അരലക്ഷം ഓഹരികൾ‌ ഒറ്റയടിക്ക് വിറ്റഴിച്ച് രോഹിത് ശർമയുടെ ‘പുൾ ഷോട്ട്’; കൈയിലെത്തിയത് ലക്ഷങ്ങൾ

ക്രിക്കറ്റ് ലോകത്തെ ‘ഹിറ്റ്മാൻ’ രോഹിത് ശർമയുടെ തന്ത്രങ്ങൾ, ഓഹരി നിക്ഷേപത്തിലും അദ്ദേഹത്തിന് സമ്മാനിക്കുന്നത് വൻ നേട്ടം. ഡൽഹി ആസ്ഥാനമായ ഐടി കമ്പനിയായ റിലയബിൾ ഡേറ്റ സർവീസസിൽ 2023ൽ 1.03 ലക്ഷം ഓഹരികൾ രോഹിത് ശർമ സ്വന്തമാക്കിയിരുന്നു.

കഴിഞ്ഞദിവസം പാതി ഓഹരികൾ അദ്ദേഹം വിറ്റഴിച്ചു. നേടിയതാകട്ടെ 87.2 ലക്ഷം രൂപയും.
2023ലെ കണക്കനുസരിച്ച് ഒരു ശതമാനം ഓഹരി പങ്കാളിത്തമാണ് കമ്പനിയിൽ രോഹിത്തിനുണ്ടായിരുന്നത്.

ഓഹരിക്ക് 163.91 രൂപ പ്രകാരം 53,200 ഓഹരികൾ ഹിറ്റ്മാൻ കഴിഞ്ഞദിവസം വിറ്റഴിച്ചു. ഒരുവർഷം മുൻപ് വെറും 63 രൂപയായിരുന്ന ഓഹരിവില 163.91 രൂപയെന്ന റെക്കോർഡിൽ എത്തിയപ്പോഴാണ് അദ്ദേഹം തന്ത്രപൂർവം ‘ഓഹരി പങ്കാളിത്തം’ കുറച്ചത്.

ബാക്കി ഓഹരികൾ കൈവശം തന്നെ വച്ചിട്ടുമുണ്ടെന്നത് ശ്രദ്ധേയം.
കഴിഞ്ഞ ഒരുവർഷത്തിനിടെ മാത്രം കമ്പനിയുടെ ഓഹരിവില 68% ഉയർന്നു. 117 ശതമാനമാണ് കഴിഞ്ഞ ഒരുമാസത്തെ മാത്രം നേട്ടം.

എന്നാൽ, കഴിഞ്ഞ ഒറ്റയാഴ്ചയ്ക്കിടെ ഓഹരിവില കുതിച്ചുകയറിയത് 80 ശതമാനത്തോളവും. ഇതു സുവർണാവസരമായി കണ്ടായിരുന്നു രോഹിത്തിന്റെ ഓഹരിവിൽപന.

എൻഎസ്ഇയിൽ നിന്നുള്ള കണക്കുപ്രകാരം കമ്പനിയുടെ ഓഹരിവില ഇപ്പോൾ റെക്കോർഡ് 163.91 രൂപയാണ്. ഇക്കഴിഞ്ഞ ഫെബ്രുവരി 12ന് 52-ആഴ്ചത്തെ താഴ്ചയായ 63.15 രൂപയിലായിരുന്നു ഓഹരി ഉണ്ടായിരുന്നത്.

169.16 കോടി രൂപ വിപണിമൂല്യമുള്ള കമ്പനിയാണിത്.
ബിസിനസ്, ഇക്കണോമി, സ്റ്റോക്ക് മാർക്കറ്റ്, പഴ്സനൽ ഫിനാൻസ്, കമ്മോഡിറ്റി, സമ്പാദ്യം വാർത്തകൾക്ക്:

(Disclaimer: ഈ ലേഖനം ഓഹരി/കടപ്പത്രം/മ്യൂച്വൽഫണ്ട്/ക്രിപ്റ്റോകറൻസി മുതലായവ വാങ്ങാനോ വില്‍ക്കാനോ ഉള്ള നിര്‍ദേശമോ ഉപദേശമോ അല്ല. ഓഹരി/കടപ്പത്രം/മ്യൂച്വൽഫണ്ട് മുതലായ നിക്ഷേപങ്ങൾ വിപണിയിലെ റിസ്കുകൾക്ക് വിധേയമാണ്.

നിക്ഷേപം നടത്തുന്നതിന് മുമ്പ് നിങ്ങള്‍ സ്വയം പഠനങ്ങൾ നടത്തുകയോ ഒരു വിദഗ്ധന്റെ ഉപദേശം തേടുകയോ ചെയ്യുക) …