ലോകത്തിലെ ഏറ്റവും വലിയ ക്രിപ്റ്റോകറൻസി എക്സ്ചേഞ്ചായ ബൈനാൻസിൽ ചരിത്രത്തിലെ ഏറ്റവും വലിയ സൈബർ കൊള്ള. കമ്പനിയുടെ വോലറ്റുകളിൽനിന്ന് 636 കോടിയിലധികം യുഎസ് ഡോളർ (ഏകദേശം 60,000 കോടി രൂപ) മൂല്യമുള്ള ക്രിപ്റ്റോകറൻസി സൈബർ കൊള്ളസംഘം തട്ടിയെടുത്തു.
ഈ ഭീമമായ കവർച്ചയ്ക്കു പിന്നിൽ ഉത്തര കൊറിയയിലെ കുപ്രസിദ്ധ ഹാക്കിങ് സംഘമായ ‘ട്രേഡർ ട്രെയ്റ്റർ’ ആണെന്ന് പ്രമുഖ ബ്ലോക്ക്ചെയിൻ നിരീക്ഷണ ഏജൻസിയായ ടിആർഎം വ്യക്തമാക്കിയിട്ടുണ്ട്. അതേസമയം, മോഷ്ടിക്കപ്പെട്ടതിൽ പകുതിയോളം തുകയായ ഏകദേശം 300 കോടി ഡോളർ (ഏകദേശം 28,000 കോടി രൂപ) ഉടൻതന്നെ മരവിപ്പിക്കാൻ കഴിഞ്ഞതായി കമ്പനി അധികൃതർ അറിയിച്ചു.
കഴിഞ്ഞ വർഷം ‘ബൈബിറ്റ്’ എന്ന ക്രിപ്റ്റോ എക്സ്ചേഞ്ചിൽനിന്ന് 150 കോടി ഡോളർ തട്ടിയെടുത്തതിനു പിന്നിലും ഇതേ ഉത്തര കൊറിയൻ സംഘമായിരുന്നുവെന്ന് എഫ്ബിഐ സ്ഥിരീകരിച്ചിരുന്നു. മുൻകാല കവർച്ചയ്ക്കു സമാനമായ രീതി തന്നെയാണ് പുതിയ സൈബർ ആക്രമണത്തിലും പ്രയോഗിച്ചിരിക്കുന്നതെന്ന് അനലിറ്റിക്സ് കമ്പനികൾ വിലയിരുത്തുന്നു.
സുരക്ഷാ വീഴ്ചയെത്തുടർന്ന് എക്സ്ചേഞ്ചിൽ നിന്ന് പണം പിൻവലിക്കുന്നതിന് ബൈനാൻസ് താൽക്കാലികമായി വിലക്കേർപ്പെടുത്തിയിട്ടുണ്ട്. കുറ്റവാളികളെ പിടികൂടാനായി രാജ്യാന്തര അന്വേഷണ ഏജൻസികളുമായി ചേർന്നു പ്രവർത്തിച്ചുവരികയാണെന്നും കമ്പനി വ്യക്തമാക്കി.
“നിക്ഷേപം സുരക്ഷിതം” സൈബർ ആക്രമണം ഞെട്ടിക്കുന്നതാണെങ്കിലും ഇടപാടുകാരുടെ നിക്ഷേപം പൂർണ്ണമായും സുരക്ഷിതമാണെന്ന് ബൈനാൻസ് സ്ഥാപകൻ ഷാങ്പെങ് ഷാവോ വ്യക്തമാക്കി. കമ്പനിയുടെ ദൈനംദിന ചുമതലകളിൽ ഇപ്പോൾ താനില്ലെങ്കിലും ഒരു ഓഹരി ഉടമയെന്ന നിലയിൽ ഉപയോക്താക്കൾക്ക് പണം നഷ്ടപ്പെടില്ലെന്ന് ഉറപ്പാക്കുമെന്ന് അദ്ദേഹം ഉറപ്പുനൽകി.
ഉണ്ടായ മുഴുവൻ നഷ്ടവും കമ്പനി തന്നെ പൂർണമായി വഹിക്കുമെന്നും ഔദ്യോഗികമായി അറിയിച്ചിട്ടുണ്ട്. വെറും 20 മിനിറ്റിനുള്ളിൽ 10 ബ്ലോക്ക്ചെയിൻ ശൃംഖലകൾ വഴിയാണ് ഭീമമായ തുക വിവിധ അജ്ഞാത അക്കൗണ്ടുകളിലേക്ക് മാറ്റപ്പെട്ടത്.
കമ്പനിയിലെ ഒരു എൻജിനീയറുടെ ലാപ്ടോപ്പിലെ സുരക്ഷാ പഴുതുകൾ ഉപയോഗിച്ചാണ് തട്ടിപ്പ് നടന്നതെന്നായിരുന്നു ആദ്യഘട്ടത്തിലെ കണ്ടെത്തൽ. എന്നാൽ, തുടർന്നുള്ള അന്വേഷണത്തിൽ കൂടുതൽ വിവരങ്ങൾ പുറത്തുവന്നതായും തട്ടിപ്പിനുപയോഗിച്ച രീതി അതിസങ്കീർണമാണെന്നും അധികൃതർ കൂട്ടിച്ചേർത്തു.
ക്രിപ്റ്റോകറൻസി സുരക്ഷിതമായി വാങ്ങാനും വിൽക്കാനുമുള്ള പ്രധാന വേദിയാണ് ബൈനാൻസ് പോലെയുള്ള വെർച്വൽ എക്സ്ചേഞ്ചുകൾ.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
