പുറകിൽ വന്നുനിന്ന 'സർപ്രൈസ്' അറിയാതെ ഫഹദ്, തിരിഞ്ഞുനോക്കിയപ്പോൾ ഞെട്ടി, പിന്നെ വിനയാന്വിതനായി

രജനികാന്തിനെ നായകനാക്കി ടി.ജെ.ജ്ഞാനവേൽ തിരക്കഥയെഴുതി സംവിധാനംചെയ്യുന്ന വേട്ടയൻ എന്ന ചിത്രത്തിന്റെ ഓരോ അപ്ഡേറ്റും ആരാധകരും സിനിമാ പ്രേമികളും ആവേശത്തോടെയാണ് സ്വീകരിക്കുന്നത്. കഴിഞ്ഞദിവസമാണ് ചിത്രത്തിൽ ഒരു പ്രധാനവേഷത്തിലെത്തുന്ന ഫഹദ് ഫാസിലിന്റെ കഥാപാത്രത്തെ പരിചയപ്പെടുത്തിക്കൊണ്ടുള്ള വീഡിയോ അണിയറപ്രവർത്തകർ പുറത്തുവിട്ടത്. രജനികാന്തിനും അമിതാഭ് ബച്ചനും ഒപ്പമുള്ള ഫഹദിന്റെ ലൊക്കേഷൻ ദൃശ്യങ്ങൾ ഇതിനോടകം വൈറലായിക്കഴിഞ്ഞു.

ലൈക്ക പ്രൊഡക്ഷൻസാണ് വേട്ടയൻ നിർമിക്കുന്നത്. ഇവരുടെ സോഷ്യൽ മീഡിയാ പേജിലൂടെയാണ് ഫഹദിന്റെ കഥാപാത്രത്തെ പരിചയപ്പെടുത്തുന്ന വീഡിയോ പുറത്തുവന്നത്. പാട്രിക്ക് എന്നാണ് ഫഹദ് അവതരിപ്പിക്കുന്ന കഥാപാത്രത്തിന്റെ പേര്. വീഡിയോയിൽ ഒരിടത്ത് അമിതാഭ് ബച്ചന് കൈകൊടുക്കുന്ന ഫഹദിനെ കാണാം. എന്നാൽ ആരാധകർ ഏറ്റെടുത്തിരിക്കുന്നത് നിമിഷങ്ങൾ മാത്രമുള്ള വീഡിയോയുടെ അവസാനഭാ​ഗത്തുവരുന്ന മറ്റൊരു രം​ഗമാണ്.

ഫഹദിന്റെ അഭിനയം കാണാൻ ആകാംക്ഷയോടെ അദ്ദേഹത്തിന്റെ പിന്നിൽ വന്നുനിൽക്കുകയാണ് രജനികാന്ത്. എന്നാൽ തന്റെ പിന്നിൽ ഒരാൾ ഉള്ള കാര്യം ഫഹദ് മനസിലാക്കുന്നേയില്ല. അല്പനിമിഷം കഴിഞ്ഞ് തിരിഞ്ഞുനോക്കുമ്പോഴാണ് പിന്നിൽ സൂപ്പർ സ്റ്റാർ നിൽക്കുന്നത് ഫഹദ് കാണുന്നതും ഞെട്ടുന്നത്. വിനയാന്വിതനാവുന്ന ഫഹദിന്റെ പുറത്ത് രജനികാന്ത് കളിയായി അടിക്കുന്നതും വീഡിയോയിലുണ്ട്. നിരവധി പേരാണ് വീഡിയോയ്ക്ക് പ്രതികരണവുമായെത്തിയത്. വീഡിയോയുടെ അവസാനഭാ​ഗം മാത്രം നിരവധി തവണ കണ്ടെന്നാണ് പലരും പറഞ്ഞത്.

ഇതാദ്യമായാണ് ഫഹദും രജനികാന്തും ഒരുമിച്ചഭിനയിക്കുന്നത്. നേരത്തേ വിക്രം എന്ന ചിത്രത്തിൽ കമൽ ഹാസനും ഫഹദ് ഫാസിലും ഒരുമിച്ചെത്തിയിരുന്നു. ചിത്രത്തിലെ അമർ എന്ന ഫഹദിന്റെ കഥാപാത്രം ഏറെ ശ്രദ്ധിക്കപ്പെട്ടിരുന്നു. മാരി സെൽവരാജ് സംവിധാനം ചെയ്ത മാമന്നനിലാണ് ഫഹദ് ഒടുവിൽ തമിഴിൽ വേഷമിട്ടത്.

ഏറെ ജനശ്രദ്ധ പിടിച്ചുപറ്റിയ ജയ് ഭീം എന്ന ചിത്രത്തിനുശേഷം ടി.ജെ. ജ്ഞാനവേൽ തിരക്കഥയെഴുതി സംവിധാനംചെയ്യുന്ന ചിത്രമാണ് ‘വേട്ടയൻ’. ലൈക പ്രൊഡക്ഷൻസിൻ്റെ ബാനറിൽ സുബാസ്കരനാണ് ചിത്രം നിർമ്മിക്കുന്നത്.

ഫഹദിനുപുറമേ അമിതാഭ് ബച്ചനും മഞ്ജു വാര്യരും റാണ ദഗ്ഗുബട്ടിയും സുപ്രധാന വേഷത്തിലെത്തുന്നുണ്ട്. ശർവാനന്ദ്, ജിഷു സെൻഗുപ്‌ത, അഭിരാമി, റിതിക സിങ്, ദുഷാര വിജയൻ, രാമയ്യ സുബ്രമണ്യൻ, കിഷോർ, റെഡിൻ കിങ്‌സ്‌ലി, രോഹിണി, രവി മരിയ, റാവു രമേശ്, രാഘവ് ജൂയാൽ, രമേശ് തിലക്, ഷാജി ചെൻ, രക്ഷൻ, സിങ്കമ്പുലി, ജി എം സുന്ദർ, സാബുമോൻ അബ്ദുസമദ്, ഷബീർ കല്ലറക്കൽ എന്നിവരും അഭിനയിച്ചിരിക്കുന്നു. ദീപാവലിയോടനുബന്ധിച്ച് ചിത്രം തിയേറ്ററുകളിലെത്തും.