കിഫ്ബി നിയമനങ്ങളിൽ വ്യാപക ക്രമക്കേട്: ബന്ധുക്കൾക്ക് ഉന്നത പദവികളും വൻ ശമ്പളവും

തിരുവനന്തപുരം: കഴിഞ്ഞ ഒൻപത് വർഷമായി കിഫ്ബി (KIIFB) കേന്ദ്രീകരിച്ച് നടന്നുവരുന്ന നിയമനങ്ങളിൽ വ്യാപകമായ ക്രമക്കേടുകൾ നടന്നതായി റിപ്പോർട്ട്. രാഷ്ട്രീയ സ്വാധീനമുള്ളവരുടെ ബന്ധുക്കൾക്ക് പുറമെ, സർക്കാർ സർവീസിലുള്ള ഉന്നത ഉദ്യോഗസ്ഥരുടെ കുടുംബാംഗങ്ങളെയും അടുത്ത ബന്ധുക്കളെയും വിവിധ തസ്തികകളിൽ തിരുകിക്കയറ്റിയതായാണ് വിവരം.

വലിയ തോതിൽ പരാതികൾ ഉയർന്ന സാഹചര്യത്തിൽ, സർക്കാർ തലത്തിൽ സമഗ്രമായ അന്വേഷണത്തിന് നീക്കങ്ങൾ ആരംഭിച്ചിട്ടുണ്ട്. ഇതിന്റെ ഭാഗമായി ജീവനക്കാർക്ക് നൽകുന്ന ഉയർന്ന ശമ്പളത്തെക്കുറിച്ചുള്ള വിവരങ്ങൾ സർക്കാർ ശേഖരിച്ചുവരികയാണ്.

വിഴിഞ്ഞം രാജ്യാന്തര തുറമുഖം പദ്ധതിയുമായി ബന്ധപ്പെട്ട ഒരു പ്രധാന ഉദ്യോഗസ്ഥന്റെ ഭാര്യയ്ക്കും മകനും രണ്ടാം പിണറായി സർക്കാരിന്റെ കാലയളവിൽ കിഫ്ബിയിൽ നിയമനം ലഭിച്ചത് മുഖ്യമന്ത്രിയുടെ ഓഫിസിന്റെ നേരിട്ടുള്ള ഇടപെടലിലൂടെയാണെന്ന് ആരോപണമുണ്ട്.

ധനവകുപ്പിൽ നിന്നും വിരമിച്ച അഡീഷണൽ സെക്രട്ടറിയുടെ ഭർത്താവിനും സഹോദരന്റെ ഭാര്യയ്ക്കും സമാനമായ രീതിയിൽ ജോലി നൽകിയിട്ടുണ്ട്. കൂടാതെ, കിഫ്ബിയിലെ സീനിയർ ജനറൽ മാനേജരുടെ അടുത്ത ബന്ധുക്കളും ഇത്തരത്തിൽ നിയമനം നേടിയവരിൽ ഉൾപ്പെടുന്നു.

ഈ സ്ഥാപനങ്ങളിലെ ശമ്പളഘടനയും ചർച്ചയാവുകയാണ്. കിഫ്ബിയിലും കെഡിസ്കിലും (K-DISC) ജോലി ചെയ്യുന്നവരിൽ മുപ്പതോളം പേർക്ക് ഒരു ലക്ഷം രൂപയ്ക്ക് മുകളിലാണ് പ്രതിമാസ ശമ്പളം ലഭിക്കുന്നത്.

ചിലരുടെ ശമ്പളം നാല് ലക്ഷം രൂപ വരെയാണെന്ന് കണക്കുകൾ വ്യക്തമാക്കുന്നു. സാധാരണ സർക്കാർ ജീവനക്കാർക്ക് ലഭിക്കാത്ത ആനുകൂല്യങ്ങളോടെ, വർഷംതോറും പത്ത് ശതമാനം വീതം ശമ്പള വർധനയാണ് ഈ സ്ഥാപനങ്ങളിൽ നൽകിവരുന്നത്.

കിഫ്ബിയിലെ ഒരു ഉന്നത ഉദ്യോഗസ്ഥയുടെ ഭർത്താവിന് പൊതുമേഖലാ സ്ഥാപനത്തിൽ എച്ച്ആർ മാനേജർ പദവി നൽകിയതും വിവാദത്തിന് വഴിവെച്ചിട്ടുണ്ട്. കൂടാതെ, കിഫ്ബിക്കായി അനൗദ്യോഗിക സർവേ നടത്തിയ ഏജൻസിക്ക് ഐടി പ്ലാറ്റ്‌ഫോം വികസിപ്പിക്കാനുള്ള ചുമതല നൽകിയതിലും ക്രമക്കേട് സംശയിക്കുന്നുണ്ട്.

എൽഡിഎഫ് സർക്കാർ മൂന്നാം വട്ടവും അധികാരത്തിൽ വരുമെന്ന് അന്നത്തെ മുഖ്യമന്ത്രിക്ക് അടക്കം ഈ ഏജൻസി ഉറപ്പുനൽകിയിരുന്നുവെന്ന വിവരങ്ങളും പുറത്തുവരുന്നു.