യോഗയിലൂടെ ആരോഗ്യജീവിതം; 76-ാം വയസ്സിലും കരുത്തോടെ മാധവൻ

പട്ടാമ്പി തിരുവേഗപ്പുറ വിളത്തൂർ സ്വദേശിയായ എം. മാധവൻ ആരോഗ്യപരിപാലനത്തിൽ പുതിയ മാതൃക തീർക്കുകയാണ്.

എഴുപത്തിയാറാം വയസ്സിലും അതീവ ആരോഗ്യത്തോടെയും ഉന്മേഷത്തോടെയും ഇരിക്കുന്ന മാധവന്റെ ജീവിതരഹസ്യം കൃത്യമായ യോഗാഭ്യാസമാണ്. യോഗ ചെയ്യണമെന്നു പറയുന്നവർക്ക്, യോഗ പരിശീലിക്കുക എന്നത് മാത്രമാണ് തന്റെ വിജയമന്ത്രമെന്ന് അദ്ദേഹം വ്യക്തമാക്കുന്നു.

ഇരുപതാം വയസ്സിൽ ഉദരസംബന്ധമായ ശാരീരിക അസ്വസ്ഥതകളെത്തുടർന്നാണ് മാധവൻ യോഗയിലേക്ക് തിരിഞ്ഞത്. അക്കാലത്ത് പത്രത്തിൽ പ്രസിദ്ധീകരിച്ച ‘യോഗ ചെയ്താൽ രോഗങ്ങളെ അകറ്റാം’ എന്ന ലേഖനം വായിച്ചതാണ് അദ്ദേഹത്തിന്റെ ജീവിതത്തിലെ വഴിത്തിരിവായത്.

ലേഖനത്തിന്റെ രചയിതാവായ ടി.ജി.ചിദംബരത്തിന് കീഴിലാണ് അദ്ദേഹം ആദ്യമായി യോഗ അഭ്യസിച്ചത്. ഇരുപത്തിയഞ്ചാം വയസ്സു മുതൽ യോഗ പരിശീലകനായി മാറിയ മാധവൻ ആയിരത്തിലധികം ശിഷ്യന്മാരെയാണ് ഇതുവരെ വാർത്തെടുത്തത്.

നിലവിൽ അൻപതിലധികം പേർ അദ്ദേഹത്തിന് കീഴിൽ പരിശീലനം തുടരുന്നുണ്ട്. പുലർച്ചെ അഞ്ചു മണി മുതൽ ഒരു മണിക്കൂർ അദ്ദേഹം യോഗയ്ക്കായി നീക്കിവെക്കുന്നു.

കായികരംഗത്തും മാധവൻ ശ്രദ്ധേയമായ നേട്ടങ്ങൾ കൈവരിച്ചിട്ടുണ്ട്. 2018-ൽ ഫരീദാബാദിൽ ഇന്ത്യൻ യോഗ ഫെഡറേഷൻ സംഘടിപ്പിച്ച മത്സരത്തിൽ അറുപത് വയസ്സിനു മുകളിലുള്ളവരുടെ വിഭാഗത്തിൽ കേരളത്തിന് വേണ്ടി സ്വർണ മെഡൽ നേടിയത് മാധവനായിരുന്നു.

ദേശീയ തലത്തിൽ ആറ് മെഡലുകളും അൻപതിലേറെ മറ്റ് പുരസ്കാരങ്ങളും അദ്ദേഹത്തെ തേടിയെത്തിയിട്ടുണ്ട്. മാധവന്റെ കുടുംബാംഗങ്ങളും യോഗയെ ജീവിതത്തിന്റെ ഭാഗമാക്കിയവരാണ്.

ഭാര്യ ശാന്തകുമാരി, മക്കളായ ബാബു, ജയ എന്നിവർ യോഗ പരിശീലകരാണ്. മകൾ പ്രീതയും യോഗയിൽ അറിവ് നേടിയിട്ടുണ്ട്.

കൊച്ചുമക്കളും മാധവനിൽ നിന്ന് ഈ വിദ്യ അഭ്യസിക്കുന്നു. കൃഷിയിലും വായനയിലും എഴുത്തിലും അതീവ താല്പര്യമുള്ള മാധവൻ ഇന്നും പാടത്ത് ഞാറു നടാൻ സജീവമായി ഇറങ്ങാറുണ്ട്.

നിലവിൽ മകൻ ബാബുവിനൊപ്പം കണ്ണാടി അയ്യപ്പൻകാവിലാണ് താമസം. ദിവസേന കുറഞ്ഞത് അരമണിക്കൂറെങ്കിലും യോഗ ശീലമാക്കിയാൽ ആർക്കും മികച്ച പ്രതിരോധ ശേഷിയും ആരോഗ്യവും കൈവരിക്കാനാവുമെന്ന് അദ്ദേഹം ഓർമ്മിപ്പിക്കുന്നു.