നെന്മാറ ഇരട്ടക്കൊലപാതകം: വിധി ഇന്ന്, കാത്തിരിപ്പിൽ നാട്

കേരളത്തെ നടുക്കിയ നെന്മാറ ഇരട്ടക്കൊലപാതക കേസിൽ അന്തിമ വിധി ഇന്ന് പുറത്തുവരും. പോത്തുണ്ടി സ്വദേശികളായ സുധാകരനെയും അമ്മ ലക്ഷ്മിയെയും കൊലപ്പെടുത്തിയ കേസിലെ പ്രതി ചെന്താമര കുറ്റക്കാരനാണോയെന്ന കാര്യത്തിൽ പാലക്കാട് അഡീഷണൽ സെഷൻസ് കോടതി ഇന്ന് വിധി പ്രസ്താവിക്കും.

സംഭവം നടന്ന് ഒന്നര വർഷം പിന്നിടുമ്പോഴാണ് കേസിൽ നിർണ്ണായകമായ വിധി വരുന്നത്. സംഭവത്തിന്റെ പശ്ചാത്തലം
2025 ജനുവരി 27-നാണ് അയൽവാസികളായ സുധാകരനെയും ലക്ഷ്മിയെയും പ്രതി വെട്ടിക്കൊലപ്പെടുത്തിയത്.

കൊലപാതകത്തിന് ശേഷം ഒളിവിൽ പോയ പ്രതിയെ കണ്ടെത്താൻ വലിയ തോതിലുള്ള തിരച്ചിലാണ് നടന്നത്. മലയിടുക്കുകളിൽ പൊലീസും നാട്ടുകാരും സംയുക്തമായി നടത്തിയ രണ്ട് ദിവസത്തെ തിരച്ചിലിനൊടുവിൽ, 28-ാം തീയതി രാത്രി 11 മണിയോടെ പോത്തുണ്ടി മാട്ടായി വനമേഖലയിൽ നിന്നാണ് ചെന്താമരയെ പൊലീസ് കസ്റ്റഡിയിലെടുത്തത്.

കേസിന്റെ നാൾവഴികൾ
അന്വേഷണത്തിന്റെ ഭാഗമായി ഫെബ്രുവരി അഞ്ചിന് എലവഞ്ചേരിയിൽ വെച്ച് കൃത്യത്തിന് ഉപയോഗിച്ച കത്തി കണ്ടെടുത്തു. പ്രതി നേരത്തെ 2019-ൽ പോത്തുണ്ടി സ്വദേശി സജിതയെ കൊലപ്പെടുത്തിയ കേസിലെ പ്രതിയായിരുന്നു.

ഈ കേസിൽ ജാമ്യത്തിലിരിക്കെയാണ് ഇയാൾ വീണ്ടും കൊലപാതകം നടത്തിയത്. തുടർന്ന് ഫെബ്രുവരി 18-ന് ഇയാളുടെ പഴയ കേസിലെ ജാമ്യം കോടതി റദ്ദാക്കി.

2022-ൽ ജാമ്യത്തിലിറങ്ങിയ പ്രതി ജാമ്യവ്യവസ്ഥകൾ ലംഘിച്ചാണ് പോത്തുണ്ടിയിൽ താമസിച്ചുവന്നതെന്ന് അന്വേഷണ സംഘം കണ്ടെത്തിയിരുന്നു. വിചാരണയും തെളിവുകളും
കേസിൽ മാർച്ച് മൂന്നിന് ചിറ്റൂർ ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയിൽ സാക്ഷികളുടെ രഹസ്യമൊഴി രേഖപ്പെടുത്തി.

തുടർന്ന് മാർച്ച് 25-ന് പൊലീസ് കുറ്റപത്രം സമർപ്പിച്ചു. 480 പേജുള്ള കുറ്റപത്രത്തിൽ 132 സാക്ഷികളാണ് ഉണ്ടായിരുന്നത്.

ഫോറൻസിക് ഫലങ്ങൾ ഉൾപ്പെടെയുള്ള ശാസ്ത്രീയ തെളിവുകളും മുപ്പതിലധികം രേഖകളും കോടതിയിൽ ഹാജരാക്കി. ഫെബ്രുവരി 23 മുതൽ മെയ് 6 വരെ നീണ്ടുനിന്ന വിചാരണയിൽ 132 സാക്ഷികളിൽ നാല് പേർ കൂറുമാറിയിരുന്നു.