ഫറോക്കിൽനിന്ന് ഡീസലെത്തി; പ്രതിസന്ധിക്ക് പരിഹാരം

കൽപറ്റ ∙ കെഎസ്ആർടിസി ഡിപ്പോയിലെ ഇന്ധനക്ഷാമത്തിന് പരിഹാരമായി. ശനിയാഴ്ച രാത്രിയോടെ ഫറോക്കിൽ നിന്നു 12,000 ലീറ്റർ ഡീസൽ ഡിപ്പോയിലെത്തിച്ചു.

ഇതോടെ ഇന്നലെ മുഴുവൻ പ്രാദേശിക സർവീസുകളും പൂർണതോതിൽ നടത്താനായി. വെള്ളിയാഴ്ച രാത്രിയോടെയാണു ഡിപ്പോയിൽ ഇന്ധനക്ഷാമം നേരിട്ടു തുടങ്ങിയത്. 
ശനിയാഴ്ച രാവിലെയോടെ ഇന്ധനക്ഷാമം രൂക്ഷമായി.

നിർത്തിയിട്ട ബസുകളിലെ ഇന്ധനം ഊറ്റിയെടുത്തും ബസുകളിലുള്ള ഇന്ധനത്തിന് അനുസരിച്ചുള്ള ദൂരം പുനഃക്രമീകരിച്ചുമൊക്കെയായിരുന്നു കഴിഞ്ഞ ദിവസങ്ങളിൽ സർവീസുകൾ നടത്തിയിരുന്നത്.

ഇന്ധനക്ഷാമം രൂക്ഷമായതോടെ പ്രാദേശിക സർവീസുകൾ പ്രതിസന്ധിയിലായി. വടുവൻചാൽ, മാനന്തവാടി, വൈത്തിരി സർവീസുകൾ മുടങ്ങി. മുണ്ടക്കൈ, ചോലാടി, മാനന്തവാടി റൂട്ടുകളിലെ ബസുകൾ ഒരു ട്രിപ്പ് മാത്രം നടത്തി ഓട്ടം അവസാനിപ്പിച്ചു.
ചൂരൽമല ഭാഗത്തേക്കുള്ള ട്രിപ്പുകളും മുടങ്ങി.

ഇതോടെ ഗ്രാമീണ മേഖലയിലെ യാത്രക്കാർ വലഞ്ഞു. സ്വകാര്യ ബസ് സർവീസുകൾ കുറവുള്ള മേഖലകളിൽ യാത്രാക്ലേശം രൂക്ഷമായിരുന്നു. മുന്നറിയിപ്പില്ലാതെ കെഎസ്ആർടിസി സർവീസുകൾ മുടങ്ങിയതോടെ വിദ്യാർഥികൾ അടക്കമുള്ളവർ പെരുവഴിയിലായി. ഡിപ്പോയിലെ ഇന്ധനക്ഷാമം പരിഹരിക്കണമെന്ന് ആവശ്യപ്പെട്ട് കഴിഞ്ഞദിവസം ടി.സിദ്ദീഖ് എംഎൽഎ മന്ത്രി കെ.ബി.ഗണേശ്കുമാറിന് നിവേദനം നൽകിയിരുന്നു.

… FacebookTwitterWhatsAppTelegram