ജീവിതം വഴിമുട്ടി ഒരു കുടുംബം; അച്ഛനും അമ്മയും മുത്തച്ഛനും ആശ്രയമായി എട്ടാം ക്ലാസുകാരൻ യദുകൃഷ്ണൻ

വയനാട് ജില്ലയിലെ കമ്പളക്കാട് പറളിക്കുന്ന് സ്വദേശികളായ ഒരു കുടുംബം കടുത്ത പ്രതിസന്ധിയിലൂടെയാണ് കടന്നുപോകുന്നത്. അച്ഛൻ അനീഷ്, അമ്മ രജിത, മുത്തച്ഛൻ മനോഹരൻ എന്നിവരടങ്ങുന്ന കുടുംബത്തിന്റെ ഏക ആശ്രയമായി മാറിയിരിക്കുകയാണ് എട്ടാം ക്ലാസ് വിദ്യാർത്ഥിയായ യദുകൃഷ്ണൻ.

അസുഖങ്ങൾ വിട്ടുമാറാത്ത അവസ്ഥയിലാണ് കുടുംബത്തിലെ മുതിർന്നവർ. മോട്ടോർ ന്യൂറോൺ രോഗത്തെ തുടർന്ന് അനീഷിന്റെ ഇരു കൈകളും പൂർണ്ണമായും തളർന്നുപോയ അവസ്ഥയിലാണ്.

തുടക്കത്തിൽ വലതുകൈക്കാണ് ബുദ്ധിമുട്ടുണ്ടായതെങ്കിലും പിന്നീട് വിരലുകൾ ചലിപ്പിക്കാൻ പോലും കഴിയാത്ത അവസ്ഥയിലേക്ക് കാര്യങ്ങൾ മാറി. ശരീരം മെലിഞ്ഞ് ശാരീരികക്ഷമത കുറഞ്ഞുവരുന്നതാണ് നിലവിലെ സാഹചര്യം.

ഹോട്ടൽ ജോലിക്കിടയിൽ വീണ് കാലിന്റെ എല്ലുപൊട്ടിയ അമ്മ രജിതയ്ക്കും നടക്കാൻ വലിയ ബുദ്ധിമുട്ടുണ്ട്. ഇതിനുപുറമെ, മനോഹരൻ ദീർഘകാലമായി ക്യാൻസർ രോഗബാധിതനാണ്.

ശസ്ത്രക്രിയ കഴിഞ്ഞെങ്കിലും തുടർചികിത്സയ്ക്കായി വലിയൊരു തുക ആവശ്യമായി വരുന്നു. മൂന്നു മാസം മുൻപ് വരെ ഓട്ടോ ഓടിച്ചായിരുന്നു അനീഷ് കുടുംബം പോറ്റിയിരുന്നത്.

ഒരുകൈ തളർന്നപ്പോൾ മറ്റേ കൈ ഉപയോഗിച്ച് ഓട്ടോ ഓടിച്ചാണ് അദ്ദേഹം കുടുംബത്തെ സംരക്ഷിച്ചിരുന്നത്. പിന്നീട് ഇലക്ട്രിക് ഓട്ടോയിലേക്ക് മാറിയെങ്കിലും പെട്ടെന്ന് രണ്ടാമത്തെ കൈയും തളർന്നതോടെ ആ ഉപജീവനമാർഗ്ഗവും അടഞ്ഞു.

അനീഷ് പങ്കുവെക്കുന്ന ആശങ്ക ഇങ്ങനെയാണ്: ‘‘ഇന്ന് ഓട്ടോയുടെ മാസത്തവണ അടയ്ക്കേണ്ട അവസാന തീയതിയാണ്.

ഇതുവരെ അടവ് മുടങ്ങിയിരുന്നില്ല. ഇനിയങ്ങോട്ട് എന്താകുമെന്നറിയില്ല’’.

കോഴിക്കോട് മെഡിക്കൽ കോളജ് ആശുപത്രിയിലാണ് അനീഷിന്റെ നിലവിലെ ചികിത്സ. പഠനത്തിന്റെ തിരക്കുകൾക്കിടയിലും വീട്ടുജോലികൾ ചെയ്യുന്നതും മുത്തച്ഛനെയും മാതാപിതാക്കളെയും പരിചരിക്കുന്നതും ആശുപത്രിയിൽ കൊണ്ടുപോകുന്നതുമെല്ലാം ഈ കൊച്ചു മിടുക്കനാണ്.

നാട്ടുകാരുടെയും സുഹൃത്തുക്കളുടെയും സഹായം ലഭിക്കുന്നുണ്ടെങ്കിലും ഭാവി ജീവിതത്തെക്കുറിച്ചുള്ള വലിയൊരു ആശങ്കയിലാണ് ഈ കുടുംബം. സഹായത്തിനായി ‘അനീഷ് ചികിത്സാ സഹായനിധി’ എന്ന പേരിൽ സംവിധാനമൊരുക്കിയിട്ടുണ്ട്.