കാക്കനാട് കലക്ടറേറ്റിൽ സുരക്ഷാ മുൻകരുതൽ പരിശോധന; മോക് ഡ്രിൽ ശ്രദ്ധേയമായി

കാക്കനാട് കലക്ടറേറ്റ് സമുച്ചയത്തിൽ ഉദ്യോഗസ്ഥരെയും സന്ദർശകരെയും ഒരേസമയം അമ്പരപ്പിച്ചും ജാഗ്രതയണർത്തിയും സുരക്ഷാ മോക് ഡ്രിൽ നടന്നു. പെട്ടെന്നുണ്ടായ തീയും പുകയും അപായ സൈറണിന്റെ മുഴക്കവും ഫയർ എൻജിനുകളുടെ പാഞ്ഞെത്തലുമൊക്കെ ആദ്യം ചിലരിൽ ആശങ്ക പരത്തിയെങ്കിലും, ഇതൊരു സുരക്ഷാ മുന്നൊരുക്കമാണെന്ന് വ്യക്തമായതോടെ എല്ലാവരും പൂർണ്ണ സഹകരണവുമായി രംഗത്തിറങ്ങി.

സൈറൺ മുഴങ്ങിയതിനെത്തുടർന്ന് അഞ്ച് നിലകളിലുമുള്ള വിവിധ ഓഫിസുകളിൽ നിന്ന് ജീവനക്കാർ സുരക്ഷിതമായി പുറത്തേക്ക് ഓടിയെത്തി. പൊള്ളലേറ്റയാളെ സ്ട്രെക്ചറിൽ ആംബുലൻസിലേക്ക് മാറ്റുന്നതും, മുകൾ നിലകളിൽ കുടുങ്ങിയവരെ റോപ് റെസ്ക്യൂ വഴി താഴെ എത്തിക്കുന്നതും, എമർജൻസി മെഡിക്കൽ ട്രയാജും പ്രഥമ ശുശ്രൂഷയും നൽകുന്നതുമെല്ലാം ഉൾപ്പെടുത്തി അതീവ തന്ത്രപരമായാണ് രക്ഷാപ്രവർത്തനം ആസൂത്രണം ചെയ്തത്.

മുൻകൂട്ടി വിവരം ലഭിച്ചിരുന്നതിനാൽ ഇത് മോക് ഡ്രിലാണെന്ന് ഭൂരിഭാഗം പേർക്കും വേഗത്തിൽ മനസ്സിലാക്കാൻ സാധിച്ചു. ഫയർ ആൻഡ് റെസ്ക്യു സർവീസസ് ഉദ്യോഗസ്ഥർക്കൊപ്പം പൊലീസും സിവിൽ ഡിഫൻസ് വൊളന്റിയർമാരും ദൗത്യത്തിന് നേതൃത്വം നൽകി.

ദുരന്ത നിവാരണ അതോറിറ്റി, ഫയർ ആൻഡ് റെസ്ക്യു സർവീസസ്, സിവിൽ ഡിഫൻസ് എന്നിവയുടെ സംയുക്ത അഭ്യന്തര കൺട്രോളിലാണ് ഈ സുരക്ഷാ പരിശോധന നടന്നത്. കലക്ടർ ജി.പ്രിയങ്ക ഫയർ എക്സ്റ്റിംഗ്യുഷറുമായി നേരിട്ട് രംഗത്തിറങ്ങിയത് ശ്രദ്ധേയമായി.

താഴത്തെ നിലയോടു ചേർന്ന ഭാഗത്തുണ്ടായ ‘തീപിടിത്തം’ അവർ ഫയർ എക്സ്റ്റിംഗ്യുഷർ ഉപയോഗിച്ച് വിജയകരമായി അണച്ചു. തുടർന്ന്, ഇത്തരത്തിലുള്ള ഉപകരണങ്ങൾ അത്യാഹിത ഘട്ടങ്ങളിൽ എങ്ങനെ കൃത്യമായി ഉപയോഗിക്കാമെന്നും അവർ ജീവനക്കാർക്ക് വിശദീകരിച്ചു നൽകി.

അഡീഷനൽ ജില്ലാ മജിസ്ട്രേട്ട് കെ.മനോജ്, ദുരന്ത നിവാരണ വിഭാഗം ഡപ്യൂട്ടി കലക്ടർ ജോസഫ് സ്റ്റീഫൻ റോബി, ഹസാർഡ് അനലിസ്റ്റ് അഞ്ജലി പരമേശ്വരൻ, ജില്ലാ ഫയർ ഓഫിസർ എ.എസ്.ജോജി, തൃക്കാക്കര ഫയർ സ്റ്റേഷൻ ഓഫിസർ ബി.ബൈജു, ക്ലബ് റോഡ് ഫയർ സ്റ്റേഷൻ ഓഫിസർ അഭിജിത്ത്, ഗാന്ധിനഗർ അസിസ്റ്റന്റ് സ്റ്റേഷൻ ഓഫിസർ സുരേഷ്കുമാർ, ജില്ലാ കോ–ഓർഡിനേറ്റർ എസ്.ശരത്, സിവിൽ ഡിഫൻസ് ഡിവിഷനൽ വാർഡൻ മാത്യു സി.ജോർജ്, ഡപ്യൂട്ടി ഡിവിഷനൽ വാർഡൻ പി.എം.മാഹിൻകുട്ടി, ആലുവ ജനറൽ ആശുപത്രിയിലെ ഡോ.സജിത് ചന്ദ്രൻ തുടങ്ങിയ പ്രമുഖർ ഈ സുരക്ഷാ ദൗത്യത്തിന് നേതൃത്വം നൽകി. അപകടസാധ്യതയേറിയ സ്ഥലങ്ങളിൽ അഗ്നിരക്ഷാ സേനാംഗങ്ങൾക്ക് നേരിട്ട് പ്രവേശിക്കാൻ പ്രയാസമുള്ള സാഹചര്യങ്ങളിൽ ഉപയോഗിക്കുന്ന ആധുനിക റോബട്ട് സജ്ജീകരിച്ചിരുന്നത് സന്ദർശകർക്ക് കൗതുകമുണർത്തി.

ഫയർ എൻജിനിൽ നിന്ന് റോബടിലേക്ക് ഘടിപ്പിച്ചിട്ടുള്ള ഹോസ് വഴി വെള്ളം ചീറ്റുന്നതും, ചക്രങ്ങളുടെ സഹായത്തോടെ തീപിടിത്തമുള്ള സ്ഥലത്തേക്ക് അതിവേഗം ഓടിയെത്താൻ സാധിക്കുന്നതുമായ ഈ യന്ത്ര മനുഷ്യന്റെ പ്രവർത്തനം ഏവരുടെയും ശ്രദ്ധ പിടിച്ചുപറ്റി.