ഐബിഎം ഓഹരികളിൽ ചരിത്രപരമായ തകർച്ച; ആഗോള ടെക് വിപണിയിൽ ആശങ്ക

ലോകത്തെ മുൻനിര സാങ്കേതികവിദ്യാ കമ്പനിയായ ഐബിഎം വലിയ സാമ്പത്തിക പ്രതിസന്ധിയിലേക്ക്. യുഎസ് വിപണിയിൽ ഒറ്റദിവസം കൊണ്ട് കമ്പനിയുടെ ഓഹരി മൂല്യത്തിൽ 26 ശതമാനം ഇടിവാണ് രേഖപ്പെടുത്തിയത്.

കഴിഞ്ഞ 60 വർഷത്തിനിടയിൽ കമ്പനി നേരിടുന്ന ഏറ്റവും വലിയ തിരിച്ചടിയാണിത്. കമ്പനിയുടെ വരുമാനം പ്രതീക്ഷിച്ചതിലും താഴേക്ക് കൂപ്പുകുത്തുമെന്ന് അധികൃതർ തന്നെ സമ്മതിച്ചതോടെ നിക്ഷേപകർ ഓഹരികൾ കൂട്ടത്തോടെ വിറ്റഴിക്കുകയായിരുന്നു.

ഈ പ്രതിസന്ധിക്ക് പിന്നിലെ കാരണങ്ങൾ വിശദീകരിച്ച് ഐബിഎം സിഇഒ അരവിന്ദ് കൃഷ്ണ നിക്ഷേപകർക്ക് കത്തയച്ചിരുന്നു. “ആർട്ടിഫിഷ്യൽ ഇന്റലിജൻസിന്റെ (എഐ) കാലത്ത് കമ്പനികൾ സോഫ്റ്റ്‍വെയറുകളിൽ നിക്ഷേപിക്കാൻ തയാറാകുന്നില്ല” എന്ന് അദ്ദേഹം വ്യക്തമാക്കി.

സോഫ്റ്റ്‌വെയറുകൾക്ക് പകരം കമ്പനികൾ ഇപ്പോൾ തങ്ങളുടെ നിക്ഷേപം സെർവറുകൾ, മെമ്മറി ചിപ്പുകൾ, സ്റ്റോറേജ് തുടങ്ങിയവയിലേക്കാണ് മാറ്റുന്നതെന്ന് അദ്ദേഹം കൂട്ടിച്ചേർത്തു. ഈ മാറ്റം മുൻകൂട്ടി കാണുന്നതിലോ അതനുസരിച്ച് കരാറുകൾ ഉറപ്പിക്കുന്നതിലോ തങ്ങൾക്ക് വീഴ്ച സംഭവിച്ചതായി അരവിന്ദ് കൃഷ്ണ തുറന്നുസമ്മതിച്ചു.

കമ്പനിയുടെ സാമ്പത്തിക പ്രകടനത്തിലെ ഈ മാന്ദ്യം വിപണിയെ ഞെട്ടിച്ചിരിക്കുകയാണ്. കഴിഞ്ഞ വർഷത്തേക്കാൾ 1% വരുമാന വളർച്ച മാത്രമാണ് ഈ വർഷത്തെ രണ്ടാം പാദത്തിൽ ഐബിഎം പ്രതീക്ഷിക്കുന്നത്.

രണ്ടാം പാദത്തിൽ 1786 കോടി ഡോളർ വരുമാനം നേടുമെന്നായിരുന്നു നിരീക്ഷകരുടെ കണക്കുകൂട്ടലെങ്കിലും, 1720 കോടി ഡോളർ മാത്രമാണ് കമ്പനിയുടെ ഇപ്പോഴത്തെ പ്രതീക്ഷ. ഈ തിരിച്ചടിയിലൂടെ ഏകദേശം 7000 കോടി ഡോളറിന്റെ (ഏകദേശം 6.7 ലക്ഷം കോടി രൂപ) വിപണി മൂല്യമാണ് ഒറ്റദിവസം കൊണ്ട് ഐബിഎമ്മിന് നഷ്ടമായത്.

ഇന്ത്യൻ വിപണിയിലെ പ്രതിഫലനം ഐബിഎമ്മിന്റെ തകർച്ചയുടെ അലയൊലികൾ ഇന്ത്യൻ ഐടി ഓഹരികളിലും പ്രകടമായി. നിഫ്റ്റി ഐടി സൂചിക ഒരു ശതമാനത്തോളം താഴേക്ക് പോയി.

ഇൻഫോസിസ്, വിപ്രോ എന്നിവയുടെ ഓഹരികൾ ഒരു ശതമാനം വീതം ഇടിഞ്ഞപ്പോൾ, ടിസിഎസ്, പെർസിസ്റ്റന്റ് സിസ്റ്റംസ് എന്നിവ അര ശതമാനത്തോളം നഷ്ടം രേഖപ്പെടുത്തി. എന്നിരുന്നാലും, യുഎസിലെ പണപ്പെരുപ്പം പ്രതീക്ഷിച്ചതിലും കുറവായത് ഇന്ത്യൻ വിപണിക്ക് നേരിയ ആശ്വാസം നൽകുന്നുണ്ട്.

ഇത് ഭാവിയിൽ പലിശ നിരക്കുകൾ വർധിപ്പിക്കുന്നതിലെ സാധ്യത കുറയ്ക്കുമെന്നതിനാൽ, വിദേശ നിക്ഷേപങ്ങൾ ഇന്ത്യയിലേക്ക് കൂടുതൽ എത്തുമെന്ന പ്രതീക്ഷയിലാണ് നിരീക്ഷകർ.