ഉപജീവനമാർഗമായ മണ്ണുമാന്തിയന്ത്രം വനംവകുപ്പ് പിടിച്ചെടുത്തു; അഞ്ച് വർഷമായി നീതി തേടി അലയുന്ന യുവാവ് പ്രതിഷേധവുമായി രംഗത്ത്

ഓരോ ഫയലും ഓരോ ജീവിതമാണെന്ന സർക്കാർ നിർദേശം നിലനിൽക്കെ, ഒരൊറ്റ സംഭവത്തിൽ ഒരു യുവാവിന്റെ ജീവിതം വഴിമുട്ടിയ അവസ്ഥയാണ് ഇപ്പോൾ പുറത്തുവരുന്നത്. കഞ്ഞിക്കുഴി പഴയരിക്കണ്ടം സ്വദേശിയായ അജീഷ് എന്ന യുവാവാണ് തന്റെ ജീവിതോപാധിയായ മണ്ണുമാന്തിയന്ത്രം അഞ്ച് വർഷമായി വിട്ടുനൽകാത്തതിനെ തുടർന്ന് പ്രതിഷേധവുമായി രംഗത്തെത്തിയത്.

ചെമ്പൻകുഴി നഗരംപാറ സെക്‌ഷൻ ഫോറസ്റ്റ് ഓഫിസ് വളപ്പിലെത്തി മണ്ണുമാന്തിയന്ത്രത്തിന് മുകളിൽ കയറി പെട്രോളൊഴിച്ച് ആത്മഹത്യാഭീഷണി മുഴക്കുകയായിരുന്നു അദ്ദേഹം. സംഭവത്തിന്റെ പശ്ചാത്തലം
2020-ൽ കഞ്ഞിക്കുഴിയിൽ വീടുനിർമാണത്തിനായി മണ്ണ് നീക്കുന്ന ജോലി ചെയ്യുന്നതിനിടെയാണ് വനംവകുപ്പ് ഉദ്യോഗസ്ഥർ സ്ഥലത്തെത്തുന്നത്.

വനംവകുപ്പിന്റെ സ്ഥലമാണിതെന്ന് ആരോപിച്ച് അധികൃതർ അജീഷിനോട് മണ്ണുമാന്തിയന്ത്രം ചെമ്പൻകുഴി ഫോറസ്റ്റ് ഓഫിസിലേക്ക് മാറ്റാൻ ആവശ്യപ്പെട്ടു. തുടർന്ന് കേസെടുക്കുകയും വാഹനം കസ്റ്റഡിയിലെടുക്കുകയുമായിരുന്നു.

തുടരുന്ന ദുരിതം
റവന്യു പുറമ്പോക്ക് എന്ന് രേഖപ്പെടുത്തിയിട്ടുള്ള സ്ഥലത്ത് വീട് നിർമാണത്തിനായി തറ ഒരുക്കുമ്പോൾ വനംവകുപ്പിന് സംഭവിച്ച നഷ്ടം 500 രൂപ മാത്രമാണെന്ന് മഹസറിൽ വ്യക്തമാക്കുന്നുണ്ട്. എന്നാൽ, ഈ തുച്ഛമായ തുകയുടെ പേരിൽ അഞ്ച് വർഷമായി വാഹനം വിട്ടുനൽകാതെ ഉദ്യോഗസ്ഥർ കസ്റ്റഡിയിൽ വെച്ചിരിക്കുകയാണ്.

നേര്യമംഗലം നഗരംപാറ റേഞ്ച് ഓഫിസറുടെ നിർദേശപ്രകാരമാണ് വാഹനം പിടിച്ചുവെച്ചിരിക്കുന്നത്. കോടതി ഉത്തരവുണ്ടായിട്ടും വാഹനം തിരികെ നൽകാൻ വനപാലകർ തയ്യാറായില്ലെന്ന് അജീഷ് ആരോപിക്കുന്നു.

വർഷങ്ങൾ നീണ്ട നിയമപോരാട്ടത്തിനും ഓഫിസുകൾ കയറിയിറങ്ങിയുള്ള അപേക്ഷകൾക്കും ശേഷവും നീതി ലഭിക്കാത്തതോടെ അജീഷ് കടുത്ത കടക്കെണിയിലേക്ക് വീണിരിക്കുകയാണ്.

പ്രതിഷേധം
നാല് മണിക്കൂറോളം നീണ്ടുനിന്ന നാടകീയമായ പ്രതിഷേധത്തിനൊടുവിൽ വനംവകുപ്പ് ഉദ്യോഗസ്ഥരും കവളങ്ങാട് പഞ്ചായത്ത് ജനപ്രതിനിധികളും ഊന്നുകല്ല് പൊലീസ് ഇൻസ്പെക്ടറും സ്ഥലത്തെത്തി ചർച്ചകൾ നടത്തി. ഡിഎഫ്ഒയുമായി ചർച്ച ചെയ്ത് വിഷയത്തിൽ അടിയന്തര പരിഹാരം കാണാമെന്ന ഉറപ്പിന്മേലാണ് അജീഷ് പ്രതിഷേധം അവസാനിപ്പിച്ചത്.

തുരുമ്പെടുത്ത് പൂർണമായും നശിച്ച അവസ്ഥയിലാണ് മണ്ണുമാന്തിയന്ത്രം ഇപ്പോൾ.