ചങ്ങനാശേരി റെയിൽവേ ജംക്‌ഷൻ ഫ്ലൈഓവർ നിർമാണം ആരംഭിച്ചു; മരങ്ങൾ മുറിച്ചുമാറ്റി

ചങ്ങനാശേരിയിൽ ഏറെക്കാലമായി കാത്തിരുന്ന റെയിൽവേ ജംക്‌ഷൻ ഫ്ലൈഓവർ പദ്ധതിയുടെ നിർമാണ പ്രവർത്തനങ്ങൾക്ക് ഔദ്യോഗികമായി തുടക്കമായി. നിർദിഷ്ട

ഫ്ലൈഓവർ കടന്നുപോകുന്ന ചങ്ങനാശേരി ബൈപാസ് റോഡിലെ മരങ്ങൾ മുറിച്ചുമാറ്റുന്ന ജോലികൾക്കാണ് തുടക്കം കുറിച്ചത്. പദ്ധതിയുടെ ഭാഗമായി ആകെ 102 മരങ്ങളാണ് ഇവിടെ നിന്ന് നീക്കം ചെയ്യുന്നത്.

ഭൂമി ഏറ്റെടുക്കൽ നടപടികൾ പൂർത്തിയായതോടെ, ഏറ്റെടുത്ത സ്ഥലത്തുള്ള കെട്ടിടങ്ങൾ പൊളിച്ചുനീക്കുന്ന പ്രവൃത്തികളും സമാന്തരമായി പുരോഗമിക്കുകയാണ്. റെയിൽവേ ജംക്‌ഷൻ ഭാഗത്തെ കെട്ടിടങ്ങളും മൺതിട്ടകളും ഇതിനോടകം നീക്കം ചെയ്തു കഴിഞ്ഞു.

ബാക്കി ഭാഗങ്ങളിലെ കെട്ടിടങ്ങൾ വരുംദിവസങ്ങളിൽ പൊളിച്ചുമാറ്റുമെന്ന് അധികൃതർ അറിയിച്ചു. 69 ഭൂവുടമകളിൽ നിന്നാണ് പദ്ധതിക്കായി സ്ഥലം ഏറ്റെടുത്തിരിക്കുന്നത്.

പദ്ധതി വിവരങ്ങൾ
85.68 കോടി രൂപ ചെലവഴിച്ചാണ് റോഡ്സ് ആൻഡ് ബ്രിജസ് ഡവലപ്മെന്റ് കോർപറേഷന്റെ നേതൃത്വത്തിൽ ഫ്ലൈഓവർ നിർമിക്കുന്നത്. ഊരാളുങ്കൽ ലേബർ കോൺട്രാക്ട് സൊസൈറ്റിക്കാണ് നിർമാണ കരാർ നൽകിയിരിക്കുന്നത്.

കരാർ പ്രകാരം 2 വർഷത്തിനുള്ളിൽ നിർമാണ പ്രവർത്തനങ്ങൾ പൂർത്തിയാക്കേണ്ടതുണ്ട്. മുൻപ് നിയമസഭാ തിരഞ്ഞെടുപ്പിനു മുന്നോടിയായി ജോബ് മൈക്കിൾ എംഎൽഎ ആയിരുന്ന കാലയളവിലാണ് പദ്ധതിയുടെ നിർമാണോദ്ഘാടനം നടന്നത്.

അതേസമയം, ഫ്ലൈഓവർ നിർമാണം പൂർത്തിയാകുമ്പോൾ പദ്ധതിയുടെ ഗുണഫലം പൂർണമായും ലഭിക്കുന്നതിനായി, ബൈപാസ് റോഡിലെ എസ്എച്ച് ജംക്‌ഷൻ വരെ ഫ്ലൈഓവറിന്റെ നീളം വർധിപ്പിക്കണമെന്ന ആവശ്യം നാട്ടുകാരിൽ നിന്ന് ഉയരുന്നുണ്ട്.