിട്ടുള്ളത്. ഇതിനുപുറമേ ക്ലബ്ബുകൾക്കുള്ള ബോണസും വള്ളങ്ങളുടെ മെയിന്റനൻസ് ഗ്രാന്റും 25 ശതമാനമായി വർദ്ധിപ്പിച്ചിട്ടുണ്ട്.

സംസ്ഥാന സർക്കാർ അനുവദിച്ച ഗ്രാന്റും ഒരു കോടിയിൽ നിന്ന് രണ്ട് കോടിയായി ഉയർന്നിട്ടുണ്ട്. ഏറ്റവും മികച്ച സമയം കുറിക്കുന്ന നാല് ചുണ്ടൻ വള്ളങ്ങളാണ് ഫൈനൽ പോരാട്ടത്തിന് അർഹത നേടുക.

വിവിധ വിഭാഗങ്ങളിലായി ആകെ 70 വള്ളങ്ങളാണ് ഇക്കുറി പുന്നമടയിൽ മാറ്റുരയ്ക്കുന്നത്. ഇതിൽ 21 എണ്ണം ചുണ്ടൻ വള്ളങ്ങളാണ്.

ചുരുളൻ- 2, ഇരുട്ടുകുത്തി എ- 3, ഇരുട്ടുകുത്തി ബി-16, ഇരുട്ടുകുത്തി സി-14, വെപ്പ് എ- 5, വെപ്പ് ബി- 4, തെക്കനോടി തറ- 1, തെക്കനോടി കെട്ട്- 4 എന്നിങ്ങനെയാണ് മറ്റ് വിഭാഗങ്ങളുടെ കണക്കുകൾ. ടിക്കറ്റ് വിൽപനയിൽ റെക്കോർഡ് കുതിപ്പ് ജലോത്സവ ടിക്കറ്റുകൾക്ക് വൻ ജനപ്രതികരണമാണ് ലഭിക്കുന്നത്.

ഉയർന്ന നിരക്കിലുള്ള പല ടിക്കറ്റുകളുടെയും വിൽപന ഇതിനോടകം തന്നെ പൂർത്തിയായി. 25,000, 3,000 രൂപയുടെ ഉൾപ്പെടെയുള്ള ടിക്കറ്റുകളുടെ വിൽപനയാണ് നിർത്തിവച്ചത്.

ചരിത്രത്തിലാദ്യമായി ഒരു ലക്ഷം രൂപയുടെ കോർപറേറ്റ് ബോക്‌സ് എന്ന പുതിയ ടിക്കറ്റും ഇക്കുറി അവതരിപ്പിച്ചിട്ടുണ്ട്. അഞ്ച് ജില്ലകളിലെ സർക്കാർ കാര്യാലയങ്ങൾ വഴിയും ഔദ്യോഗിക വെബ്‌സൈറ്റ് മുഖേനയുമാണ് ടിക്കറ്റ് വിതരണം പുരോഗമിക്കുന്നത്.

പ്രത്യേക യാത്രാക്രമങ്ങളും പ്രവേശനവും പ്രമുഖരെ നാല് ബോട്ട് ജെട്ടികൾ വഴി മത്സരവേദിയിലേക്ക് എത്തിക്കും. വിവിഐപികളെ ലേക്ക് പാലസ് ജെട്ടി വഴിയും, കോർപറേറ്റ്-പ്ലാറ്റിനം ടിക്കറ്റ് ഉടമകളെ മാളിയേക്കൽ ജെട്ടി വഴിയും പ്രവേശിപ്പിക്കും.

ഗോൾഡ്, സിൽവർ ടിക്കറ്റുകാർക്കായി മാതാ ജെട്ടിയും, നഗരസഭാ കൗൺസിലർമാർക്കും കോംപ്ലിമെന്ററി പാസുകാർക്കും രാജീവ് ജെട്ടിയും ഒരുക്കിയിട്ടുണ്ട്. മാധ്യമപ്രവർത്തകർ എസ്ഡബ്ല്യുടി പമ്പ് ജെട്ടി വഴി പ്രവേശിക്കണം.

പാസുള്ളവർക്ക് മാത്രമാണ് ഗാലറികളിലേക്ക് പ്രവേശനം അനുവദിക്കുക. ഫിനിഷിങ് പോയിന്റിലേക്കുള്ള പാതയിൽ പ്രത്യേക ബാരിക്കേഡുകൾ തീർത്തിട്ടുണ്ട്.

QR കോഡ് അടങ്ങിയ പാസുകളാണ് ഉപയോഗിക്കുന്നത്. വ്യാജ പാസുകളുമായി എത്തുന്നവർക്കും അനധികൃതമായി ആളെക്കയറ്റുന്നവർക്കുമെതിരെ ശക്തമായ നിയമനടപടി ഉണ്ടാകുമെന്ന് അധികൃതർ മുന്നറിയിപ്പ് നൽകി.

വള്ളംകളിക്ക് ശേഷം തിരികെ പോകുന്നവർക്കായി ജലഗതാഗത വകുപ്പിന്റെ പ്രത്യേക സർവീസുകളും ഏർപ്പെടുത്തിയിട്ടുണ്ട്. സുരക്ഷയ്ക്കായി കർശനമായ പൊലീസ് ക്രമീകരണങ്ങളും നടപ്പിലാക്കിയിട്ടുണ്ട്.