കീവിൽ റഷ്യൻ ബാലിസ്റ്റിക് മിസൈൽ ആക്രമണം; നാറ്റോ ഉച്ചകോടിക്ക് മുന്നോടിയായി സംഘർഷം രൂക്ഷം

ഉക്രെയ്ൻ തലസ്ഥാനമായ കീവിൽ റഷ്യ വീണ്ടും ശക്തമായ ബാലിസ്റ്റിക് മിസൈൽ ആക്രമണം അഴിച്ചുവിട്ടു. തിങ്കളാഴ്ച പുലർച്ചെ നഗരത്തിന്റെ വിവിധ ഭാഗങ്ങളിൽ വലിയ സ്ഫോടന ശബ്ദങ്ങൾ കേട്ടതായി റിപ്പോർട്ടുകളുണ്ട്.

തുർക്കിയിൽ നടക്കാനിരിക്കുന്ന നിർണായകമായ നാറ്റോ ഉച്ചകോടിക്ക് ഒരു ദിവസം മുമ്പാണ് റഷ്യയുടെ ഈ സൈനിക നീക്കം. വ്യോമാക്രമണത്തിന് തൊട്ടുമുമ്പായി നഗരത്തിൽ മുന്നറിയിപ്പ് സൈറണുകൾ മുഴങ്ങിയിരുന്നു.

ബാലിസ്റ്റിക് മിസൈലുകൾക്ക് പുറമെ ഡ്രോണുകളും ക്രൂയിസ് മിസൈലുകളും ഉപയോഗിച്ചാണ് ആക്രമണം നടത്തിയതെന്ന് ഉക്രെയ്ൻ വ്യോമസേന വ്യക്തമാക്കി. മിസൈൽ അവശിഷ്ടങ്ങൾ പതിച്ചതിനെത്തുടർന്ന് കീവിലെ രണ്ട് ജില്ലകളിൽ തീപിടിത്തവും നാശനഷ്ടങ്ങളും ഉണ്ടായതായി മേയർ വിറ്റാലി ക്ലിറ്റ്ഷ്കോ അറിയിച്ചു.

റഷ്യ പുതിയൊരു വലിയ ആക്രമണത്തിന് പദ്ധതിയിടുന്നതായി ഇന്റലിജൻസ് മുന്നറിയിപ്പ് നൽകിയിട്ടുണ്ടെന്ന് ഉക്രെയ്ൻ പ്രസിഡന്റ് വോളോഡിമിർ സെലൻസ്കി ഞായറാഴ്ച വ്യക്തമാക്കിയിരുന്നു. തന്റെ എക്സ് പോസ്റ്റിലൂടെ സെലൻസ്കി പങ്കുവെച്ചതിങ്ങനെ: “അമേരിക്കയുടെ സ്വാതന്ത്ര്യദിനത്തിന് ശേഷവും അങ്കാറയിലെ നാറ്റോ ഉച്ചകോടിക്ക് മുൻപുമായി റഷ്യ പുതിയൊരു ആക്രമണത്തിന് ഒരുങ്ങുകയാണെന്ന് ഇന്റലിജൻസ് വീണ്ടും സൂചന നൽകുന്നു.

ഇത് പുടിന്റെ ഒരു പതിവ് ശൈലിയാണ്. കൂടുതൽ നാശം വിതയ്ക്കാനും ആളുകളെ കൊല്ലാനുമാണ് റഷ്യയുടെ ശ്രമം”.

കഴിഞ്ഞ വ്യാഴാഴ്ച കീവിൽ നടന്ന ശക്തമായ ആക്രമണത്തിൽ 30 പേർ കൊല്ലപ്പെട്ടിരുന്നു. യുദ്ധം തുടങ്ങിയതിന് ശേഷമുള്ള ഏറ്റവും വലിയ മൂന്നാമത്തെ ആക്രമണമായാണ് ഇത് വിലയിരുത്തപ്പെടുന്നത്.

കിഴക്കൻ ഡോണെറ്റ്സ്ക് മേഖല പൂർണമായി പിടിച്ചെടുക്കാനാണ് റഷ്യയുടെ നീക്കം. അതേസമയം, റഷ്യയിലെ എണ്ണ ശുദ്ധീകരണ ശാലകൾ, തുറമുഖങ്ങൾ, സൈനിക ഫാക്ടറികൾ എന്നിവ ലക്ഷ്യമിട്ട് ഉക്രെയ്നും പ്രത്യാക്രമണങ്ങൾ ശക്തമാക്കിയിട്ടുണ്ട്.

അങ്കാറയിൽ ചൊവ്വാഴ്ച ആരംഭിക്കുന്ന നാറ്റോ ഉച്ചകോടിയിൽ റഷ്യ-ഉക്രെയ്ൻ യുദ്ധം പ്രധാന ചർച്ചാവിഷയമാകും. യുഎസ് പ്രസിഡന്റ് ഡോണാൾഡ് ട്രംപ് ഉച്ചകോടിയിൽ പങ്കെടുക്കുന്നത് അന്താരാഷ്ട്ര തലത്തിൽ വലിയ ശ്രദ്ധയാകർഷിക്കുന്നുണ്ട്.

ജൂലൈ നാലിന് റഷ്യൻ പ്രസിഡന്റ് വ്ലാഡിമിർ പുടിനും ട്രംപും ഏകദേശം 90 മിനിറ്റ് നേരം ഫോണിൽ സംസാരിച്ചിരുന്നു. ഉക്രെയ്നിലെ യുദ്ധം അവസാനിപ്പിക്കാൻ സഹായിക്കാമെന്ന് ട്രംപ് വാഗ്ദാനം ചെയ്തതായി റഷ്യൻ വിദേശകാര്യ മന്ത്രാലയം അറിയിച്ചു.