ഐഫോൺ 18ഇ മോഡലിൽ റാം ശേഷി വർധിപ്പിക്കാൻ ആപ്പിൾ; വിലയും ഉയർന്നേക്കുമെന്ന് സൂചന

ആഗോളതലത്തിൽ മെമ്മറി ചിപ്പുകളുടെയും മറ്റ് ഘടകങ്ങളുടെയും ലഭ്യതക്കുറവ് സ്‍മാർട്ട്ഫോൺ വിപണിയെ പ്രതികൂലമായി ബാധിക്കുന്ന പശ്ചാത്തലത്തിൽ, വ്യത്യസ്തമായ തന്ത്രവുമായി രംഗത്തുവരാൻ ഒരുങ്ങി പ്രമുഖ ടെക് ഭീമനായ ആപ്പിൾ. അടുത്ത തലമുറയിൽ പെടുന്ന ഏറ്റവും വിലക്കുറവുള്ള മോഡലായി കരുതപ്പെടുന്ന ഐഫോൺ 18ഇ-യിൽ റാം ശേഷി വർധിപ്പിക്കുമെന്നാണ് പുതിയ വിവരങ്ങൾ പുറത്തുവരുന്നത്.

ജിഎഫ് സെക്യൂരിറ്റീസിലെ അനലിസ്റ്റ് ജെഫ് പു പുറത്തുവിട്ട റിപ്പോർട്ട് പ്രകാരം, 2027 മാർച്ച് മാസത്തിൽ വിപണിയിലെത്തുമെന്ന് പ്രതീക്ഷിക്കുന്ന ഐഫോൺ 18ഇ-യിൽ 9 ജി.ബി. റാം ലഭ്യമാകും.

നിലവിലുള്ള ഐഫോൺ 17ഇ-യിൽ 8 ജി.ബി. റാമാണുള്ളത്. പ്രമുഖ ആപ്പിൾ അനലിസ്റ്റ് മിങ്-ചി കുവോ നേരത്തെ സമാനമായ പ്രവചനം നടത്തിയിരുന്നു.

ഇതോടെ വരാനിരിക്കുന്ന മോഡലിലെ റാം വർധനവിനെക്കുറിച്ചുള്ള സൂചനകൾക്ക് കൂടുതൽ സ്ഥിരീകരണമാകുകയാണ്. മറുവശത്ത്, ആഗോള മെമ്മറി പ്രതിസന്ധി കാരണം മറ്റ് പല പ്രമുഖ സ്‍മാർട്ട്ഫോൺ നിർമ്മാതാക്കളും പുതിയ മോഡലുകളിൽ മെമ്മറി ശേഷി വെട്ടിക്കുറയ്ക്കുന്ന സമീപനമാണ് സ്വീകരിക്കുന്നത്.

ലഭ്യമായ വിവരങ്ങൾ അനുസരിച്ച്, ഗൂഗിളിന്റെ വരാനിരിക്കുന്ന പിക്സൽ 11 പ്രോയിൽ 16 ജി.ബി. റാമിന് പകരം 12 ജി.ബി. റാം നൽകാൻ സാധ്യതയുണ്ട്. ഈ പ്രത്യേക സാഹചര്യത്തിലാണ് ആപ്പിൾ റാം കൂട്ടുമെന്ന വാർത്തകൾ ടെക് ലോകത്തിന്റെ ശ്രദ്ധ ആകർഷിക്കുന്നത്.

ഇതിനുപുറമേ, മറ്റൊരു സുപ്രധാനമായ മാറ്റത്തിനും കമ്പനി തയ്യാറെടുക്കുന്നതായാണ് സൂചനകൾ. സെപ്റ്റംബർ മാസത്തിൽ നടക്കുന്ന ലോഞ്ച് ചടങ്ങിൽ ഐഫോൺ 18 പ്രോ, ഐഫോൺ 18 പ്രോ മാക്സ്, ഐഫോൺ 18 അൾട്ര (അഥവാ ഐഫോൺ 18 ഫോൾഡ്) എന്നീ പ്രോ മോഡലുകൾ മാത്രമായിരിക്കും അവതരിപ്പിക്കുക.

സാധാരണ ഐഫോൺ 18, ഐഫോൺ 18ഇ, കൂടാതെ ഐഫോൺ എയർ 2 എന്നിവ അടുത്ത വർഷമായിരിക്കും പുറത്തിറങ്ങുക. ഈ വർഷം മൂന്ന് മോഡലുകളും അടുത്ത വർഷം മൂന്ന് മോഡലുകളും എന്ന പുതിയ വിപണന തന്ത്രമാണ് ആപ്പിൾ പരീക്ഷിക്കുന്നത്.

അതേസമയം, റാം വർധനവിനൊപ്പം വരാനിരിക്കുന്ന പുതിയ ഐഫോണുകളുടെ വിപണി വിലയും ഗണ്യമായി ഉയർന്നേക്കുമെന്നാണ് വിലയിരുത്തപ്പെടുന്നത്. പ്രത്യേകിച്ചും പ്രോ മോഡലുകൾക്ക് 250 മുതൽ 300 ഡോളർ വരെ (ഏകദേശം 28,000 രൂപ) വില വർധന ഉണ്ടാകാനിടയുണ്ട്.

അനലിസ്റ്റുകളായ ജെഫ് പു, മോർഗൻ സ്റ്റാൻലിയിലെ എറിക് വുഡ്രിങ് എന്നിവരുടെ നിരീക്ഷണപ്രകാരം, പുതിയ എ20 പ്രോ ചിപ്പ് നിർമിക്കുന്നതിനായി ഉപയോഗിക്കുന്ന ടി.എസ്.എം.സി.യുടെ 2 നാനോമീറ്റർ നിർമ്മാണ സാങ്കേതികവിദ്യയുടെ ഉയർന്ന ചെലവും, ആർട്ടിഫിഷ്യൽ ഇന്റലിജൻസ് ഹാർഡ്‌വെയറുകളുടെ വർധിച്ച ആവശ്യം മൂലമുള്ള ഡി-റാം, നാൻഡ് മെമ്മറി വിലക്കയറ്റവുമാണ് ആപ്പിളിന്റെ നിർമ്മാണച്ചെലവ് വർധിപ്പിക്കുന്നത്. ഈ അധിക ബാധ്യത കമ്പനി സ്വയം ഏറ്റെടുക്കുന്നതിന് പകരം അന്തിമമായി ഉപഭോക്താക്കളുടെ മേൽ ചുമത്താനാണ് സാധ്യതയെന്നാണ് റിപ്പോർട്ടുകൾ വ്യക്തമാക്കുന്നത്.