യുഎസ്-ഇറാൻ സമവായ നീക്കങ്ങൾ അനിശ്ചിതത്വത്തിൽ: ആഗോള വിപണിയിൽ ആശങ്ക തുടരുന്നു

അമേരിക്കയും ഇറാനും തമ്മിൽ രൂപപ്പെടുന്നതായി റിപ്പോർട്ട് ചെയ്യപ്പെട്ട സമവായ നീക്കങ്ങൾ അനിശ്ചിതത്വത്തിലേക്ക്.

ആണവ വിഷയങ്ങളിലടക്കം ഇരുരാജ്യങ്ങളും ധാരണയിലെത്തിയെന്നും, അന്തിമ പ്രഖ്യാപനം പ്രസിഡന്റ് ട്രംപ് ഉടൻ നടത്തുമെന്നും നേരത്തെ യുഎസ് മാധ്യമങ്ങൾ റിപ്പോർട്ട് ചെയ്തിരുന്നു. ഹോർമുസ് കടലിടുക്കിലെ ഗതാഗത നിയന്ത്രണങ്ങൾ നീക്കം ചെയ്യാൻ ഇറാൻ തയ്യാറായതായും വിവരങ്ങൾ പുറത്തുവന്നു.

എന്നാൽ, ഇത്തരം റിപ്പോർട്ടുകൾ വാസ്തവവിരുദ്ധമാണെന്നും, തങ്ങൾ യുദ്ധത്തിൽ വിജയിച്ചെന്ന് വരുത്തിത്തീർക്കാനുള്ള ട്രംപിന്റെ തന്ത്രം മാത്രമാണിതെന്നും ഇറാൻ ഔദ്യോഗികമായി പ്രതികരിച്ചു. ക്രൂഡോയിൽ വിലയിൽ വൻ ഇടിവ്
സമാധാന കരാർ സംബന്ധിച്ച സൂചനകളുടെ പശ്ചാത്തലത്തിൽ അന്താരാഷ്ട്ര വിപണിയിൽ ക്രൂഡോയിൽ വിലയിൽ വലിയ ഇടിവ് രേഖപ്പെടുത്തി.

യുഎസ് ക്രൂഡ് വില ബാരലിന് 1.73 ശതമാനം കുറഞ്ഞ് 87.36 ഡോളറിലും, ബ്രെന്റ് വില 1.70 ശതമാനം ഇടിഞ്ഞ് 91.12 ഡോളറിലുമെത്തി. മെയ് മാസത്തിൽ മാത്രം ബ്രെന്റ് വിലയിൽ 19 ശതമാനത്തിന്റെ ഇടിവാണ് സംഭവിച്ചത്.

2020 മാർച്ചിന് ശേഷം ക്രൂഡോയിൽ വിപണി നേരിടുന്ന ഏറ്റവും വലിയ പ്രതിസന്ധിയാണിത്. അനിശ്ചിതത്വത്തിൽ കരാർ ചർച്ചകൾ
ആണവായുധ പദ്ധതി ഉപേക്ഷിക്കുക, ഹോർമുസ് കടലിടുക്ക് തുറക്കുക, മൈനുകൾ നീക്കം ചെയ്യുക തുടങ്ങിയവയാണ് കരാറിലെ പ്രധാന നിബന്ധനകൾ.

ഇതിന്റെ ഭാഗമായി ട്രംപ് ഉന്നത സൈനിക ഉദ്യോഗസ്ഥരുമായി ‘സിറ്റുവേഷൻ റൂമിൽ’ രണ്ട് മണിക്കൂർ നീണ്ട ചർച്ച നടത്തിയിരുന്നു.

കരാർ സംബന്ധിച്ച പ്രഖ്യാപനം പ്രതീക്ഷിച്ചിരുന്നെങ്കിലും അതുണ്ടായില്ല. ട്രംപ് നിശ്ചയിച്ച ചുവപ്പുവരകൾ ഇറാൻ അംഗീകരിക്കണമെന്നും, അമേരിക്കയ്ക്ക് തൃപ്തികരമായ കരാർ മാത്രമേ ഒപ്പുവെക്കൂ എന്നും വൈറ്റ്ഹൗസ് വൃത്തങ്ങൾ വ്യക്തമാക്കി.

അതേസമയം, ഇറാൻ ആണവായുധ മോഹം പൂർണ്ണമായും ഉപേക്ഷിക്കണമെന്ന ട്രംപിന്റെ ആവശ്യം ഇറാന്റെ വിദേശകാര്യ മന്ത്രാലയ വക്താവ് ഇസ്മയിൽ ബഗേയ് തള്ളി. 47 വർഷം മുൻപേ ഇത്തരം ആജ്ഞകൾക്ക് മറുപടി നൽകിയതാണെന്നും, അന്തിമ തീരുമാനം ആയിട്ടില്ലെന്നും അദ്ദേഹം കൂട്ടിച്ചേർത്തു.

ഉപരോധങ്ങൾ നീക്കുക, മരവിപ്പിച്ച ആസ്തികൾ വിട്ടുകിട്ടുക തുടങ്ങിയ ആവശ്യങ്ങളിൽ ഇറാൻ ഉറച്ചുനിൽക്കുകയാണ്. യുഎസ് സ്റ്റേറ്റ് സെക്രട്ടറി സ്കോട്ട് ബെസ്സന്റ് എണ്ണ ഉപരോധത്തിൽ ഇളവുകൾ പരിഗണിക്കാൻ തയ്യാറാണെന്ന സൂചന നൽകിയത് അമേരിക്കയുടെ സമീപനത്തിലെ മാറ്റമായാണ് വിലയിരുത്തപ്പെടുന്നത്.

അതിനിടെ, ഇറാനിലെ 440 കിലോഗ്രാം സമ്പുഷ്ടീകരിച്ച യുറേനിയം ഏറ്റെടുക്കാമെന്ന് കസാക്കിസ്ഥാൻ മുന്നോട്ട് വന്നിട്ടുണ്ട്. ഈ നീക്കത്തോട് ട്രംപിന് കടുത്ത വിയോജിപ്പുണ്ട്.

ഓഹരി വിപണിയിലെ തളർച്ച
അനിശ്ചിതത്വം തുടരുന്നതിനാൽ ഓഹരി വിപണിയിൽ വലിയ ചാഞ്ചാട്ടമാണുള്ളത്. ഇന്ത്യൻ വിപണിയിൽ സെൻസെക്സും നിഫ്റ്റിയും വ്യാപാരത്തിന്റെ അവസാന അരമണിക്കൂറിൽ കനത്ത നഷ്ടത്തിലേക്ക് കൂപ്പുകുത്തി.

മൺസൂൺ ദുർബലമാകുമെന്ന നിരീക്ഷണം വിപണിയെ കൂടുതൽ സമ്മർദ്ദത്തിലാക്കി. യുഎസ്-ഇന്ത്യ കരാർ അന്തിമഘട്ടത്തിൽ
അമേരിക്കയും ഇന്ത്യയും തമ്മിലുള്ള ഉഭയകക്ഷി കരാർ ചർച്ചകൾ അന്തിമഘട്ടത്തിലാണെന്ന് ഇന്ത്യയിലെ യുഎസ് അംബാസഡർ സെർജിയോ ഗോർ അറിയിച്ചു.

അടുത്ത ഏതാനും ആഴ്ചകൾക്കുള്ളിൽ കരാർ ഒപ്പുവെക്കാനാവുമെന്നും അദ്ദേഹം സൂചിപ്പിച്ചു. കരാർ യാഥാർത്ഥ്യമാകുന്നതോടെ ഇന്ത്യൻ ഉൽപ്പന്നങ്ങൾക്ക് അന്താരാഷ്ട്ര വിപണിയിൽ മികച്ച മത്സരക്ഷമത കൈവരിക്കാനാകുമെന്നാണ് ബിസിനസ് ലോകത്തിന്റെ പ്രതീക്ഷ.