ഐപിഎൽ തിളക്കത്തിന് പിന്നിലെ കഠിനാധ്വാനം: പാസ്‌പോർട്ട് ഏജന്‍റിൽ നിന്ന് ക്രിക്കറ്റ് താരത്തിലേക്കുള്ള ക്രുനാൽ പാണ്ഡ്യയുടെ വളർച്ച

റോയൽ ചലഞ്ചേഴ്സ് ബെംഗളൂരുവിനെ തുടർച്ചയായ രണ്ടാം തവണയും ഐപിഎൽ കിരീടത്തിലേക്ക് നയിക്കുന്നതിൽ നിർണായക പങ്ക് വഹിച്ച താരമാണ് ക്രുനാൽ പാണ്ഡ്യ. ഐപിഎല്ലിലെ ശ്രദ്ധേയമായ പ്രകടനങ്ങൾക്കിടയിലും, തന്‍റെ ബാല്യകാലത്തെ ദുരിതപൂർണ്ണമായ സാഹചര്യങ്ങളെക്കുറിച്ചും ക്രിക്കറ്റ് കരിയറിന് മുൻപ് താൻ അനുഷ്ഠിച്ച വിവിധ തൊഴിലുകളെക്കുറിച്ചും താരം മനസ്സ് തുറക്കുകയാണ്.

ടൈംസ് ഓഫ് ഇന്ത്യയ്ക്ക് നൽകിയ പ്രത്യേക അഭിമുഖത്തിലാണ് അദ്ദേഹം തന്റെ ജീവിതത്തിലെ പടിപടിയായുള്ള ഉയർച്ചയെക്കുറിച്ച് വെളിപ്പെടുത്തിയത്. ബാല്യകാലത്തെ തൊഴിൽ അനുഭവങ്ങൾ 12 വയസ്സുള്ളപ്പോൾ മുതൽ പിതാവിനൊപ്പം ജോലിക്ക് പോയിരുന്നതായി ക്രുനാൽ ഓർമ്മിക്കുന്നു.

അക്കാലത്തെ ജീവിതത്തെക്കുറിച്ച് അദ്ദേഹം പറയുന്നത് ഇങ്ങനെ: “ജീവിതത്തിൽ കഠിനമായ സാഹചര്യങ്ങളെ അഭിമുഖീകരിക്കാൻ എനിക്കിഷ്ടമാണ്. കാരണം ചെറുപ്പകാലം മുതൽ ഞാൻ അത്തരം സാഹചര്യങ്ങളിലൂടെയാണ് കടന്നുവന്നത്.

എനിക്ക് 11-12 വയസ്സുള്ളപ്പോൾ ഞാൻ അച്ഛനോടൊപ്പം ജോലിക്ക് പോകുമായിരുന്നു. അച്ഛൻ ഒരു പാസ്‌പോർട്ട് ഏജന്‍റ് ആയിരുന്നു.

ബിസിനസിലും ജീവിതത്തിലും അച്ഛനും അമ്മയും നേരിട്ട പ്രതിസന്ധികൾ ഞാൻ വളരെ ചെറുപ്പത്തിൽ തന്നെ കണ്ടറിഞ്ഞു.

ജീവിതം എത്രത്തോളം കഠിനമാണെന്ന് ഞാൻ മനസ്സിലാക്കുന്നത് അങ്ങനെയാണ്.” 14-15 വയസ്സായപ്പോഴേക്കും താൻ ഒരു പാസ്‌പോർട്ട് ഏജന്‍റായി മാറിയെന്ന് അദ്ദേഹം കൂട്ടിച്ചേർത്തു. റേഷൻ കാർഡ് ശരിയാക്കുക, പാസ്‌പോർട്ടിനായുള്ള അഫിഡവിറ്റുകൾ തയ്യാറാക്കുക, വിവിധ ഓഫീസുകളിൽ കയറിയിറങ്ങി പേപ്പർ വർക്കുകൾ പൂർത്തിയാക്കുക തുടങ്ങി കഠിനമായ ജോലികളാണ് താൻ ചെയ്തത്.

കാർ ബ്രോക്കർ മുതൽ ഐപിഎൽ താരം വരെ നിലവിൽ ഐപിഎൽ കരിയറിൽ നിന്ന് മാത്രം 75 കോടിയിലധികം രൂപയുടെ സമ്പാദ്യമുള്ള ക്രുനാൽ, താൻ കടന്നുവന്ന ചെറിയ വരുമാനമുള്ള കാലഘട്ടത്തെക്കുറിച്ചും സംസാരിച്ചു. “ഒരു കാലത്ത് ഞാൻ കാർ ബ്രോക്കറായിരുന്നു.

3-4 ലക്ഷം രൂപ വിലവരുന്ന സെക്കൻഡ് ഹാൻഡ് കാറുകൾ വിൽക്കുമ്പോൾ 3000 രൂപയായിരുന്നു കമ്മീഷനായി ലഭിക്കുക. വളരെ ചെറിയ പ്രായത്തിൽ തന്നെ ജീവിതത്തെ അതിന്‍റെ എല്ലാ കോണുകളിൽ നിന്നും ഞാൻ കണ്ടു.

അതുകൊണ്ടാണ് ക്രിക്കറ്റ് ഗ്രൗണ്ടിലും ഞാൻ ഒരിക്കലും വിട്ടുകൊടുക്കാത്തത്. കളി കടുപ്പമാകുമ്പോൾ ജയിക്കണം എന്ന വാശി എന്നിലുണ്ടാകുന്നത് ഈ ജീവിതാനുഭവങ്ങളിൽ നിന്നാണ്.

നിങ്ങൾ എങ്ങനെയാണോ ജീവിതം ജീവിക്കുന്നത്, അങ്ങനെ മാത്രമേ ഗ്രൗണ്ടിലും കളിക്കാൻ സാധിക്കൂ.” ക്രിക്കറ്റ് കരിയറിലെ നേട്ടങ്ങൾ 2025-ലെ ഐപിഎൽ മെഗാ ലേലത്തിൽ 5.75 കോടി രൂപയ്ക്കാണ് താരം റോയൽ ചലഞ്ചേഴ്സ് ബെംഗളൂരുവിലെത്തിയത്. കഴിഞ്ഞ സീസണിലെ ഫൈനലിൽ ‘പ്ലെയർ ഓഫ് ദി മാച്ച്’ പുരസ്കാരം നേടിയ ക്രുനാൽ, ഈ സീസണിലും മികച്ച പ്രകടനമാണ് പുറത്തെടുത്തത്.

ഈ സീസണിൽ 15 മത്സരങ്ങളിൽ നിന്ന് 14 വിക്കറ്റുകളും 226 റൺസും അദ്ദേഹം സ്വന്തമാക്കി. ഡൽഹി ക്യാപിറ്റൽസിനെതിരെ പുറത്താകാതെ നേടിയ 73 റൺസ് ഈ സീസണിലെ താരത്തിന്‍റെ മികച്ച പ്രകടനങ്ങളിലൊന്നായി വിലയിരുത്തപ്പെടുന്നു.