കോട്ടയം ജില്ലയിലെ വെളിയന്നൂർ പ്രദേശത്ത് നെടുമാഞ്ചേരിൽ വീട്ടുമുറ്റത്ത് എത്തുന്നവർക്ക് ഗൾഫ് നാടുകളിലെ കാഴ്ചകളാണ് അനുഭവവേദ്യമാകുന്നത്. ദുബായിലെ ഇൻഫിനിറ്റി ഗ്രൂപ്പിന്റെ സാരഥിയായ അനീഷ് കുമാർ ശ്രീധരൻ തന്റെ വസതിയിൽ നട്ടുപിടിപ്പിച്ച 14 ഈന്തപ്പനകളിൽ നാലെണ്ണം ഇപ്പോൾ കായ്ച്ചു നിൽക്കുകയാണ്.
25 വർഷമായി പ്രവാസ ജീവിതം നയിക്കുന്ന ഇദ്ദേഹം, ഗൾഫ് നാടുകളിലെ ആഡംബര ഭവനങ്ങളുടെ മാതൃകയിലാണ് തന്റെ പുരയിടം ഒരുക്കിയിരിക്കുന്നത്. വെളിയന്നൂർ–കൂത്താട്ടുകുളം റോഡരികിൽ സ്ഥിതി ചെയ്യുന്ന ഈ വസതിയിലേക്ക് സ്വർണ്ണ നിറത്തിൽ കുലകുലയായി നിൽക്കുന്ന ഈന്തപ്പഴങ്ങൾ കാണാൻ നിരവധി പേരാണ് എത്തുന്നത്.
കേരളത്തിലെ കാലാവസ്ഥയിൽ ഈന്തപ്പനകൾ സാധാരണയായി ഫലം നൽകാറില്ലെന്നിരിക്കെ, അനീഷ് കുമാർ ശ്രീധരന്റെ കൃത്യമായ പരിചരണം ഇതിന് മാറ്റം വരുത്തിയിരിക്കുകയാണ്. നാല് വർഷങ്ങൾക്ക് മുൻപാണ് ഈ ഈന്തപ്പനകൾ ഇവിടെ നട്ടുപിടിപ്പിച്ചത്.
ഗൾഫ് രാജ്യങ്ങളിൽ നിന്ന് ഇറക്കുമതി ചെയ്ത ശേഷം ഉത്തരേന്ത്യയിലെ നഴ്സറികളിൽ വളർത്തിയെടുത്ത പനകൾ, പിന്നീട് കണ്ടെയ്നർ ലോറികൾ വഴിയാണ് വെളിയന്നൂരിലെത്തിച്ചത്. കൃത്യമായ പരിപാലനം ഉറപ്പാക്കിയാൽ കേരളത്തിലെ കാലാവസ്ഥയിലും ഈന്തപ്പനകൾ നന്നായി വളരുകയും ഫലം നൽകുകയും ചെയ്യുമെന്ന് അനീഷ് കുമാർ ശ്രീധരൻ വ്യക്തമാക്കി.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
