സംസ്ഥാനത്തെ ടൂറിസ്റ്റ് ബസുകൾക്ക് നിലവിൽ നിർബന്ധമാക്കിയിട്ടുള്ള ഏകീകൃത വെള്ള നിറം എന്ന നിബന്ധനയിൽ മാറ്റം വരുത്താൻ സാധ്യത. ഇത് സംബന്ധിച്ച പുതിയ നിർദ്ദേശം **സ്റ്റേറ്റ് ട്രാൻസ്പോർട്ട് അതോറിറ്റി** സംസ്ഥാന സർക്കാരിന് സമർപ്പിച്ചു.
ബസുകൾക്ക് വിവിധ നിറങ്ങൾ അനുവദിക്കണമെന്നാണ് ട്രാൻസ്പോർട്ട് അതോറിറ്റിയുടെ പുതിയ നിലപാട്. ടൂറിസ്റ്റ് ബസുകളിൽ വെള്ള നിറം മാത്രം അനുവദിക്കുന്നത് സംസ്ഥാനത്തെ വിനോദസഞ്ചാര മേഖലയെ ദോഷകരമായി ബാധിക്കുന്നുവെന്ന പരാതികൾ ഉയർന്നതിനെത്തുടർന്നാണ് ഈ നീക്കം.
ഈ നിർദ്ദേശം സർക്കാർ അംഗീകരിച്ച് നിയമത്തിൽ ഭേദഗതി വരുത്തിയാൽ മാത്രമേ ടൂറിസ്റ്റ് ബസുകളുടെ നിറം മാറ്റം ഔദ്യോഗികമായി പ്രാബല്യത്തിൽ വരികയുള്ളൂ. **പശ്ചാത്തലം**
**2022 ഒക്ടോബർ** മാസത്തിൽ വടക്കാഞ്ചേരിയിൽ ഉണ്ടായ ദാരുണമായ ബസ് അപകടത്തെത്തുടർന്നാണ് ടൂറിസ്റ്റ് ബസുകൾക്ക് വെള്ള നിറം നിർബന്ധമാക്കിക്കൊണ്ടുള്ള ഉത്തരവ് പുറപ്പെടുവിച്ചത്.
അഞ്ച് വിദ്യാർഥികൾ ഉൾപ്പെടെ ഒൻപത് പേരുടെ മരണത്തിനിടയാക്കിയ ആ അപകടത്തിന് ശേഷം നടത്തിയ വകുപ്പുതല അന്വേഷണത്തിന്റെ അടിസ്ഥാനത്തിലായിരുന്നു അന്നത്തെ സർക്കാർ തീരുമാനം. ബസുകളിൽ സിനിമാതാരങ്ങളുടെ ചിത്രങ്ങളും ആകർഷകമായ ഗ്രാഫിക്സുകളും ബഹുവർണ്ണ പെയിന്റിംഗുകളും ഉപയോഗിക്കുന്നത് മറ്റ് വാഹനങ്ങളിലെ ഡ്രൈവർമാരുടെ ശ്രദ്ധ തിരിക്കുകയും അത് അപകടങ്ങൾക്ക് കാരണമാവുകയും ചെയ്യുന്നുണ്ടെന്ന് അന്ന് അധികൃതർ കണ്ടെത്തിയിരുന്നു.
ഇതിനൊപ്പം തന്നെ, ബസുകളിൽ അമിതമായ ലൈറ്റുകൾ, മ്യൂസിക് സിസ്റ്റങ്ങൾ, സ്പീക്കറുകൾ എന്നിവ സ്ഥാപിക്കുന്നതും നിരോധിക്കാൻ തീരുമാനിച്ചിരുന്നു. മറ്റ് യാത്രക്കാരുടെയും ഡ്രൈവർമാരുടെയും ശ്രദ്ധയിൽ പെടാൻ എളുപ്പമെന്ന നിലയിലായിരുന്നു അന്ന് വെള്ള നിറം തെരഞ്ഞെടുത്തത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
