വിദേശയാത്ര പ്ലാന്‍ ചെയ്യുകയാണോ? ഇന്ത്യൻ പാസ്‌പോർട്ട് ഉടമകൾക്ക് പുതിയ വിസ ചട്ടങ്ങളുമായി നാല് രാജ്യങ്ങൾ

2026-ൽ വിദേശയാത്രകൾ പ്ലാൻ ചെയ്യുന്ന ഇന്ത്യൻ പാസ്‌പോർട്ട് ഉടമകൾക്കായി പ്രധാനപ്പെട്ട യാത്രാ മുന്നറിയിപ്പ് പുറത്തുവന്നിരിക്കുന്നു.

ഇറാൻ, ബൊളീവിയ, കേപ് വെർഡെ, നിക്കരാഗ്വ എന്നീ നാല് രാജ്യങ്ങളാണ് ഇന്ത്യക്കാർക്കായുള്ള തങ്ങളുടെ പ്രവേശന ചട്ടങ്ങളിൽ പുതിയ മാറ്റങ്ങൾ വരുത്തിയിരിക്കുന്നത്. ഇതോടെ മുൻപുണ്ടായിരുന്ന ലളിതമായ യാത്രാ സൗകര്യങ്ങൾ ഇനി മുതൽ യാത്രക്കാർക്ക് ലഭ്യമല്ല.

ഇറാനിൽ ഇനി വിസ രഹിത പ്രവേശനമില്ല
ഇന്ത്യൻ വിനോദസഞ്ചാരികൾ ഏറെ ഇഷ്ടപ്പെടുന്ന രാജ്യങ്ങളിലൊന്നായ ഇറാൻ, ഇന്ത്യക്കാർക്കായി ഏർപ്പെടുത്തിയിരുന്ന വിസ രഹിത പ്രവേശന സൗകര്യം പൂർണ്ണമായി പിൻവലിച്ചു. പേർഷ്യൻ വാസ്‍തുവിദ്യയും സിൽക്ക് റൂട്ട് പൈതൃകവും കൊണ്ട് സഞ്ചാരികളെ ആകർഷിക്കുന്ന ടെഹ്റാൻ, ഇസ്‍ഫഹാൻ, ഷിറാസ്, യസ്‍ദ് തുടങ്ങിയ നഗരങ്ങളും, പെർസെപൊളിസ്, നഖ്ഷെ ജഹാൻ സ്ക്വയർ തുടങ്ങിയ യുനെസ്‌കോ ലോക പൈതൃക കേന്ദ്രങ്ങളും കാണാൻ ഇനി മുതൽ പ്രത്യേക അനുമതി ആവശ്യമാണ്.

ബൊളീവിയയിലേക്ക് പോകാൻ മുൻകൂട്ടി വിസ വേണം
ബൊളീവിയയും തങ്ങളുടെ യാത്രാ ചട്ടങ്ങൾ കൂടുതൽ കർശനമാക്കിയിട്ടുണ്ട്. ഇനി മുതൽ ഇന്ത്യൻ പാസ്‌പോർട്ട് ഉടമകൾ യാത്ര പുറപ്പെടുന്നതിന് മുൻപായി തന്നെ വിസ നിർബന്ധമായും കരസ്ഥമാക്കിയിരിക്കണം.

ലോകത്തിലെ ഏറ്റവും വലിയ ഉപ്പുപ്രദേശമായ സലാർ ഡി ഉയൂനി, ടിറ്റിക്കാക്ക തടാകം, ആൻഡീസ് പർവതനിരകൾ എന്നിവയാണ് ഇവിടത്തെ പ്രധാന വിനോദസഞ്ചാര കേന്ദ്രങ്ങൾ. കേപ് വെർഡെയിൽ വിസ ഓൺ അറൈവൽ നിർത്തലാക്കി
അറ്റ്ലാന്റിക് സമുദ്രത്തിലെ മനോഹരമായ ദ്വീപ് രാഷ്ട്രമായ കേപ് വെർഡെ, ഇന്ത്യ ഉൾപ്പെടെയുള്ള വിവിധ രാജ്യങ്ങളിലെ പൗരന്മാർക്കായി നൽകിവന്നിരുന്ന വിസ ഓൺ അറൈവൽ സൗകര്യം നിർത്തലാക്കിയിട്ടുണ്ട്.

അതിനാൽ വിമാനത്താവളത്തിൽ എത്തിച്ചേർന്ന് വിസ നേടാമെന്ന രീതി ഒഴിവാക്കി, യാത്രയ്ക്ക് മുൻപ് തന്നെ ആവശ്യമായ യാത്രാനുമതി ഉറപ്പുവരുത്തേണ്ടതാണ്. നിക്കരാഗ്വയിലേക്കും മുൻകൂർ യാത്രാനുമതി നിർബന്ധം
മധ്യ അമേരിക്കൻ രാജ്യമായ നിക്കരാഗ്വയും ഇന്ത്യൻ പൗരന്മാർക്കായുള്ള പ്രവേശന നടപടിക്രമങ്ങൾ പുതുക്കിയിട്ടുണ്ട്.

ഇനി മുതൽ ഇവിടേക്ക് യാത്ര ചെയ്യാനും മുൻകൂട്ടി യാത്രാനുമതി നേടിയിരിക്കണം. കോളനിവൽക്കരണ കാലഘട്ടത്തിലെ ചരിത്രപ്രധാനമായ നഗരങ്ങൾ, സജീവമായ അഗ്നിപർവതങ്ങൾ, മനോഹരമായ പസഫിക് തീരങ്ങൾ എന്നിവയാണ് ഈ രാജ്യത്തെ പ്രധാന ആകർഷണങ്ങൾ.

ഇന്ത്യക്കാർ അറിഞ്ഞിരിക്കേണ്ട വസ്തുതകൾ
ഏറ്റവും പുതിയ ഹെൻലി പാസ്‌പോർട്ട് സൂചിക പ്രകാരം ഇന്ത്യൻ പാസ്‌പോർട്ട് ഉടമകൾക്ക് ഇപ്പോഴും 55 രാജ്യങ്ങളിലേക്ക് വിസ രഹിതമായോ, വിസ ഓൺ അറൈവൽ വഴിയോ, ഇലക്ട്രോണിക് യാത്രാനുമതിയോടെയോ യാത്ര ചെയ്യുവാൻ സാധിക്കും.

എങ്കിലും വിവിധ രാജ്യങ്ങളുടെ കുടിയേറ്റ നയങ്ങളിൽ നിരന്തരം മാറ്റങ്ങൾ വരുന്നതിനാൽ, യാത്രാ ടിക്കറ്റുകൾ ബുക്ക് ചെയ്യുന്നതിന് മുൻപ് ഏറ്റവും പുതിയ വിസ നിബന്ധനകൾ കൃത്യമായി പരിശോധിക്കുന്നത് അനിവാര്യമാണ്. യാത്രയ്ക്ക് മുൻപ് ശ്രദ്ധിക്കേണ്ട

കാര്യങ്ങൾ
വിദേശയാത്രകൾ ആസൂത്രണം ചെയ്യുന്നതിന് മുൻപ് അതത് രാജ്യങ്ങളുടെ ഔദ്യോഗിക കുടിയേറ്റ വകുപ്പിന്റെയോ എംബസിയുടെയോ വെബ്‌സൈറ്റ് സന്ദർശിച്ച് വിസ ചട്ടങ്ങൾ പരിശോധിക്കുക. പാസ്‌പോർട്ടിന്റെ കാലാവധി ഉറപ്പാക്കുക, ഹോട്ടൽ ബുക്കിങ്, മടക്കയാത്രാ ടിക്കറ്റ്, യാത്രാ ഇൻഷുറൻസ് എന്നിവയുടെ ഡിജിറ്റൽ, പ്രിന്റ് പകർപ്പുകൾ കൈവശം കരുതുക, വിസ ആവശ്യമാണെങ്കിൽ ആഴ്ചകൾക്ക് മുൻപ് തന്നെ അപേക്ഷ സമർപ്പിക്കുക തുടങ്ങിയ കാര്യങ്ങൾ കർശനമായി പാലിക്കേണ്ടതുണ്ട്.

അന്താരാഷ്ട്ര കുടിയേറ്റ ചട്ടങ്ങളിലെ ഈ മാറ്റങ്ങൾ തുടരുമെന്നാണ് വിലയിരുത്തപ്പെടുന്നത്. അടുത്തിടെ തായ്‌ലൻഡും ഇന്ത്യക്കാർക്കുള്ള പ്രവേശന ചട്ടങ്ങളിൽ മാറ്റങ്ങൾ വരുത്തിയിരുന്നു.

അതിനാൽ വിദേശയാത്രകൾ പ്ലാൻ ചെയ്യുന്നവർ പുതിയ കുടിയേറ്റ നിബന്ധനകൾ മുൻകൂട്ടി മനസിലാക്കുകയും, യാത്രാ പദ്ധതികളിൽ അതിനുതകുന്ന രീതിയിൽ സമയവും സാമ്പത്തിക തയ്യാറെടുപ്പുകളും ഉറപ്പാക്കണമെന്നും വിദഗ്ധർ നിർദ്ദേശിക്കുന്നു.