ഏനാത്ത് ഇളങ്ങമംഗലം ഗവ.എൽപി സ്കൂളിലെ പുതിയ കെട്ടിടത്തിന്റെ നിർമാണം ആരംഭിച്ചിട്ട് എട്ടു വർഷങ്ങൾ പിന്നിട്ടിട്ടും പൂർത്തീകരിക്കാനായില്ല. സ്ഥലം പരിമിതി മൂലം ഒന്നു മുതൽ നാലു വരെ ക്ലാസുകൾ ഒരു ഹാളിൽ ഒരുമിച്ചാണ് പ്രവർത്തിക്കുന്നത്.
സ്കൂൾ ഓഫിസിനും പ്രീ പ്രൈമറി വിഭാഗത്തിനും സൗകര്യങ്ങളുടെ അപര്യാപ്തത വലിയ പ്രതിസന്ധിയാണ് സൃഷ്ടിക്കുന്നത്. പത്തനംതിട്ട
ജില്ലയിൽ ഏറ്റവും കൂടുതൽ വിദ്യാർഥികളുള്ള എൽപി സ്കൂളുകളിൽ ഒന്നാണിത്. നിലവിലെ കെട്ടിടത്തിന്റെ പഴക്കം കാരണം ഓടുകൾ മാറ്റി ലോഹ ഷീറ്റ് പതിച്ചതും അസൗകര്യങ്ങൾ വർധിക്കാൻ കാരണമായിട്ടുണ്ട്.
2018-ൽ ആരംഭിച്ച പദ്ധതിക്കായി സംസ്ഥാന സർക്കാരിന്റെ പ്ലാൻ ഫണ്ടിൽ നിന്ന് 96.12 ലക്ഷം രൂപയും എംഎൽഎ ഫണ്ടിൽ നിന്ന് 25 ലക്ഷം രൂപയുമാണ് അനുവദിച്ചത്. ഹാബിറ്റാറ്റിനായിരുന്നു നിർമാണ ചുമതല.
കെട്ടിടത്തിന്റെ ഭിത്തികളും മേൽക്കൂരയും പൂർത്തിയായെങ്കിലും, അവസാന ഘട്ടത്തിലെ 30 ശതമാനം ജോലികൾ ഇപ്പോഴും ബാക്കിയാണ്. കഴിഞ്ഞ ഒരു വർഷത്തിലേറെയായി നിർമാണ പ്രവൃത്തികൾ പൂർണമായും നിലച്ച അവസ്ഥയിലാണ്.
ഇതൊരു പിടിഎ വൈസ് പ്രസിഡന്റ് സുബിൻ മാത്യു ചൂണ്ടിക്കാട്ടുന്നത് ഇങ്ങനെയാണ്: “സ്കൂൾ കെട്ടിടത്തിന്റെ നിർമാണം പൂർത്തിയാക്കാൻ ബന്ധപ്പെട്ടവർ സത്വര നടപടി സ്വീകരിക്കണം. ചുറ്റുമതിൽ ഇല്ലാത്ത കാരണം തെരുവുനായ ശല്യമുണ്ട്.
പുതിയ കെട്ടിടം തെരുവു നായകളുടെ താവളമാണ്. കുട്ടികളുടെ പാർക്ക്, ശുചിമുറി എന്നിവയും അറ്റകുറ്റപ്പണി നടത്തി സംരക്ഷിക്കേണ്ടതും ആവശ്യമാണ്.” ഈ വിഷയത്തിൽ അധികൃതരുടെ അനാസ്ഥ തുടരുകയാണെന്ന് പഞ്ചായത്തംഗം സന്തോഷ് കുമാർ പറഞ്ഞു: “ഇതു സംബന്ധിച്ച് മുൻ വിദ്യാഭ്യാസ മന്ത്രിക്കടക്കം പരാതി നൽകിയിരുന്നു.
നിർമാണം പകുതിയിലധികം കഴിഞ്ഞ കെട്ടിടം ഉപേക്ഷിക്കപ്പെട്ട നിലയിലാണിപ്പോൾ.
സ്കൂളിന്റെ മറ്റ് ആവശ്യങ്ങൾ ബന്ധപ്പെട്ടവരുടെ ശ്രദ്ധയിൽപെടുത്തും.” സ്കൂൾ അധികൃതരും പിടിഎയും ബന്ധപ്പെട്ട എല്ലാ വിഭാഗങ്ങളിലും പരാതി നൽകിയെങ്കിലും ഫലപ്രദമായ ഇടപെടലുകൾ ഉണ്ടായിട്ടില്ല.
അടിയന്തര നടപടികളിലൂടെ കെട്ടിടം പൂർത്തിയാക്കി വിദ്യാർഥികളുടെ ദുരിതത്തിന് പരിഹാരം കാണണമെന്നാണ് രക്ഷിതാക്കളുടെ ആവശ്യം.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
