പശ്ചിമ ബംഗാളിലെ ഹൗറ ജില്ലയിലുണ്ടായ ഞെട്ടിപ്പിക്കുന്ന സംഭവത്തിൽ, പൊതുസ്ഥലത്ത് യുവതിയോട് അപമര്യാദയായി പെരുമാറിയ യുവാവിനെ വനിതാ പോലീസ് ഉദ്യോഗസ്ഥ നേരിട്ട് പിടികൂടി നിയമത്തിന് മുന്നിലെത്തിച്ചു. ഔദ്യോഗിക കൃത്യനിർവഹണത്തിലല്ലാതിരുന്ന സമയത്താണ് വനിതാ കോൺസ്റ്റബിൾ ഈ ധീരമായ ഇടപെടൽ നടത്തിയത്.
ബി.ടി റോഡിൽ വച്ച് നടന്ന സംഭവത്തിൽ, സ്കൂട്ടറിൽ യാത്ര ചെയ്യുകയായിരുന്ന വനിതാ കോൺസ്റ്റബിളിന് നേരെ പ്രതി മോശം പരാമർശങ്ങൾ നടത്തുകയും നഗ്നതാ പ്രദർശനം നടത്തുകയുമായിരുന്നു. താൻ നേരിടുന്നത് ഒരു പോലീസ് ഉദ്യോഗസ്ഥയെയാണെന്ന് അറിയാതെയാണ് പ്രതി ഇത്തരത്തിൽ പെരുമാറിയത്.
പ്രതിയുടെ പ്രവൃത്തിയിൽ അസ്വസ്ഥയായ ഉദ്യോഗസ്ഥ, അയാളെ ചോദ്യം ചെയ്യാൻ മുതിരുകയും തുടർന്ന് രക്ഷപ്പെടാൻ ശ്രമിച്ച യുവാവിന്റെ കോളറിൽ പിടികൂടുകയുമായിരുന്നു. ഇതിനുശേഷം ഏകദേശം 400 മീറ്ററോളം ദൂരം പ്രതിയെ കോളറിൽ പിടിച്ചുനടത്തിക്കൊണ്ട് അവർ സമീപത്തുള്ള പോലീസ് സ്റ്റേഷനിൽ എത്തിക്കുകയായിരുന്നു.
ഈ ദൃശ്യങ്ങൾ വഴിയാത്രക്കാർ പകർത്തി സമൂഹമാധ്യമങ്ങളിൽ പങ്കുവെച്ചതോടെ വലിയ ശ്രദ്ധയാണ് വിഷയത്തിന് ലഭിച്ചത്. പൊതുസ്ഥലത്ത് വെച്ച് സ്വകാര്യാവയവങ്ങൾ പ്രദർശിപ്പിക്കുകയും അശ്ലീല ചേഷ്ടകൾ കാണിക്കുകയും ചെയ്തെന്ന പരാതിയിൽ, ആകാശ് ഘോഷ് എന്ന ഡെലിവറി ജീവനക്കാരനെതിരെ പോലീസ് കേസെടുത്തു.
പ്രതിയെ കസ്റ്റഡിയിലെടുത്ത് നിയമനടപടികൾ ആരംഭിച്ചതായി അധികൃതർ അറിയിച്ചു. സംഭവത്തിൽ സാക്ഷിമൊഴികളും തെളിവുകളും പരിശോധിച്ച ശേഷം തുടർനടപടികൾ സ്വീകരിക്കുമെന്നും പോലീസ് വ്യക്തമാക്കി.
വനിതാ ഉദ്യോഗസ്ഥയുടെ സമയോചിതമായ ഇടപെടലിനെ പ്രശംസിച്ച് സമൂഹമാധ്യമങ്ങളിൽ വലിയ തോതിലുള്ള പിന്തുണയാണ് ഉയരുന്നത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
