ഗൂഗിൾ ഹോം ആപ്പിൽ ജെമിനിയുടെ കരുത്തുമായി കൂടുതൽ മാറ്റങ്ങൾ; പുതിയ ഫീച്ചറുകൾ ലഭ്യമാക്കി

സ്മാർട്ട് ഹോം സാങ്കേതികവിദ്യയിൽ വലിയ മാറ്റങ്ങൾക്ക് തുടക്കമിട്ടുകൊണ്ട് ഗൂഗിൾ ഹോം പ്ലാറ്റ്‌ഫോമിൽ ജെമിനിയുടെ പ്രവർത്തനങ്ങൾ കൂടുതൽ വിപുലീകരിക്കുന്നു. ഉപയോക്താക്കൾക്ക് കൂടുതൽ കൃത്യതയോടെയും വ്യക്തതയോടെയും വിവരങ്ങൾ ലഭ്യമാക്കാൻ സഹായിക്കുന്ന പുതിയ ഫീച്ചറുകൾ ഉൾപ്പെടുത്തിക്കൊണ്ടാണ് ഈ അപ്‌ഡേറ്റ് പുറത്തിറക്കിയിരിക്കുന്നത്.

ഗൂഗിൾ ഹോം ആപ്പ് പതിപ്പ് 4.18-ലൂടെയാണ് ഈ സേവനങ്ങൾ ലഭ്യമാക്കുന്നത്. കാലാവസ്ഥാ പ്രവചനങ്ങളിൽ വരുത്തിയിട്ടുള്ള മാറ്റങ്ങളാണ് ഇതിൽ പ്രധാനപ്പെട്ടത്.

ഇനി മുതൽ ഉപയോക്താക്കൾക്ക് തങ്ങളുടെ താൽപ്പര്യമുള്ള യൂണിറ്റുകളിൽ (സെൽഷ്യസ് അല്ലെങ്കിൽ ഫാരൻഹീറ്റ്) കാലാവസ്ഥാ വിവരങ്ങൾ ചോദിച്ചറിയാം. ഉദാഹരണത്തിന്, “Will it rain at 3 PM today?” എന്ന് ചോദിക്കുമ്പോൾ സ്മാർട്ട് ഡിസ്‌പ്ലേകളിൽ കൃത്യമായ മണിക്കൂർ അടിസ്ഥാനത്തിലുള്ള റിപ്പോർട്ടും ഗ്രാഫിക് വിവരങ്ങളും ലഭ്യമാകും.

വീഡിയോ, സിനിമ, ടിവി ഷോകൾ എന്നിവ കണ്ടെത്തുന്നതിനും പ്ലേ ചെയ്യുന്നതിനുമുള്ള സംവിധാനങ്ങളും കൂടുതൽ ലളിതമാക്കിയിട്ടുണ്ട്. വോയിസ് കമാൻഡുകൾ ഉപയോഗിച്ച് സ്വാഭാവികമായ രീതിയിൽ തന്നെ ഉപയോക്താക്കൾക്ക് തങ്ങളുടെ ഇഷ്ടപ്പെട്ട

ഉള്ളടക്കങ്ങൾ തിരയാനും പ്ലേ ചെയ്യാനും സാധിക്കും. കൂടാതെ, വോളിയം നിയന്ത്രിക്കുന്നതിനായി “lower it a tad” അല്ലെങ്കിൽ “Turn it up a smidge” പോലുള്ള സംഭാഷണ ശൈലികൾ ഉപയോഗിച്ചുള്ള കമാൻഡുകളും ജെമിനി തിരിച്ചറിയും.

മറ്റൊരു പ്രധാന സവിശേഷത വാർത്താ സംഗ്രഹങ്ങളിലെ മാറ്റമാണ്. നെസ്റ്റ് (Nest) ഉപകരണങ്ങളിലും സ്മാർട്ട് സ്പീക്കറുകളിലും നിലവിലുണ്ടായിരുന്ന പരമ്പരാഗത രീതിയിലുള്ള ‘ഡെയ്ലി ബ്രീഫ്’ ഒഴിവാക്കി അതിന് പകരം കൂടുതൽ സംവേദനാത്മകമായ ഒരു സംവിധാനം കൊണ്ടുവരുന്നു.

ജെമിനി ലൈവിന് സമാനമായി, വാർത്തകൾ കേൾക്കുന്നതിനിടയിൽ ഏതെങ്കിലും പ്രത്യേക വാർത്തയെക്കുറിച്ച് കൂടുതൽ അറിയണമെന്നുണ്ടെങ്കിൽ ഉപയോക്താക്കൾക്ക് ഉടൻ തന്നെ ചോദ്യങ്ങൾ ചോദിക്കാനും വിശദമായ വിവരങ്ങൾ നേടാനും സാധിക്കും.