അന്താരാഷ്ട്ര കായിക വേദികളിൽ രാജ്യത്തിന്റെ അഭിമാനമായി മാറിയ പ്രമുഖ താരങ്ങൾ ഒത്തുകൂടിയതോടെ കോഴിക്കോട് എൻ.ഐ.ടി സിന്തറ്റിക് ട്രാക്കിൽ നടക്കുന്ന സംസ്ഥാന സ്‌കൂൾ കായികമേളയിൽ ആവേശകരമായ മുഹൂർത്തങ്ങൾ. വളർന്നുവരുന്ന കുട്ടിത്താരങ്ങളെ അഭിവാദ്യം ചെയ്യാനും അവർക്ക് പിന്തുണയേകാനുമാണ് കായികലോകത്തെ പ്രമുഖർ വേദിയിലെത്തിയത്.
ഭാവിയിലെ ചാമ്പ്യന്മാരായി മാറേണ്ട പുതിയ തലമുറയ്ക്ക് വലിയൊരു പ്രചോദനവും ഊർജ്ജവും പകരുന്നതായിരുന്നു ഈ പ്രമുഖരുടെ സാന്നിധ്യം.
ലോക അത്‌ലറ്റിക്‌സ് ചാമ്പ്യൻഷിപ്പിൽ മെഡൽ നേടുന്ന ആദ്യ ഇന്ത്യൻ താരവും ഖേൽരത്‌ന-പദ്മശ്രീ പുരസ്‌കാര ജേതാവുമായ അഞ്ജു ബോബി ജോർജ്, ഇന്ത്യൻ ഹോക്കിയുടെ ‘ദി ഗ്രേറ്റ് വാൾ’ എന്നറിയപ്പെടുന്ന പാരീസ്-ടോക്കിയോ ഒളിമ്പിക്‌സ് മെഡലിസ്റ്റ് പി.ആർ. ശ്രീജേഷ് എന്നിവർ ചടങ്ങിലെ പ്രധാന ആകർഷണമായി.
ഇവർക്കൊപ്പം 400 മീറ്റർ ഹർഡിൽസിൽ ഏഷ്യൻ ഗെയിംസ് സ്വർണ്ണമെഡൽ നേടിയ ആദ്യ ഇന്ത്യൻ പുരുഷ താരമായ ജോസഫ് ജെ. എബ്രഹാം, 800, 1500 മീറ്ററുകളിലെ ഏഷ്യൻ ഗെയിംസ് ചാമ്പ്യനായ ഒളിമ്പ്യൻ ജിൻസൺ ജോൺസൺ എന്നിവരും ഈ ആവേശനിമിഷങ്ങൾക്ക് സാക്ഷിയാകാൻ എത്തിച്ചേർന്നു.
കൂടാതെ, ഏഷ്യൻ അത്‌ലറ്റിക് ചാമ്പ്യൻഷിപ്പിലെ സ്വർണ്ണനേട്ടങ്ങളിലൂടെ ഇന്ത്യയുടെ അഭിമാനമായി മാറിയ ‘പാലക്കാടൻ കാറ്റ്’ പി.യു. ചിത്ര, 4×400 മീറ്റർ റിലേയിലെ ഏഷ്യൻ ചാമ്പ്യൻഷിപ്പ് സ്വർണ്ണമെഡൽ ജേതാവും ഒളിമ്പ്യനുമായ കുഞ്ഞുമുഹമ്മദ്, ഏഷ്യൻ ഗെയിംസ് റിലേ സ്വർണ്ണമെഡൽ ജേതാവായ വി.കെ.
വിസ്മയ എന്നിവരും നവാഗതരായ കായികപ്രതിഭകൾക്ക് മാർഗ്ഗനിർദ്ദേശങ്ങളുമായി വേദിയിൽ അണിനിരന്നു. തങ്ങളുടെ കായിക ജീവിതത്തിലെ പോരാട്ടവീര്യവും അനുഭവസമ്പത്തും പങ്കുവെച്ചുകൊണ്ട് ഈ പ്രമുഖ താരങ്ങൾ മേളയ്ക്കും അതിൽ പങ്കെടുക്കുന്ന യുവപ്രതിഭകൾക്കും ആശംസകൾ നേർന്നു.
നിശ്ചയദാർഢ്യവും കഠിനാധ്വാനവും ഉണ്ടെങ്കിൽ ലോകത്തിന്റെ ഉച്ചകോടിയിൽ എത്താൻ ഏതൊരു കായികതാരത്തിനും സാധിക്കുമെന്ന വലിയ സന്ദേശം നൽകിയ ഈ നിമിഷങ്ങൾ, സംസ്ഥാന സ്‌കൂൾ കായികമേളയുടെ ചരിത്രത്തിലെ തന്നെ ഏറ്റവും മനോഹരമായ ഏടുകളിലൊന്നായി മാറി.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
