ഇന്ത്യൻ വിപണിയിലെ കരുത്തരായ 200cc – 250cc മോട്ടോർസൈക്കിളുകൾ: അറിയേണ്ടതെല്ലാം

പുതിയൊരു മോട്ടോർസൈക്കിൾ സ്വന്തമാക്കാൻ ആഗ്രഹിക്കുന്നവർക്കായി കരുത്തുറ്റതും ആകർഷകവുമായ നിരവധി ഓപ്ഷനുകൾ നിലവിൽ ഇന്ത്യൻ വിപണിയിലുണ്ട്. 200 സിസി മുതൽ 250 സിസി വരെയുള്ള വിഭാഗത്തിൽ പെടുന്ന, മികച്ച പ്രവർത്തനക്ഷമതയും ആധുനിക സവിശേഷതകളും ഒത്തിണങ്ങിയ ബൈക്കുകളെക്കുറിച്ചുള്ള അവലോകനം താഴെ നൽകുന്നു.

പ്രതിമാസം 2,109 രൂപ മുതൽ ആരംഭിക്കുന്ന ഇഎംഐ സൗകര്യം ഈ വാഹനങ്ങൾക്ക് ലഭ്യമാണ്. ഹീറോ എക്സ്ട്രീം 250R
ക്വാർട്ടർ ലിറ്റർ നേക്കഡ് മോട്ടോർസൈക്കിൾ ശ്രേണിയിലേക്ക് ഹീറോ മോട്ടോ കോർപ്പ് അവതരിപ്പിച്ച കരുത്തൻ മോഡലാണിത്.

30 എച്ച്പി കരുത്ത് പുറപ്പെടുവിക്കുന്ന 249 സിസി ലിക്വിഡ്-കൂൾഡ് സിംഗിൾ-സിലിണ്ടർ എഞ്ചിനാണ് ഇതിന്റെ പ്രധാന ആകർഷണം. മസ്‍കുലാർ ലുക്കും ഷാർപ്പായ ബോഡി വർക്കും ഈ ബൈക്കിന് മികച്ച റോഡ് സാന്നിധ്യം നൽകുന്നു.

167.7 കിലോഗ്രാം ഭാരവും 806 മില്ലീമീറ്റർ സീറ്റ് ഉയരവുമുള്ള ഇത് കൈകാര്യം ചെയ്യാൻ വളരെ എളുപ്പമാണ്. യുഎസ്‍ഡി സസ്‌പെൻഷൻ, ഡിജിറ്റൽ ഡിസ്‌പ്ലേ, ഫ്രണ്ട് – റിയർ ഡിസ്‍ക് ബ്രേക്കുകൾ എന്നിവ ഇതിൽ ഉൾപ്പെടുത്തിയിരിക്കുന്നു.

ടിവിഎസ് റോണിൻ
നിയോ-റെട്രോ ഡിസൈൻ ശൈലിയിൽ എത്തുന്ന ടിവിഎസ് റോണിൻ, സുഖകരമായ യാത്രാനുഭവത്തിന് മുൻഗണന നൽകുന്നു. 225.9 സിസി ഓയിൽ-കൂൾഡ് എഞ്ചിൻ 20.4 എച്ച്പി കരുത്താണ് ഉത്പാദിപ്പിക്കുന്നത്.

795 മില്ലീമീറ്റർ സീറ്റ് ഉയരവും 159 കിലോഗ്രാം ഭാരവുമുള്ള ഈ ബൈക്ക് നഗരയാത്രകൾക്ക് ഏറെ അനുയോജ്യമാണ്. റൈഡിംഗ് മോഡുകൾ, ബ്ലൂടൂത്ത് കണക്റ്റിവിറ്റി, ഡ്യുവൽ-ചാനൽ എബിഎസ് എന്നിവ റോണിന്റെ പ്രത്യേകതകളാണ്.

സുസുക്കി ജിക്സർ 250
ദീർഘദൂര യാത്രകൾക്കും ഹൈവേ റൈഡിംഗിനും ഏറെ അനുയോജ്യമായ വാഹനമാണ് സുസുക്കി ജിക്സർ 250. 25.77 എച്ച്പി കരുത്ത് നൽകുന്ന 249 സിസി ഓയിൽ-കൂൾഡ് എഞ്ചിൻ മിഡ്-റേഞ്ച് പെർഫോമൻസിന് പേരുകേട്ടതാണ്.

ഈ വിഭാഗത്തിലെ ഏറ്റവും ഭാരം കുറഞ്ഞ (156 കിലോ) മോട്ടോർസൈക്കിളുകളിൽ ഒന്നാണിത്. മികച്ച ബാലൻസും സുഖകരമായ റൈഡിംഗ് പോസ്ചറും ജിക്സർ 250-നെ വേറിട്ടു നിർത്തുന്നു.

ബജാജ് പൾസർ N250
249 സിസി എയർ-ആൻഡ്-ഓയിൽ-കൂൾഡ് എഞ്ചിൻ കരുത്തേകുന്ന പൾസർ N250, 24.5 എച്ച്പി കരുത്ത് പുറപ്പെടുവിക്കുന്നു. ദൈനംദിന ഉപയോഗത്തിനും ഹൈവേ റൈഡിംഗിനും ഒരുപോലെ ഉതകുന്ന രീതിയിലാണ് ഇതിന്റെ നിർമ്മാണം.

162 കിലോഗ്രാം ഭാരമുള്ള ഈ ബൈക്കിന് 795 മില്ലീമീറ്റർ സീറ്റ് ഉയരമാണുള്ളത്. ട്രാക്ഷൻ കൺട്രോൾ, എബിഎസ്, ബ്ലൂടൂത്ത് കണക്റ്റിവിറ്റിയുള്ള ഡിജിറ്റൽ ഇൻസ്ട്രുമെന്റ് ക്ലസ്റ്റർ തുടങ്ങിയ ആധുനിക സാങ്കേതികവിദ്യകൾ ഇതിൽ ലഭ്യമാണ്.