തിരുവനന്തപുരം ജില്ലയിലെ ആര്യനാട് മേഖലയിൽ മീൻ കഴിച്ചതിനെ തുടർന്നുണ്ടായ ഭക്ഷ്യവിഷബാധ വ്യാപകമാകുന്നു. കഴിഞ്ഞ ഒരാഴ്ചയ്ക്കിടെ ആര്യനാട്, ഉഴമലയ്ക്കൽ, പറണ്ടോട്, കുറ്റിച്ചൽ, ഉത്തരംകോട് തുടങ്ങിയ പ്രദേശങ്ങളിലെ നൂറോളം പേരാണ് വിവിധ സർക്കാർ-സ്വകാര്യ ആശുപത്രികളിലും മെഡിക്കൽ കോളേജ് ആശുപത്രിയിലുമായി ചികിത്സ തേടിയത്.
രോഗബാധിതർ വർധിക്കുന്നതിനൊപ്പം പ്രദേശത്ത് വളർത്തുമൃഗങ്ങൾ ചത്തൊടുങ്ങിയ സംഭവങ്ങളും റിപ്പോർട്ട് ചെയ്യപ്പെട്ടിട്ടുണ്ട്. സംഭവത്തിന്റെ തുടക്കത്തിൽ ചെമ്പല്ലി മത്സ്യം കഴിച്ചതാണ് പ്രശ്നകാരണമെന്നായിരുന്നു അധികൃതരുടെ പ്രാഥമിക വിലയിരുത്തൽ.
എന്നാൽ, കഴിഞ്ഞ ദിവസം ചൂര മീൻ കഴിച്ച രണ്ട് പെൺകുട്ടികളും രക്ഷിതാക്കളും ചികിത്സയിലായതോടെ ഈ നിഗമനം അപ്രസക്തമായി. പാറശാല, നെയ്യാറ്റിൻകര മേഖലകളിലും സമാനമായ സംഭവങ്ങൾ നേരത്തെ റിപ്പോർട്ട് ചെയ്തിരുന്നു.
വിഷയം ഗൗരവകരമായിട്ടും ആരോഗ്യ-ഭക്ഷ്യ സുരക്ഷാ വകുപ്പുകൾ പരിശോധനയിൽ അനാസ്ഥ കാണിക്കുന്നുവെന്ന പരാതിയും ഉയരുന്നുണ്ട്. ആര്യനാട്ടുനിന്നും ശേഖരിച്ച സാമ്പിളുകൾ ശാസ്ത്രീയ പരിശോധനയ്ക്കായി അയച്ചിട്ടുണ്ടെന്നും, വരും ദിവസങ്ങളിൽ മാർക്കറ്റുകളിലും വഴിയോര കച്ചവട
കേന്ദ്രങ്ങളിലും പരിശോധന കർശനമാക്കുമെന്നും ഭക്ഷ്യസുരക്ഷാ വകുപ്പ് വ്യക്തമാക്കി. വിപണിയിലെ അപകടസാധ്യതകൾ
വിപണിയിൽ എത്തുന്ന മത്സ്യങ്ങളിൽ ഫോർമലിൻ, അമോണിയ തുടങ്ങിയ രാസവസ്തുക്കളുടെ സാന്നിധ്യം വ്യാപകമാണെന്ന ആശങ്ക ശക്തമാണ്.
നിയമപ്രകാരം പിടികൂടുന്ന മീനുകൾ മൈനസ് 18 ഡിഗ്രി ഊഷ്മാവിൽ ഫ്രീസറിൽ സൂക്ഷിക്കേണ്ടതുണ്ടെങ്കിലും, പലപ്പോഴും ഐസിൽ മാത്രം സൂക്ഷിക്കുന്ന രീതിയാണ് വ്യാപകമായിട്ടുള്ളത്. മൊത്ത വിതരണക്കാർ മുതൽ ഇടനിലക്കാർ വരെയുള്ള വിവിധ തലങ്ങളിൽ രാസവസ്തുക്കൾ ചേർക്കപ്പെടാനുള്ള സാധ്യത തള്ളിക്കളയാനാവില്ലെന്ന് വിദഗ്ധർ ചൂണ്ടിക്കാട്ടുന്നു.
ഗുരുതര ആരോഗ്യപ്രശ്നങ്ങൾ
ഫോർമലിൻ, അമോണിയ തുടങ്ങിയ രാസവസ്തുക്കൾ കലർന്ന മത്സ്യം കഴിക്കുന്നത് അൾസർ, കാൻസർ തുടങ്ങിയ മാരക രോഗങ്ങൾക്ക് കാരണമാകാം. കൂടാതെ ഛർദി, വയറിളക്കം, ആന്തരികാവയവങ്ങൾക്ക് തകരാർ തുടങ്ങിയ ലക്ഷണങ്ങളും കണ്ടുവരുന്നു.
കുട്ടികളിലാണ് ഇത്തരം രാസവസ്തുക്കളുടെ പാർശ്വഫലങ്ങൾ കൂടുതൽ പ്രകടമാകുന്നത്. ഭക്ഷ്യസുരക്ഷാ പരിശോധനയിലെ വെല്ലുവിളികൾ
നിലവിൽ ക്വിക് കിറ്റുകൾ ഉപയോഗിച്ചാണ് ഭക്ഷ്യസുരക്ഷാ വിഭാഗം പരിശോധന നടത്തുന്നത്.
എന്നാൽ, രാസവസ്തുക്കളുടെ അളവ് അമിതമാവുകയോ മറ്റും ചെയ്താൽ ശാസ്ത്രീയ പരിശോധനകൾ അനിവാര്യമാണ്. ഇത്തരം പരിശോധനാ ഫലങ്ങൾ ലഭിക്കാനെടുക്കുന്ന കാലതാമസം നടപടികൾക്ക് തടസ്സമാകുന്നുണ്ടെന്ന് അധികൃതർ സമ്മതിക്കുന്നു.
പഴകിയ മത്സ്യം തിരിച്ചറിയാൻ
പഴകിയ മത്സ്യം തിരിച്ചറിയാൻ ഉപഭോക്താക്കൾ ശ്രദ്ധിക്കേണ്ട കാര്യങ്ങൾ:
* മത്സ്യത്തിന്റെ ശരീരത്തിൽ സ്വാഭാവിക തിളക്കം ഉണ്ടായിരിക്കണം.
* കണ്ണുകളിൽ തിളക്കവും ചെകിളപ്പൂക്കളിൽ ചുവപ്പ് നിറവും ഉണ്ടോ എന്ന് പരിശോധിക്കുക.
* മാംസപേശികളിൽ വിരൽ കൊണ്ട് അമർത്തുമ്പോൾ അത് അകത്തേക്ക് ചുരുങ്ങുകയാണെങ്കിൽ മീൻ പഴകിയതാണെന്ന് ഉറപ്പിക്കാം.
* ദുർഗന്ധമോ രാസഗന്ധമോ അനുഭവപ്പെട്ടാൽ അത്തരം മീനുകൾ ഒഴിവാക്കുക.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
