ജന്മദിനത്തിൽ വിമാനയാത്രയ്ക്കായി എത്തിയ പിതാവിന് മകൾ ഒരുക്കിയത് ഒരിക്കലും മറക്കാനാവാത്ത മനോഹരമായ സർപ്രൈസ്. ഇൻഡിഗോ വിമാനത്തിലെ കാബിൻ ക്രൂ അംഗമായ യുവതി, യാത്രക്കാരനായി എത്തിയ സ്വന്തം പിതാവിനെ വിമാനത്തിനുള്ളിൽ വെച്ച് യൂണിഫോമിൽ സ്വീകരിക്കുന്ന ദൃശ്യങ്ങളാണ് ഇപ്പോൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നത്.
ഫ്ലൈറ്റ് അറ്റൻഡന്റായ ശ്വാത പാണ്ഡേയാണ് തന്റെ പിതാവിന് ഈ വ്യത്യസ്തമായ ജന്മദിന സമ്മാനം നൽകിയത്. തന്റെ മകൾ ഈ വിമാനത്തിലെ ജീവനക്കാരിയാണെന്ന കാര്യം പിതാവിന് മുൻകൂട്ടി അറിയാൻ കഴിഞ്ഞിരുന്നില്ല.
മാത്രമല്ല, ഔദ്യോഗിക ഇൻഡിഗോ യൂണിഫോമിൽ മകളെ അദ്ദേഹം നേരിൽ കാണുന്നതും ആദ്യമായിട്ടായിരുന്നു. വിമാനത്തിലേക്ക് പ്രവേശിച്ച പിതാവിനെ പുഞ്ചിരിയോടെയാണ് ശ്വാത സ്വീകരിച്ചത്.
പെട്ടെന്ന് യൂണിഫോമിൽ തന്റെ മകളെ മുന്നിൽക്കണ്ട അദ്ദേഹത്തിന്റെ മുഖത്ത് അമ്പരപ്പും അത്ഭുതവും പ്രകടമാകുന്നതായി വീഡിയോയിൽ വ്യക്തമാണ്.
തുടർന്ന് മകൾ പിതാവിന്റെ കാൽ തൊട്ട് അനുഗ്രഹം വാങ്ങുന്ന ഹൃദ്യമായ കാഴ്ചയും ദൃശ്യങ്ങളിൽ കാണാം. അപ്രതീക്ഷിതമായ ഈ കൂടിക്കാഴ്ച അദ്ദേഹത്തിന്റെ മുഖത്ത് അളവറ്റ സന്തോഷമാണ് സമ്മാനിച്ചത്.
“അച്ഛന്റെ പിറന്നാൾ ദിവസം അദ്ദേഹത്തെ സർപ്രൈസ് ചെയ്യാൻ തീരുമാനിച്ചു” എന്ന അടിക്കുറിപ്പോടെയാണ് ശ്വാത പാണ്ഡേ ഈ വീഡിയോ തന്റെ ഔദ്യോഗിക ഇൻസ്റ്റഗ്രാം പേജിൽ പങ്കുവെച്ചത്. താൻ അദ്ദേഹത്തിന്റെ യാത്രാവിമാനത്തിൽ ഉണ്ടായിരിക്കുമെന്ന വിവരം പിതാവിന് യാതൊരുവിധ സൂചനയും ഉണ്ടായിരുന്നില്ലെന്നും, യൂണിഫോമിൽ തന്നെ നേരിട്ട് കാണുന്നത് ഇതാദ്യമാണെന്നും അവർ കുറിപ്പിൽ വ്യക്തമാക്കിയിട്ടുണ്ട്.
പിതാവും മകളും തമ്മിലുള്ള ഈ വികാരനിർഭരമായ നിമിഷം ചുരുങ്ങിയ സമയംകൊണ്ട് തന്നെ സമൂഹമാധ്യമ ഉപയോക്താക്കളുടെ ശ്രദ്ധ പിടിച്ചുപറ്റി. നിരവധി പേരാണ് ഈ സ്നേഹനിമിഷത്തെ പ്രശംസിച്ച് രംഗത്തെത്തിയത്.
അച്ഛന്റെ മുഖത്തുണ്ടായ നിഷ്കളങ്കമായ സന്തോഷം തന്നെയാണ് ഈ സർപ്രൈസിന്റെ വിജയമെന്ന് പലരും അഭിപ്രായപ്പെട്ടു. “എത്ര മനോഹരമായ പിറന്നാൾ സമ്മാനം”, “അഭിമാനിക്കുന്ന അച്ഛന്റെ നിമിഷം” തുടങ്ങി നിരവധി അനുകൂല കമന്റുകളാണ് വീഡിയോയ്ക്ക് ലഭിച്ചുകൊണ്ടിരിക്കുന്നത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
