ബേപ്പൂരിൽ നിക്ഷേപക സംഗമം വരുന്നു; കിൻഫ്ര ഏറ്റെടുത്ത സ്ഥലങ്ങൾ ഉപയോഗപ്പെടുത്തുക ലക്ഷ്യം

ഫറോക്ക് ∙ ബേപ്പൂർ നിയോജകമണ്ഡലത്തിൽ വ്യവസായക്കുതിപ്പിന് വഴിയൊരുക്കാൻ നിക്ഷേപക സംഗമം നടത്തുന്നു. രാമനാട്ടുകര അഡ്വാൻസ് ടെക്നോളജി പാർക്ക്, ബേപ്പൂർ മറൈൻ പാർക്ക് ഉൾപ്പെടെ കിൻഫ്ര ഏറ്റെടുത്ത ഭൂമി ഫലപ്രദമായി ഉപയോഗപ്പെടുത്തുക ലക്ഷ്യമിട്ടാണ് ഇൻവെസ്റ്റേഴ്സ് മീറ്റ് നടത്തുന്നത്.തിരുവനന്തപുരത്ത് മന്ത്രി പി.രാജീവ്, മന്ത്രി പി.എ.മുഹമ്മദ് റിയാസ് എന്നിവർ പങ്കെടുത്ത യോഗത്തിലാണ് ഇതുസംബന്ധിച്ച് തീരുമാനമെടുത്തത്. 
ചെറുവണ്ണൂർ സെയിൽ–സ്റ്റീൽ കോംപ്ലക്സ്, കിൻഫ്ര പാർക്ക്, നല്ലളം ബാംബൂ കോർപറേഷൻ തറയോട് ഫാക്ടറി, ചെറുവണ്ണൂർ–നല്ലളം വ്യവസായ എസ്റ്റേറ്റ് എന്നിവയിലെ വിവിധ പ്രശ്നങ്ങളുമായി ബന്ധപ്പെട്ട് ഉദ്യോഗസ്ഥ മേധാവികൾ, വ്യവസായികൾ, തൊഴിലാളി സംഘടനാ പ്രതിനിധികൾ എന്നിവരുമായി മന്ത്രിമാർ നടത്തിയ ചർച്ചയിലാണ് വ്യവസായ–തൊഴിൽ മേഖലയിൽ പ്രതീക്ഷ വളർത്തുന്ന തീരുമാനങ്ങളെടുത്തത്.വ്യവസായ ഇൻവെസ്റ്റേഴ്സ് മീറ്റ് നടത്തുന്നതിനുള്ള നോഡൽ ഏജൻസിയായി കിൻഫ്രയെ ചുമതലപ്പെടുത്തും. രാമനാട്ടുകര അഡ്വാൻസ് ടെക്നോളജി പാർക്കിനെ ഗവ.സൈബർ പാർക്കിന്റെ എക്സ്റ്റൻഷനാക്കി മാറ്റുന്നതും മൈസ് ടൂറിസം ഉൾപ്പെടെയുള്ള ടൂറിസം– വ്യവസായ– വികസന സാധ്യതകളും പരിശോധിക്കും.
സ്റ്റീൽ കോംപ്ലക്സുമായി ബന്ധപ്പെട്ട് സർക്കാർ നൽകിയ കേസിൽ തുടർനടപടികൾ കൂടുതൽ ശക്തമാക്കും. കമ്പനിയെ പൊതുമേഖലയിൽ നിലനിർത്താൻ ശക്തമായ നിയമ പോരാട്ടം തുടരുമെന്നും മന്ത്രിമാർ വ്യക്തമാക്കി.

നല്ലളം ബാംബൂ കോർപറേഷൻ തറയോട് നിർമാണ ഫാക്ടറിയുടെ പുനരുദ്ധാരണത്തിനുള്ള നിർദേശങ്ങളും ചർച്ച ചെയ്തു.
സ്റ്റീൽ കോംപ്ലക്സ്, ബാംബൂ തറയോട് ഫാക്ടറി എന്നിവയിലെ തൊഴിലാളികളുടെ പ്രശ്നങ്ങൾ വിശദമായി ചർച്ച ചെയ്ത് ഉചിതമായ    നടപടി സ്വീകരിക്കും. ജില്ലാ പഞ്ചായത്തിന്റെ ഉടമസ്ഥതയിലുള്ള ചെറുവണ്ണൂർ–നല്ലളം ഇൻഡസ്ട്രിയൽ എസ്റ്റേറ്റിലെ വ്യവസായ യൂണിറ്റുകളുടെ പ്രതിനിധികളും എത്തിയിരുന്നു.ആവശ്യങ്ങളിൽ അനുഭാവപൂർണമായ നടപടികൾ സ്വീകരിക്കുമെന്ന് മന്ത്രിമാർ അറിയിച്ചു വ്യവസായ വകുപ്പ് പ്രിൻസിപ്പൽ സെക്രട്ടറി എ.പി.എം.മുഹമ്മദ് ഹനീഷ്, വിവിധ സ്ഥാപന മേധാവികൾ, തൊഴിലാളി സംഘടനാ പ്രതിനിധികൾ എന്നിവർ പങ്കെടുത്തു. …